تنبيه :: عزيزي اذا واجهتك مشكلة في تصفح الموقع , فاننا ننصحك بترقيه متصفحك الى احدث اصدار أو استخدام متصفح فايرفوكس المجاني .. بالضغط هنا .. ثم اضغط على مستطيل الاخضر (تحميل مجاني) .
 
 
صفحة 2 من 3 الأولىالأولى 123 الأخيرةالأخيرة
النتائج 11 إلى 20 من 22
  1. #11
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    وديمة:السلام عليكم(ومبين على صوتها انها تعبانة)
    الدماني:عليكم السلام والرحمه....دموووه وين انتي؟شو بلاج؟شكلج تعبانة؟أبده بطنج يعورج من اكلنا؟
    وديمة:هههههههههه لا والله بالعكس أكلكم لا يعلى عليه بس انا فعلا تعبانة مارقدت طول الليل...(وتخبرها السالفة)
    الدماني:وحليييييله بوشهاب تستاهلون سلامته....وانا اقول بلاها البنية مادقت ابدها زعلانة من الموقف اللي استوى
    وديمة(تسوي عمرها ناسية):اي موقف؟
    الدماني:الموقف البارحي يوم ياية بتروحين وتجابلتي وي بوحموود
    وديمة(وهي منحرجة):هههههههههه لا حصل خير...بس للأسف عطيتج فرصة تتشمتين فييه
    الدماني:شوووووو انا طول الليل اضحك عليج ولو هب سالفة بوشهاب جان ماخليتج فحالج اليوم
    وديمة:ههههههههههه انزين خليني ارقد احين العصر بسيرلم وورايه مشاوير وايدة...أول بسير فوالة وعقب جمعية الشارجة بييب فطاير وسندويجات هذا من غير دلال الجاي والقهوة والعصاير
    الدماني: حشا حرمة مربية مب واحد مسوي حادث ههههههههههههه
    وديمة:ههههههههههه لو سمحتي لا تغلطين على اخويه نحن ماصدقنا انه ينش بالسلامة
    الدماني:الله يحفظه....هو متى بيظهر من المستشفى؟
    وديمة:مادري بس اظني بيخلونه مرقد لين ماتبرا جروحه وترد عظامه
    الدماني:خلاص عيل انا احين بسير اخبر راشد وجاسم وبطرش وياهم حلويات...يلا باي بسير اسويهم
    وديمة(وقلبها ينتفض):مشكورة فديتج دوم راعية واجب..فمان الله
    (رقدت وديمة حوالي ساعتين ونشت قافزة لنها شافت حلم وكان جاسم فيه!!....حلمت ان جاسم واقف بعيد عنها ويزقرها ويمد ايده لها بس هي مب رايمة تسير صوبه وتصيح....نشت وديمة وتعوذت من ابليس بس تم الحلم شاغل بالها واشمعنا جاسم؟وشو تفسير هالحلم الغريب؟!....انشغلت وديمة وهي تزهب الفوالة حق المستشفى ويوم وصلت هناك لقت قوم خالها(ابو نورة)ومرته ونورة واخوانها...سلمت عليهم وديمة ومايلست وياهم طلعت تيلس فالاستراحة اللي برع...نشت نورة تدور وديمة ويوم حصلتها سارت ويلست حذالها)
    نورة:ياوديمة الله يهديج ليش مسوية بعمرج جذه بوشهاب بخير احين لا تتضايجين
    وديمة:إن كنت تلعم فتلك مصيبة وإن كنت لا تعلم فالمصيبة أكبر
    نورة:شو تقصدين مافهمت؟
    وديمة:لا سلامتج...بس بتخبرج انتي ليش ياية اليوم؟
    نورة:شو هالسؤال؟ولد عمتي ويايين نطمن عليه ونتحمد له بالسلامة
    وديمة:اهااااا...قلتي ولد عمتج
    نورة:وديمة بلاج انجلبتي علييه؟هذا اللي متفقين عليه من يومين؟ماقلتي مابتتغيرين علييه مهما كان راي بأحمد؟
    وديمة:هيه وانا عندي كلمتي بس ماتوقعت ان اللي صار بيصير وبسبة منو بسبة أقرب الناس بسبة بنت خالي
    نورة:عن شو ترمسين؟شو اللي صار؟تطرين حادث أحمد؟شو السالفة؟
    وديمة:باختصار أحمد اللي فيه بسبتج....بسبتج كنت بخسر اخويه....والحمدلله انها يت على جذه
    نورة(وهي مصدومة):مافهمت شو تقولين انتي؟!
    وديمة:يوم سكرت عنج هاك اليوم........(وتخبرها السالفة من أول مارمست أحمد لين مااتصل فيها الشرطي يخبرها عن الحادث)
    (وديمة ترمس ودموع نورة تنزل على خدودها.....ماتصورت نورة انه أحمد يحبها لهاي الدرجة....كانت دايما تشوفه مثل الأخ وعمرها ماانتبهت له كزوج او حبيب....وبدون ماتقول نورة أي كلمة نشت من مكانها وركضت صوب أهلها ومسحت دموعها وروحت.....وديمة حست بتأنيب الضمير لنها عاملت نورة بقسوة....جان تطرشلها هالمسج:"السموحة منج يالنور أدري اني قلت كلام يجرح بس حطي عمرج مكاني شو بتكون ردة فعلج وانتي تشوفين اخوج يتعذب وحياته فخطر..وإن شاء الله بنرد خوات شرات قبل وأحسن بعد".....شافت نورة المسج وتقطع قلبها زيادة من قرت "اخوج يتعذب" وعزمت انها ترد تفكر فموضوع أحمد لنها حست ان محد بيحبها وبيصونها كثره...........روحوا قوم وديمة بعد لنه ربع أحمد بيونه بس وعدته انها ترد فليل وتسهر وياه وتونسه)
    (عقب يومين يوم كانت وديمة عند أحمد فالحجرة رن تيلفونه وكان بعيد عنه جان تنش وديمة بتناوله اياه...جان يلاحظ انها طرطرت عيونها يوم شافت الرقم)
    أحمد:بلاج؟منو المتصل؟
    وديمة:هاه..لالا رقم غريب...بترد؟
    أحمد:أكيد برد ابده واحد من الشباب
    وديمة:يود
    (ويرد أحمد ع التيلفون)
    أحمد:ألـــوووو
    (محد يرد)
    أحمد:ألـــــوووو....ألــــووووو
    المتصل:ألـوو
    أحمد:نعم اختي اي خدمة
    المتصل:أحمد شحالك؟
    أحمد:منو انتي؟وكيف تعرفيني؟
    المتصل:أنا نورة
    أحمد(وهو متفاجيء ويصد على وديمة اللي تبتسم له):اي نورة؟
    نورة:اي نورة؟جي كم نورة تعرف؟
    أحمد:ههههههههه هي نورة وحدة ومغربلتني لو أكثر شو؟!
    (وتأشر وديمة لأحمد انها بتخليه ياخذ راحته وبتسير صوب كافتيريا المستشفى تشربلها شي...ويوم بيخلص يدقلا)
    نورة:أحمد
    أحمد:عيونه اللي ماتغفا ولا تنام
    نورة:سامحني ياولد عمتي سامحني ياأغلى الناس
    أحمد:مسموحة مسموحة بالحل يالقلب




    نورة:أنا غلطت يوم تسرعت فالحكم عليك...أنا ماعطيت نفسي الفرصة اني افكر فيك كزوج وحبيب وشريك حياة ياخذ بايدي لدنيا يديدة كلها حب وسعادة
    أحمد:اللللللللللللللله يانورة انا هب مصدق اني ارمسج احين واني اسمع منج هالكلام الحلو
    نورة:وبتسمع أكثر من جذه بعد بس انته قوم بالسلامة وتعال بيتنا لني خلاص رديت اللي ياي يخطبني
    أحمد:والله!! احين ياي عيل
    نورة:ههههههههههه مينون تسويها...لا غناتي احين ارتاح وحط بالك على صحتك وعقب ماتظهر إن شاء الله يصير خير
    أحمد:لا ماعليج انا كنت أتدلع مافيني شي هههههههههه
    نورة:ههههههههههههه أدريبك...المهم بوشهاب مابطول عليك وإن شاء الله المرة الياية اللي برمسك فيها بكون على ذمتك
    أحمد:إن شاء الله
    نورة:تصبح على خير وحافظنك الله
    أحمد:نورة
    نورة:هلا
    أحمد:أحبج
    نورة(وهي مستحية):وأنا بعد...باي
    أحمد:باي
    (سكر أحمد وهو يتنهد ويتذكر كلام نورة ومن فرحته نسى ان وديمة تتريا منه اتصال عشان ترد الحجرة.....حست وديمة ان الوقت تأخر ولازم ترد الحجرة تتطمن على أحمد يمكن تكون نورة قالت له كلام ضايجه...وتمت أفكار وديمة تودي وتيب فيها لين ماوصلت الحجرة ودشت على أحمد ولقته مغمض عيونه ومبتسم....جان تعرف ان نورة أخيرا فرحت قلب أحمد ووافقت عليه)
    وديمة:مبروك ياخويه انته تستاهل كل خير
    أحمد:وديمة انتي من متى هنه؟اووووه نسيت ادقلج اسمحيلي يالغالية
    وديمة:مسموح بالحل ياخويه
    (عقب كمن يوم طلع أحمد من المستشفى ويلس وي أمه أبوه وخبرهم انه يبا يخطب نورة طبعا امه بالذات طارت من الفرحة لنها بنت اخوها وتمت تغايض ابوه منصور لنه مااختار وحدة من بنات اخوه لووول....عقب فترة سار أبومنصور واخوانه وعيالهم يخطبون نورة لأحمد والحمدلله حددوا الملجة بعد والعرس مابيكون بعيد عن الملجة يعني يادوب تزهب العروس عمرها لنه المعرس مستعيل لوووول......وتمر الأيام وأحمد ونورة يعيشون أحلى فترة فحياتهم والكل فرحان بهم......ووديمة مرتبشة تدور قطع وموديلات عشان الفستان وكانن الدماني وريم يفازعنها ومشاركاتنها فرحتها وقرروا يوقفن وياها يوم العرس)
    (ووصل اليوم المنتظر والكل مب سايعتنه الدنيا من الفرحة...أخيرا بيلتم شمل بوشهاب على نورة اللي كان يحبها من سنين ومحد حاس فيه غير اخته وديمة....وعلى طاري وديمة كانت ماشاء الله عليها قمر وكل الحريم يسئلن عنها...وكل شوي تسير عمة وديمة صوبها تقولا قري فمكان واحد...ماكانت تبا الحريم يشوفونها ويخطبونها لنها كانت تباها حق ولدها سعيد....وديمة كانت تضحك على رمسة عمتا لنها تعرف هدفها بس عمرها ماحطت فبالها ان هالشي ممكن يصير وخاصة لنها تعرف ان سعيد لايمكن يفكر فيها لنه تفكيره غربي زيادة عن اللزوم وع قولته يبا ياخذ أجنبية لوووول....دخلت العروس وطلت نورة بنورها والكل منبهر بجمالها بس بعد الحريم كانوا يطالعون وديمة لنها كانت تساعد نورة تركب ع الكوشة.....ماوحالها نورة يلست ع الكوشة الا يتصل أحمد فوديمة يقولا انه يبا يدش وتهزبه وديمة وتقوله يتريا لنهم يبون يتصورون وياها....وتم أحمد كل شوية يدق ويهددها انه بيروح اذا ماخلوه يدخل هههههههههه....فالنهاية رضخوله ودخلوه وهو عيونه تسبق خطواته لنورة....ماصدق أحمد انها بتكون خلاص مرته....اسرته بجمالها اللي زاد جمال هاذيج الليلة....دش بومنصور وخليفة وي أحمد....ونشت وديمة وسحبت امها وشما عشان يتصورون صورة جماعية وي المعاريس....يلسوا المعاريس شوي وشربوا عصير عقب نشوا بيروحون وأحمد ونورة سلموا ع الاهل ودموع الفرح مختلطة مع دموع الفراق لنهم مب هاين عليهم عيالهم اللي أمس كانوا يلعبون جدام عيونهم أحين كبروا وعرسوا وبيطلعون عنهم....وديمة لوت على أحمد فترة طويلة وهي تصيح جان يقولا أحمد احين تصيحين مب انتي اللي كنتي تبين الفكة مني؟! جان تضحك وديمة وتخليه يروح.....المعاريس ساروا الفندق لنه بالباجر سفرهم وباقي الاهل ردوا بيوتهم يرتاحون....وديمة دشت حجرتا وبعدا دموعا ع خدا لنها ماتتخيل البيت بدون أحمد بس اللي مصبرنها انه يوم بيرد بيسكن عندهم فالبيت بانيله برع مثل ملحق لين مايبني بيته الخاص....طاحت وديمة بترقد وهي تتذكر أحداث اليوم وتضحك ع سوالف ريم والدماني يوم يقولون لها مابتبدل بنت خالج بنيلس مكانا نبا نعرس لوووول....ع قولت ريم انا بنحرف اذا ماعرست لين 2007 ههههههههه.....رقدت وديمة من التعب وهي معزمة الصبح تنش من وقت عشان تدق حق أحمد وتسلم عليه قبل مايركب الطيارة...بس للأسف من التعب راحت عليها نومة لين الظهر ويوم نشت شافت الساعة وعرفت ان مافي فايدة هم اكيد احين فالجو....اكتفت وديمة انها تدعيلهم الله يوفقهم ويهنيهم......مرت الايام سريعة وطاف شهر عسل أحمد ونورة وقريب يردون البلاد وقوم وديمة مشغولين بترتيب بيتم الصغير اللي ساهمت نورة فاختيار اثاثه وديكوراته....وأم منصور كانت معزمة تسوي عزيمة كبيرة أول مايوصل ولدها تعزم فيه الفريج كله لوووول....وعقب يومين وصل أحمد والكل كان مرتبش ومستانس به وبعروسته......كان أحمد راد مورد وباينة عليه السعادة وحتى نورة بس وديمة أكيد بتلاحظ التغير فاخوها أكثر.....حبت أم منصور تخلي المعاريس يرتاحون ويخلونهم بروحهم فسحبت بناتها غصب وحتى خوات نورة ولا هن كانن بييلسن يسولفن وي نورة عن سوالف العرس لوووول....وخبرتهم ام منصور ان باجر شي عشا على سلامتهم)
    (تزهب كل اللي فالبيت حق العزيمة وطبعا أكيد ريم والدماني معزومات لوووول ماتستغني عنهن وديمة ففحرها وحزنها وياها)












  2. #12
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    ريم:امي يلا بنتحير ع العرب
    ام هزاع:انزين بلاج مستعيلة خليني اتدخن بعدم العرب بيصلون العشا عقب بيسيرون
    هزاع:انا ييييييييييييت
    ريم:الله يابك شوف امي بتأخرنا وبتلومنا فالناس
    هزاع:عيب ريمووو لا تقولين حق ام هزاع جذه
    ام هزاع:فديت اولدي انا..تعلمي من اخوج الذرابة
    ريم: إن شاء الله بس عقب مانرد
    هزاع:ههههههههههههه وتنكتين بعد حضرتج...يلا انزين جدامي ع السيارة
    ريم:بتسير انته؟
    هزاع:لا والله عزيمة عشان عرس ربيعي وماسير! يلا اشوف انقفضي
    ريم:انزين انزين...امي نحن بنتجدمج
    (ويركبون ريم وهزاع السيارة ويتريون امهم)
    هزاع:الريم بتخبرج شحال ربيعتج اللي يتنا المزرعة هاك اليوم؟
    ريم:منو؟وديمة؟زينة الحمدلله
    هزاع:لا هب وديمة الثانية
    ريم:اي ثانية؟
    هزاع:ريمووو لا تستهبلين هاذيج الطويلة اللي سوت الحليب هاك اليوم
    ريم:هيييييييييييييه الدماني ذكرتها
    هزاع:ايوه هي...اسمها حلو والله
    ريم:هزاع عيب
    هزاع:الا هي بنت منو؟
    ريم:بنت سلطان السويدي
    هزاع:سلطان السويدي...ايواااا اخت جسوم يعني
    ريم:هيه عليييييك لمبة محروووقة عندها اخو اسمه جاسم
    (هزاع يقول فخاطره ادري بس استهبل عليج)
    هزاع:انزين ريم شو رايج فيها؟
    ريم:مافهمت من اي ناحية مثلا؟
    هزاع:شو اي ناحية بعد اطري بشكل عام تصلحلي؟ احم احم (ويعدل غترته)
    ريم:ههههههههههههه قال تصلحلي قال...اسكت اسكت احين انته تبا تعرس؟
    هزاع:ليش لأ اكو احمدو ربيعي عرس ومايندرابه جان مااستوى ابو بعد...الايام تركض يختي ومابقى من العمر كثر مابقى
    ريم:ههههههههه اللي يسمعك ترمس يقول شيبة عمره 60 سنة....اذا صدق معزم انا بخلي وديمة ترمسا
    هزاع:اممممم فكرة حلوة خلي وديمة تجس النبض لين مانرمس امايه
    ريم:اوكي
    (وتركب امهم ويسيرون صوب بيت وديمة....دشوا البيت وسلموا على بعض وتمن البنات يسولفن ولأول مرة ريم تبحلق فالدماني وتتدقق فملامحها حتى الدماني استغربت هاي ليش تطالعني جذه وتنغز وديمة اللي بعد لاحظت هالشي بس طنشت قالت يمكن لنه الدماني متعدلة اليوم....كانت وديمة سايرة صوب المطبخ تطالع البشاكير وتتطمن ع العشا جان تنش وراها ريم واستغربت الدماني من هالحركة بس تمت يالسة مكانا قالت يمكن تبا تقولا شي ومستحية مني)
    ريم:ودووووم
    وديمة:هلا الريم خير بغيتي شي؟جان قلتيلي يوم نشيت ليش اتعبين عمرج وتين؟
    ريم:لا ابا ارمسج فموضوع
    وديمة:خير إن شاء الله قولي زيغتيني
    (وتخبرها ريم عن سالفة هزاع وانه حاط الدماني فباله من زمان ويبا يخطبا...وتباها ترمسها وتشوف رايها.....كانت وديمة مستانسة يوم ترمسها ريم لنها اخيرا بتفرح بربيعتها وتوأمها الروحي الدماني وهي كانت تدري ان الدماني مابترفض لنها انعجبت فهزاع وهو اصلا شاب زين وماينعاب....وعدت وديمة ريم انها بترمس الدماني وبترد عليها خبر فأقرب فرصة ممكنة.....عقب سارن البنات صوب الصالة عشان يخبرون الحريم ان العشا زاهب...ويوم وصلن صوب الدماني كانت محتشرة عليهن لنهم خلوها يالسة وصط الحريم بروحا....وديمة وريم ماردن عليها الا بابتسامة مافهمت الدماني مغزاها.....تعشوا المعازيم وباركوا لام منصور....وكلن سار بيته بس وديمة ماخلت الدماني تروح واستأذنت من ام راشد"ام الدماني"تخليها شوي عندها وتحججت انها تبا تراويها اغراض شارتنهم وعقب بتروحها وي الدريول......استغربت الدماني من تصرف وديمة لنها ماقالت لها شي عن هالاغراض من الصبح.....المهم سحبت وديمة الدماني وياها صوب حجرتها وصكت الباب عدل عشان محد يدش عليهم)
    الدماني:بلاج انتي قالصتني وراج جذه؟شو عندج؟
    وديمة:عندي لج خبر بمليووووون
    الدماني:مابا الخير ابا المليووون ههههههههه
    وديمة:خس الله ابليسج يادمووووه متى بتصطلبين انتي؟ارمسج جد انا شي موضوع مهم لازم آخذ رايج فيه؟
    الدماني:شو انخطبتي من ورايه؟هههههههههه
    وديمة:لا وانتي الصادقة انتي اللي انخطبتي من ورايه هههههههههه
    الدماني:شووووو؟؟متى؟وكيف؟ومنو؟
    وديمة:ههههههههههه ماعندي غير اجابة وحدة لكل أسئلتج هاي.....هـــــزاع
    الدماني:هااااااااااااااااااااااااااااه!!!
    وديمة:هيه هزاع بلاج فجيتي حلجج!! مب هذا هزاع اللي سويتيله الحليب اكو قال لازم آخذا عشان تسويلي اياه كل يوم هههههههههه
    الدماني(تضرب وديمة):احين منو اللي تستهبل؟؟ارمسي جد شو السالفة انا لين احين هب مستوعبة؟!
    (وتخبرا وديمة كل الكلام اللي قالته ريم)
    الدماني(وهي مستحية):والله مادري شو اقولج يختي....انا مالي شور شوري عند أهلي
    وديمة:ياوييييييل حالي ع اللي يستحون....خلاص عيل نقول مبرووووك
    (وتنش وديمة تحب الدماني وتحضنا.....وعقب روحت الدماني وتتصل وديمة فريم على طوووول وتبشرا.....وريم الثانية ماصدقت حار بحار سارت صوب هزاع تخبره وعقب ساروا عند امها اللي طارت من الفرحة يوم خبروها.....وعقب كمن يوم دقت ام هزاع لام راشد ورمستها فالموضوع....ام راشد رحبتبم وحددت لهم موعد عشان ايونم البيت.....وصل اليوم المحدد وأهل ريم بيسيرون يخطبون الدماني رسمي....فوديمة قررت انها تسير من العصر تفازغ الدماني)
    وديمة:السلام عليكم
    حصة(أم الدماني):عليكم السلام والرحمه...هلا والله ببنيتي وديمة شحالج؟
    وديمة:يسرج حالي خالو...ومن صوبكم؟
    حصة:بخير يعلج الخير...مشكورة فديتج ع اليية مابننسى وقفتج هاذي
    وديمة:لا ياخالو لا تقولين جذه الدماني ختيه واللي بياخذها اخويه تراه اخو ريم وهي ختيه بعد
    حصة:الله يخليكم لبعض....سيريلها فحجرتا مادري بلاها ماتبا ترمس حد
    وديمة:ههههههههههههه ماعليج خالو ها الا دلع بنات...احيد شما ختيه يوم يو يخطبونا تمت تصرخ اونه ماتبا تظهر من الحجرة من الزيغة
    حصة:ههههههههههه الله يستر من بنتي عيل شو بتسوي
    (وتسير وديمة صوب حجرة الدماني....وكانت في حجرة في اول الممر بابها مفتوح جان توايج وديمة داخل الحجرة لنه ديكور الحجرة عيبا فقالت خليني ايلس اطالع يمكن احصلي افكار حلوة حق حجرتيه.....دشت وديمة الحجرة وهي مب عارفة حجرة منو بس قدرت تستنتج انها حجرة واحد من اخوان الدماني لنه ستايل الحجرة شبابي فقررت تظهر بسرعة قبل ماحد يشوفها وقبل ماتلف صوب الباب ولا حد يفلعها بالمخدة ع راسها!!! ويوم صدت ولا تلاقي اللي واقف عند الباب هو جاسم وهاي كانت حجرته!)
    جاسم:أنا آسف أتحراج الدماني
    وديمة:لا عادي انا اللي آسفة دشيت بدون استئذان(وتطلع بسرعة من الحجرة وتدش عند الدماني)
    (في هاذيج اللحظة كان جاسم يقول فخاطره لا تطلعين ابا اقولج اني احبج....بس للأسف وديمة ماعطته فرصة وطلعت.....ضحك جاسم ع الحركة اللي سواها واستحى فنفس الوقت بس توقع انه وديمة مابتقول للدماني لعدة أسباب من أهمها انها هي اللي داشة حجرته وان اليوم يوم الدماني وماتبا تشغلها بشي ثاني.....دشت وديمة عند الدماني وماحسستها بشي....باركت لها وحاولت تهديها لنها كانت متوترة وايد)
    وديمة:دموووه بسج دلع عاد...مب انتي أذتيني كل يوم تقوليلي ابا اعرس
    الدماني:الله يغربل ابليسج ياودوووم انا كنت اسولف وماهقيت السالفة تنجلب جد
    وديمة:ههههههههههه لا والله!! هاي سنة الحياة
    الدماني:مايخصني انا مابا خلاص غيرت راي
    وديمة:ههههههههههههه لا حرام عليج وهاك اللي مخشعتله قلبه شو يسوي؟!
    (تمن يضحك ويسوولفن شوي عشان يغيرن الجو...وعقب كل وحدة منهن خلصت تجهيزاتها وخاصة الدماني اللي ماتعدلت وايد لنها كانت تبا تفاجئ هزاع كل فترة بلوك يديد لين يوم العرس عشان يشوفها بأبهى حلة.....عقب صلاة المغرب دشت عليهم شيخة اخت الدماني تخبرهم ان الحريم وصلن ولازم ينزلون....نزلن البنات وسلمن ع الحريم وكانت الدماني خدودا بتنفجر من الحيا وريم ووديمة يضحكن عليها وهي محرجة عليهم ههههههههه......عقب رسموا الرياييل وياهم طارش من الميلس يقولم ان ابو الدماني وافق على هزاع وكلم استانسو....تعشوا العرب وعقب ترخصوا بيروحون....قبل ماتروح ريم صاصرت وديمة ان هزاع يبا يشوف الدماني....وهم يحاولون يقنعونها وهي مب طايعة لين مايا جاسم وسحبها لوووول....دخلت الدماني الميلس بخطوات متثاقلة ويلست على أول غنفة عند باب الميلس مرة ومنزلة راسها ومستحية)










  3. #13
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    الدماني:السلام عليكم
    هزاع:عليكم السلام والرحمه...شحالج الدماني؟
    الدماني:بخير
    هزاع:ليش يالسة بعيد انا ماعض والله هههههههه
    (حب هزاع يغير الجو شوي لنه حسبها زايغة)
    الدماني(وهي تضحك بصوت واطي):انته شحالك هزاع؟
    هزاع(يتنهد لنه سمع اسمه منها):احين استويت بخير
    جاسم:احم احم نحن هنا
    هزاع:لا بوحموود انته من متى هنه هههههههههههههه
    جاسم:من يوم مااكتشفت انك ماتعض هههههههههههههه
    هزاع:ماتيوز من سوالفك هاذي....المهم انا بترخص احين الوقت تأخر(وهو فخاطره يقول ابا اتم بس انته مخرب علييه لووووول)
    الدماني:حافظنك الله هزاع
    هزاع:تحملي على عمرج الدماني...اشوفج فالملجة ان شاء الله
    (ذابت الدماني من الحيا من طرا الملجة لووول)
    (عقب هاك اليوم الحافل بدن البنات يتزهبن حق ملجة الدماني اللي بتكون عقب كمن اسبوع...وفيوم كانت فيه وديمة فالسوق رن تيلفونها بس ماسمعته وعقب مرة ثانية يوم رن طلعته من الشنطة وماانتبهت انه رقم غريب فردت بسرعة وبدافشة...وطبعا من الحشرة المتصل ماقدر يسمع عدل جان يسكر وهي بعد طنشت الموضوع قالت اكيد مغلطين....وعقب شوي وصلها مسج وطبعا الرقم غريب فما دارت بال بس عيبا المسج قالت بتخزنه فالتيلفون وبتمسح المسج الأصلي.....مرت الايام وبعدها المسجات توصل لوديمة وهي محتارة منو هذا اللي يطرشلها مسجات حب وشوق ومب طايع يعرّف عن نفسه.....وفيوم كان فيه الوقت متأخر ووديمة توها بتحط راسها بترقد رن تيلفونها وكان المتصل هو نفسه راعي المسجات فقررت وديمة تهزبه وتوقفه عند حده وتهدده بواحد من اهلها)
    وديمة:نعم...انته ماتستحي اول شي تتصل قلنا غلطان وعقب مسج طوفناه بس كل يوم مسج مصختها عاد
    المتصل:ألـوو
    وديمة:اقولك لا تتصل مرة ثانية فاهم
    المتصل:وديمة
    وديمة(وهي منصدمة):منو انته؟
    المتصل:أنا جاسم
    (فهاللحظة حاولت وديمة تدور فراسها واحد من اهلها اسمه جاسم...سواء من قريب او من بعيد....لقت ولد عمها جاسم بس بعده فالابتدائية)
    وديمة:جاسم منو؟وشو تبا؟
    جاسم:انا جاسم سلطان اخو الدماني
    وديمة:شووو؟؟الدماني فيها شي؟؟
    جاسم:لا مافيها الا العافية...انا ياوديمة انا اللي فيني العوق
    وديمة:انا مب فاهمة شي لوسمحت اخويه اشرحلي انته ليش داق؟ومن وين يبت رقمي؟
    جاسم:بفهمج كل شي بس خليني ارتاح واقولج كلمة
    وديمة:خير؟
    جاسم:وديمة...أحبج
    (بهتت وديمة وماردت)
    جاسم:ألـــووو...ألــــووو وديمة دخيلج لا تسكرين
    وديمة:وياك...بس ماعرف شو اقول
    جاسم:لاتقولين شي...اسمعيني للآخر وعقب علقي ع كلامي
    وديمة:إن شاء الله
    جاسم:ياوديمة أنا أدري اني غلطان يوم دقيتلج وأعرف انج بنت حشيمة وماترضين بهالسوالف بس مالقيت حل ثاني جدامي....خفت أكلم الدماني تفهمني غلط وتظلمج عشان جذه قمت وخذت رقمج من تيلفونها بدون ماتدري وانا اصلا مانسيته من هاك اليوم فالمول يوم تدقلي الدماني من رقمج بس ماحطيته فبالي لني ماكنت أدري انج طول هالوقت البنت اللي كنت أدورها.....وديمة انتي مافارقتي خيالي من يوم الحادث وكنت بس اتمنى ألمح موتركم مرة ثانية فالمدينة الجامعية بس ماتخيلت انج قريبة مني طول الوقت ويوم عرفت منو تكونين ارتحت لني اخيرا عرفت البنت اللي انطبعت صورتها فعقلي من هاك اليوم....انتي ماتعرفين كيف أثرتي فييه سحرتيني بأسلوبج وبكلامج وماأنكر بجمالج ماشاء الله عليج واكتملت فرحتي يوم عرفت انج بنت هالناس الطيبين واللي اتشرف ان اخوانج يكونون خوال عيالي...ياوديمة انا ريال سيدة وماعندي لف ولا دوران انا اباج على سنة الله ورسوله واليوم اتصلت عشان اخليج تعرفين موقفي وانا على شو ناوي وانتي تقررين
    (لحظة صمت)
    جاسم:انا خلصت كلامي ترومين تعلقين...ولا رقدتي؟ههههههه
    وديمة:لا مارقدت بس صدق متفاجأة ومب عارفة بشو أرد عليك
    جاسم:هب مشكلة انا بعطيج فرصة تفكرين على راحتج ومتى ماتوصلتي لقرار خبريني حتى لو فمسج اذا ماتبين تدقين وانا احترم هالشي فيج
    وديمة:إن شاء الله بفكر وبرد عليك خبر
    جاسم:خلاص عيل مابطول عليج واسمحيلي مرة ثانية ع الازعاج واوعدج اللي صار اليوم مايطلع لمخلوق...انا اخاف عيلج ياوديمة وتهمني مصلحتج
    وديمة:مشكور يابومحمد هذا من طيب أصلك
    جاسم:تصبحين على خير
    وديمة:وانته من اهله
    جاسم:أحبج
    وديمة(وهي مستحية):فمان الله
    جاسم:فمان الكريم
    (سكرت وديمة وهي هب مصدقة اللي سمعته واللي صار...أخيييييرا ارتاح قلبها وطلع جاسم يعزها مثل ماتعزه ويحمل لها مشاعر مثلها ويمكن أكثر بعد....هاذيج الليلة ولا واحد فيهم قدر يرقد وخاصة جاسم خاف انه وديمة تفهم اللي سواه غلط وتكون نقطة ضده بدال ماتكون لصالحه لنه كان صريح وياها...بس فنفس الوقت فضّل انه يتريا ردها ومايتسرع فالحكم....وع الطرف الثاني وديمة مختلطة فقلبها مشاعر السعادة والزعل والاستغراب من اللي صار....وبدون ماتحس من التعب غمضت عيونها ورقدت...مر اسبوع على هالمكالمة وجاسم مشغول باله لنها ماردت عليه لين احين ونفس الشي وديمة خايفة من قرارها وبعدها تفكر....فنفس نهاية هالاسبوع كانت ملجة الدماني وكان ها واحد من اسباب تأخر قرارها لنها كانت مشغولة وياها.....ويا اليوم المنتظر....اليوم اللي بتصير ربيعتها الدماني على ذمة ريال....بدت وديمة تتزهب وسارت الصالون وي الدماني...ويوم ردوا نزلت بيتهم على طول عشان تتلبس عندهم مرة وحدة....وعقب صلاة العشا وصلوا الرياييل وياهم المطوع.....ومن عرفت الدماني انهم وصلوا وهي كل شوية سايرة ورادة ع الحمام هههههههه)
    وديمة:دموووه قري مكانج بلاج انتي بتعرسين ولا داخلة حرب؟!
    الدماني:انا اشهد انها حرب....بطني يعوررررني ودووووم
    وديمة:هههههههههههههه من تشوفين هزاع بيخوز عنج كل شي
    الدماني:ودوووم والله انج متفيجة احر ماعندي ابرد ماعندج
    (وتسمع حد يدق عليها الباب)
    الدماني:منووو بعد؟
    الطارق:انا جاسم يالدماني افتحي الباب يايب دفتر الملجة
    الدماني:واااابووووي
    وديمة:صبري صبري خليني ألبس شيلتي صدق استخفيتي
    جاسم:يلا الدماني سمي بسم الله ووقعي هنه ع هاي الصفحة واللي عقبها
    الدماني:هاااه شو؟وين اوقع؟ماروم ازخ القلم جسوووم(كانت تنتفض)
    جاسم:يلا عاد عن الدلع الريال يترياج عند الباب يبا يسمع موافقتج وانتي تقولين ماروم ايود القلم
    وديمة:يلا الدماني استهدي بالله ولا تخافين
    جاسم:يلا خلصينا ولا تراني بروح
    (وتضحك وديمة ع كلامه)
    الدماني:هيه اضحكي انتي....وين اوقع؟
    جاسم:هنه(يأشر لها بايده وهو يطالع وديمة بس ماانتبهتله لنها كانت تطالع الدماني)
    (وتوقع ع الصفحة الأولى وهي تنتفض)
    جاسم(يجلب ع الصفحة الثانية):وهنه بعد...وقعي نفس التوقيع عن يقولون مزورين ولا شي
    الدماني:شو بعد مايكفيكم صفحة حشا
    جاسم:انزين يلا احين تعالي ويايه خلي المطوع يسألج
    الدماني:مابنخلص نحن
    وديمة:ههههههههه والله انج حركات يالدماني طوفي يلا
    المطوع:يا الدماني بنت سلطان هل تقبلين هزاع بن خليفة زوجاً لكِ؟
    الدماني:نعم
    جاسم:مبروك يالدماني(ويحب راسها ويلوعي عليها)عقباااالنا (ويطالع وديمة ويبتسم)
    وديمة:مبروك غناتي(وتحاول ماتصيح جدام الدماني عشان تدريبها بتصيح وبيخترب مكياجها لوول)
    (وتدخل وديمة الدماني فالصالة وتيلسها عند الحريم لين مايدش هزاع ويلبسها الدبلة والطقم.....وعقب مادش ولبسها قرروا يخلونهم بروحهم شوي....فترخصت وديمة بالمرة تروح بيتهم لنه الوقت تأخر وامها بتروح....والدماني كانت شوية وبتصيح ماتباها تخليها بروحا هههههههههه....يلست الدماني وي ريلها وطبعا مستحية وساكتة وهو يرمسها وماترد عليه الا بكلمة او كلمتين بالكثير لووول وخبرها انه كان شايفنها من زمان من ايام العيد اللي طاف فالسنتر وعيبته بس يوم عرف انها اخت ربيعه تلوم خخخخخخ والدماني طبعا كانت مصدومة لنها تذكرت انها سبته يوم شافته يطالعها بس ماخبرته طبعا هههههههه....يوم تأخر الوقت ترخص هزاع وسلمت عليه وروح...هاذيج الليلة كانت فرحة وديمة بالدماني ماتنوصف واللي فرحها أكثر كلام جاسم ونظراته لها حست صدق انه يحبها....وقررت انها بالباجر تطرش له مسج تقوله انها موافقة)










  4. #14
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    نشت وديمة الصبح وتريقت وهي حاسة انه قلبها مقبوض بس ماتدري ليش)
    مريم(أم وديمة):وديمة تعالي شوي بغيتج فموضوع
    وديمة:خير يامي مستوي شي؟
    مريم:انتي بلاج كله مزيّغة مب مستوي شي بس انتي تعالي ويايه الحجرة
    وديمة:خير ياامي وهاذي الحجرة ودخلناها شو السالفة؟
    مريم:ياوديمة يابنتي البارحة ملجت ربيعتج الدماني وانتي تدرين ان هاي سنة الحياة والبنت لازم تسير بيت ريلها
    وديمة:هيه امي ادري بس شو الموضوع؟
    مريم:من فترة عمتج عيشة مرمستنا تبا تخطبج حق سعيد بس نحن شفناج مشغولة وي ربيعتج قلنا من تهدا الامور بنرمسج...ها شو قلتي يابنيتي؟
    وديمة:هاه!(مصدومة)...امي انتي تعرفين سعيد زين مابنتوالف انا وياه وفوق هذا هو شرات اخويه وماتخيله يكون زوج لي فيوم من الايام
    مريم:اكي نورة قالت نفس الكلام قبل بس عقب خذت أحمد
    وديمة:ياامي نورة وأحمد شي وانا وسعيد شي ثاني...نورة وأحمد لايقين على بعض وكل واحد فيهم يحب الثاني مب سعيد اللي مادري وين الله حاطنه عايش فدنيا غير الدنيا وتفكيره مب تفكير واحد صاحي
    مريم:عيب عليج تقول هالكلام على ولد عمتج....مهما كان الظفر مايطلع من اللحم وانتي يوم بتاخذينه بتغيرينه
    وديمة:لا يمي مابا اجازف على حساب حياتي وسعادتي...يرضيج ياامي اني ماعيش مرتاحة باقي عمري؟يرضيج؟
    مريم:لا والله يابنتي مايرضيني بس.....
    وديمة:دخيلج ياامي رمسي ابويه انا مابا سعيد ماباه (وتطلع ودموعها فعيونها)
    (رق قلب مريم على بنتها الصغيرة....على وديمة شيخة البنات....وديمة اللي الكل يتمناها لولده....وقررت انها ترمس بومنصور وتحاول تتهرب من الموضوع وتتحجج بدراسة البنية.....المسا يوم رد بومنصور خبرته ام منصور باللي استوى بس هو مارد عليها بالنفي أو بالايجاب تم ساكت ويفكر وها اللي خوّف ام منصور أكثر....خافت من الهدوء اللي يسبق العاصفة....عقب 3 ايام من السالفة كان يالس بومنصور وي وديمة فالصالة وصدفت انهم كانوا بروحم)
    بومنصور:وديمة يابنتي ابا ارمسج فموضوع سعيد
    وديمة:يابويه انا قلت حق امي راي ودخيلك لا تجبرني ع شي انا ماباه
    بومنصور:يعني اذا غصبتج بترضين؟
    وديمة:انته ابويه وكلمتك ماتنزل الارض وان غصبتني لا حول لي ولا قوة وطاعتك واجبة بس خلك متأكد اني مابكون مرتاحة فحياتي
    بومنصور:تهمني راحتج يدو وديمة....واذا كان على ولد عمتج تراني رديته من ثاني يوم عرفت فيه رايج صح عمتج شلت فخاطرا شوية بس ماعليج وي الايام بتنسى...بس انتي لا تزعلين واهم شي عندي سعادتج يابنتي وانا ماغصبت اختج شما على الزواج عشان اي واغضبج انتي
    وديمة:فديتك يابويه هذا العشم والله وانا قلت بومنصور ماتهون عليه دلوعته
    بومنصور:المشكلة انج كاشفتني ههههههه(ويلوي عليها)
    (عدت سالفة ولد عمة وديمة على خير وهي حاطة ايدها ع قلبها وخايفة عن يصير شي يديد يبعدها عن جاسم....صح كانت مقررة تطرشله مسج فنفس اليوم بس قالت هب حلوة فحقي امسات رادين ولد عمتيه واليوم ياي واحد ثاني يخطبني...أأجل الموضوع أحسن....وهي ماتدري كل ماتأخرت جاسم تحترق أعصابه أكثر وأكثر لين ماخلاص وصل حده وماقدر يتحمل أكثر فقرر انه يرمس الدماني....خبر جاسم الدماني انه يبا يكمّل نص دينه ويخطب وديمة....بس ماخبرها بالتفاصيل يعني مجرد انه يسمع عن هالبنت كل خير ووده تكون شريكة حياته....استانست الدماني وخصوصا انه هذا اللي كانت تباه يصير من زمان...رفيقة دربها ماتكون مجرد صديقة بس....كانت تبا علاقتها فوديمة تتوطد أكثر وتصير فرد من العايلة.....والدماني ماجذبت خبر على طول رمست وديمة....وديمة كانت مصدومة كيف يقبل جاسم على هالخطوة بدون مايعطيها خبر وخاصة انه اتصل وكان يطرش مسجات....بس عذرته لنها تأخرت عليه وايد بردها سواء بالايجاب او السلب....اعتذرت وديمة من الدماني لنه الموضوع مب وقته وخاصة انه سالفة ولد عمتها مستوية قريب فمب حلوة فحق أهلها....فاقترحت وديمة يأجلون الموضوع لين عقب عرس الدماني....رمست الدماني جاسم وأمها بالموضوع اللي طبعا رحبوا بالفكرة وقالوا عقب العرس على طول بيسيرون يخطبون وديمة رسمي)
    (مرت الأيام ودخل الصيف وقرب عرس الدماني اللي كانت متلعوزة مب عارفة كيف تخلص اغراضها كل يوم تتذكر انه في شي ناقص لووول آخر شي طفروا منها خواتها وحتى وديمة خخخخخخخخ....فصلت وديمة فستان مميز لعرس اختها وتوأم روحها الدماني وبعد عشان المعرس اخو ريم اللي وايد تعزها....فستانها كان تركواز اللي هو لونها المفضل مدخل فيه اللون البني وكانت مقررة تسوي مكياج وتسريحة خفيفة لنها تحب تطلع بسيطة وعلى طبيعتها)
    (اليوم عرس الدماني والبنات مرتبشات وااااايد....والدماني كعادتها تنتفض ومتوترة وكل شوي تقولم لازم يعني انزل؟!مايستوي وحدة منكن تنزل بدالي وانا أروّح بيتنا؟!هههههههههههههه والبنات يردن عليها انه للأسف هزاع شايفنها ومايقدرون يغشونه لوووول......وصلت ساعة الصفر ولازم الدماني تنزل القاعة.....عقب دز وضرابة نزلت الدماني وبدت تمشي فالقاعة جنها أميرة من أميرات قصص ألف ليلة وليلة....الكل كان مبهور فيها.....جمالها كان هادي وفستانها كان راقي وبسيط وحتى المسكة كانت وردة وحدة بس عودة ولونها أحمر ع الخمري.....خوات الدماني ووديمة ماقصرن ساعدنها لين ماوصلت الكوشة....وتصورن وياها للذكرى.....في العرس أم الدماني كانت فرحانة ببنتها ووديمة مرت ولدها المستقبلية لووول كانت تقول لكل الأهل ان هاي البنية اللي بيخطبونها لجاسم....البعض هلل وفرح والبعض تغيّض منها....وخصوصا بنات خالات الدماني!!!)
    (وصل هزاع واللي شرط عليهم انه اي وياخذ مرته على طول وماييلس ومايبا يقص لا كيك ولا هالخرابيط...مستعيل الريال هههههههههههههه...بس الحركة كانت حلوة انه يا وشلها بصراحة رومنسية وايد خخخخخخخخ....خلص العرس على خير وعلى قد ماكانت وديمة فرحانة على قد مازعلت على فراق اختها الدماني والشعور متبادل عند الدماني....ساروا المعاريس استراليا يقضون أحلى شهر عسل في أحلى الشواطي اللي يقولون انها piece of heaven لووول)










  5. #15
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    (مروا 3 شهور على زواج الدماني وعلاقتها مع وديمة ماتغيرت مع اكيد مراعاة ظروفها يوم يكون ريلها موجود فالبيت....واحين يا دور أهل وديمة يفرحون بها.....وقررت ام الدماني ترمس ام وديمة عشان تحددلهم موعد ايون يخطبون بنتهم....وبالفعل تحدد الخميس يكون اليوم المشهود لخطبة وديمة لجاسم....وبومنصور رحّب فيهم أكبر ترحيب لنهم ناس والنعم فيهم ومابيحصل حد أحسن من جاسم يأمن على بنته ومستقبلها وياه خصوصا انه شاب ديّن وخلوق وفوق هذا مكافح وتحمل مسؤولية نفسه من خلص ثنوية.....عقب مايت الموافقة من بومنصور ووديمة طبعا طلب جاسم من أحمد انه يشوف وديمة)
    أحمد:وديمة تعالي جاسم يبا يشوفج
    وديمة:السموحة منك ومنه بوشهاب بس مب سايرة
    أحمد:شو مب سايرة لا تلوميني فالريال
    وديمة:هب قصدي ياخويه...بس قوله بيشوفني يوم الملجة مرة وحدة
    أحمد:على هواج تفاهمي وياه عقب
    (وسار أحمد خبر جاسم باللي قالته وديمة....هو صح تغيّض من تصرفها بس بعد كبرت فعينه.....تم جاسم يتريا يوم الملجة اللي تحدد يكون عقب شهر عشان ظروف دراسة وديمة والعرس بيكون فالصيف الياي إن شاء الله.....وحتى عيون وديمة كانت مشتاقة لشوفت جاسم بس كانت تكابر وتتظاهر ان الموضوع عادي بالنسبة لها)
    (اليوم ملجة وديمة وجاسم...ونفس أحداث ملجة الدماني تكررت مرة ثانية وتمت الدماني تتطنز عليها وتذكرها بكلامها يوم كانت تحاول وديمة تهديها....مرت اللحظات سريعة واعلنوا انه وديمة صارت على ذمة جاسم والكل كان مب مصدق دلوعة بومنصور خلاص كبرت وبتعرس وبتظهر من البيت وخاصة يدتها موزة اللي دمعتها مافارقتها وحتى خلووووف اللي دوم يتناجر وياها ماهانت عليه اخته وكان يقولا لا تطلعين من البيت هاتي ريلج واسكنوا هنه وبعطيكم حجرتي لو تبون.....يوم دخل جاسم كانت السعادة باينة عليه ويوم وقف حذالها همس فاذنيها حرام عليج تحرميني شوفتج بس احين خلاص محد يروم يمنعني....ابتسمت وديمة بحيا وردت عليه بنشوف....لووووول....وكل ماحاولوا الناس يتسحبون عشان يخلونهم بروحم خلوف كان واقفلم مثل العظم فالمصرط يالس مكانه وهب طايع يتحرك وجاسم عيز وهو يحاول يحوشه بس ماشي فايدة ووديمة مستانسة انه خليفة يالس هههههههههه يوم شاف جاسم انه الوقت تأخر ومافي فايدة ترخص عشان يروح.....انقضت هالليلة على خير بس جاسم ماقدر يتريا عقب ماظهر من عند وديمة بساعتين دقلا لنه كان متأكد انها مابتروم ترقد شراته....بس وديمة حبت تلعب بأعصابه أكثر وماردت عليه خخخخخخ.....ثاني يوم يو ربيعات وديمة يباركون لها ع الملجة وبعد وديمة ارتبشت وانشغلت وياهم وما رامت ترد على مكالمات جاسم اللي صدق عصب وقرر يمرهم البيت....اتصل جاسم على رقم البيت جان ترد عليه شما)
    جاسم:السلام عليكم
    شما:عليكم السلام والرحمه
    جاسم:وين وديمة؟
    شما:منو يباها؟
    جاسم:انا جاسم
    شما:حيا الله بو محمد...شحالك؟وياك شما خالت عيالك
    جاسم:هلا والله ام عبدالله...الله يحييج ويبجيج...يسرج حالي..ومن صوبكم؟
    شما:سهالة الله...جي ماتدق حق وديمة ع موبايلا ولا ماتعرف رقما؟
    جاسم:امبلا ادقلا من البارحة ماتشله قلت ماشي غير اني اي واشوفلي حل وياها
    شما:هههههههههههه اونا تتغلى اختي...لحظة بزقرا
    (وتسير شما وتزقر وديمة اللي بعد ماطاعت ترمس جاسم وتعذرت بربيعاتا)
    شما:السموحة بومحمد وديمة عندا بنات احينه وماتروم ترمسك
    جاسم:خلاص هب مشكلة خبريها اني برد ادقلا فليل...مع السلامة
    شما:إن شاء الله...فمان الله
    (حرّج جاسم من حركة وديمة بس قال فخاطره انا احبها وماروم ازعل عليها....وطاف الوقت واستوت الساعة 11 وقرر جاسم يرد يتصل.....كان التيلفون بعيد عن وديمة فتم يرن فترة بس جاسم مايأس وماسكر لين ماردت وديمة)
    وديمة:ألـــوو
    جاسم:السلام عليكم
    وديمة:عليكم السلام والرحمه
    جاسم:مابغيتي تردين
    وديمة(وهي ميودة عمرا ماتبا تضحك):السموحة منك انشغلت شوية
    جاسم:شوية!!! حرام عليج...انتي مرتي احين خلالالاص
    وديمة:ليش تحسسني جنك اشتريتني هههههههههه
    جاسم:كيفي انتي حلالي
    وديمة:انزين انزين خلاص لا تعصب
    جاسم:المهم شحالج انتي؟كنتي تخبلين فالملجة بس لو مب خلووف هالدب
    وديمة:هههههههههههه لو سمحت لا تغلط على اخويه
    جاسم:والنعم فيه وفاخته بعد بس ماخلانا ناخذ راحتنا
    وديمة:شو تباه يسوي مثلا يوم انك بتاخذ عنه اخته
    جاسم:انزين ماعليه بنشوف باجر يوم بتدخلين بيتي منو يروم ييلس ويانا
    وديمة:ههههههههههههه تهديد هذا!!...انزين حبيبي انا لازم اسير ارقد احين
    جاسم:هاه!! شو قلتي؟
    وديمة:لازم اسير ارقد
    جاسم:لالا قبلها
    وديمة:تهديد!
    جاسم:وديمة عن الاستهبال فاهمة قصدي...ورفجة تعيدين الكلمة
    وديمة:ههههههههه....احم احم....حبيبي
    جاسم:الللللللللللللللللللللله أول مرة أعرف انه لهاي الحروف نغمة حلوة وخاصة منج
    وديمة:اوه اوه وقمت تقول كلام حلو بعد! أكيد دمووه كاتبتلك هالكلام على ورقة وانته تقرا منها
    جاسم:ههههههههههههههه حللووووة بس لا تعيدينها
    وديمة:هههههههههههه...إن شاء الله بس ممكن تخليني احين اسير ارقد ورايه جامعة باجر
    جاسم:اوكي غناتي...تصبحين على خير وتحملي على عمرج
    وديمة:وانته من اهله...فمان الله
    (مرت الأيام وتعلق كل واحد بالثاني أكثر وكان جاسم يتعمد يستغل اي فرصة يسمع فيها صوت وديمة أو يشوفها حتى يوم الدماني ترمسها في التيلفون ويكون هو موجود ييلس يرمس ويغني وطبعا وديمة تعرف انها هي المقصودة....كبرت فرحتهم يوم ياهم خبر انه الدماني حامل....بس احلفت حق وديمة وجاسم مايعرسون الا عقب ماتربي لنه مافيها تفصل فستان وهي حامل عقب تعقه لووول....وفيوم رن تيلفون وديمة وكان رقم غريب)
    وديمة:ألـوو
    المتصلة:السلام عليكم
    وديمة:عليكم السلام والرحمه...منو الاخت؟
    المتصلة:وياج هيفا بنت خالة الدماني او بالأحرى ريلج جاسم
    وديمة(ماعيبتا لهجة هيفا فالكلام بس طوفتها):هلا والله...شحالج هيفا؟وشحال الاهل؟
    هيفا:كلم بخير ونعمة ويسلمون عليج....وديمة بغيتج في موضوع
    وديمة:خير؟تفضلي أسمعج
    هيفا:وديمة انتي شكلج بنت زينة وحبوبة وحرام تتغربلين فحياتج
    وديمة:مافهمت شو تقصدين؟وليش اتغربل فحياتي؟
    هيفا:انا أبا أنصحج...جاسم مايناسبج والناس غشوج يوم مدحولج اياه....تراه راعي بنات والله يستر من الخافي
    وديمة:انتي شو تقولين؟وشو هالكلام!
    هيفا:صدقيني بيعذبج...يمكن ماتعرفين انه ملج على كمن بنية وكل وحدة ماقدرت تكمل وياه وطلقها وطبعا الدماني مابتذم اخوها جدامج
    وديمة:انتي ليش تقوليلي هالكلام! وشو اللي يجبرني اصدقج يعني! لو سمحتي لا تدقين لي مرة ثانية(وتسكر في ويها)
    (كانت وديمة حايرة تصدق ولا لأ وليش هالبنت تنصحها اصلا!! وهل تتبلا على جاسم؟! بس شو مصلحتها؟!....تمت وديمة على هالحالة فترة طويلة حتى جاسم بدا يلاحظ انها قامت تتهرب منه وماترمسه شرات قبل وكل مايفتح وياها موضوع الزواج تقوله نأجله وتتحجج بالدراسة....كان جاسم وايد متضايج ومب عارف لمنو يشتكي فما لقى غير الدماني يسير يرمسها يمكن تقدر تساعده)










  6. #16
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    يتصل جاسم فالدماني)
    جاسم:السلام عليكم
    الدماني:عليكم السلالالالام والرحمه هلا والله بالعمرس
    جاسم:أي معرس الله يخليج شكلها ربيعتج خلاص ماتبانا
    الدماني:افااا ليش؟ حد مايبا هالحلو
    جاسم:شفتي عاد....(ويخبرها انه وديمة متغيرة عليه)
    الدماني:لا تحاتي يابومحمد أنا برمسا وبشوف شو الموضوع
    جاسم:لا اخاف تزعل او تتضايج
    الدماني:وديمة ختيه وانا اعرفا عدل لا تشيل هم
    جاسم:اوكي...الله يوفقج
    الدماني:جي داشة امتحان انا!
    جاسم:انتي بتستوين ام عيال وبعدج على خبالج الله يعين ريلج عليج
    الدماني:لو سمحت انا وريلي نتفاهم كيفنا ههههههههههه...يلا بدق حق وديمة....باي
    جاسم:بايات
    (وتتصل الدماني في وديمة)
    وديمة:هلا والله ام سلطان
    الدماني:المهلي مايولي...لا بعدنا ندور اسم ثاني مايركب سلطان هزاع!
    وديمة:هههههههه الله يسهّل عليج وتقومين بالسلامة والبيبي يكون بصحة وعافية ها اهم شي
    الدماني:صدقج والله انا وايد تعبانة هالايام اتريا متى اربي...وديمة
    وديمة:لبيه
    الدماني:شو اللي بينج وبين جاسم؟
    وديمة(ارتبكت):كل خير...ليش تسئلين؟
    الدماني:جاسم متضايج وايد يقول انج تغيرتي عليه
    وديمة:لا فديتج ماتغيرت عليه بس انا فعلا مشغولة وي امتحاناتي والـsenior project
    الدماني:الله يوفقج بس لا تحاولين تقنعيني انه هذا هو السبب
    (وتمت الدماني ورا وديمة لين ماخلتها ترمس وخبرتها سالفة...وكانت الدماني منصدمة من كلام وديمة ومب متصورة بنت خالتها تسوي اللي سوته)
    الدماني:وديمة انتي متأكدة انها هيفا؟
    وديمة:هي قالت لي ولا تتحريني اتبلى عليها! انا البنت هاي ماذكر شكلها حتى
    الدماني:لا ياوديمة ماتوقعتج تشكين فييه مهما كان انتي شرات اختي وماارضى عليج...وهاي تتبلى عليج عشان تبعدج عن جاسم ترا خالاتي من زمان يحنن على اميه تقنع جاسم ياخذ وحدة من بناتن...اخويه جاسم مب راعي هالسوالف ولا عمره خطب وحدة قبلج لنج انتي الوحيدة اللي ملكتي قلبه وعقله
    وديمة:فديتج يالدماني مادري شو اقولج بس الشيطان لعب بي
    الدماني:يحق لج يختي هاي عشرة عمر والواحد لازم يكون مطمن للشخص اللي بيعيش وياه وعن هيفو انا بتصرف وياها بس اتمنى تتصلين فجاسم وجنه مااستوى شي
    وديمة:اكيد اصلا مب مفكرة اخبره السالفة حتى
    الدماني:والنعم فيج ودوووم....يلا اباكم فهالمكالمة تحددون موعد العرس بس هااااا عقب ماربي
    وديمة:هههههههههه مسوية حسابي انا....ماباقلج شي هذا شهرج اصلا
    الدماني:هيه والله ادعيلي يختي
    وديمة:الله يسهل عليج وتيبيلنا وديمة صغيرة
    الدماني:لا واااابوي بجني عليها ههههههههههه
    وديمة:انزين ماعليه....اخوج وعندج خلاص ماباه ههههههههههههههه
    الدماني:تروووومييييين ههههههههههه
    (انصلحت الأمور بين بين وديمة وجاسم عقب هاك اليوم واتفقوا على موعد العرس اللي بيكون فعيد ميلاد جاسم 10/10 والدماني ربت شهر 8 ويابت ولد سمته هادف ومن احين محيّر حق بنت وديمة وجاسم اللي بعدها مايت لوووول....بدت التجهيزات والاحتفالات بعرس وديمة وجاسم.....وبومنصور كان طاير من الفرحة بس فنفس الوقت ماهانت عليه وديمة وماكان يباها تظهر من البيت عشان جذه ساعدهم ياخذون بيت قريب من بيته....الحين ماباقي ع العرس الا 3 ايام وطبعا وديمة ماشافت ولا رمست جاسم من شهر تقريبا على قولتها عشان نشتاق لبعض أكثر خخخخخخ....بومنصور ومن فرحته ببنته حب انه يحتفل بها مثل ماسوى وي شما....ياب يويلة يرزفون جدام بيتم وعتوقة ومعلاية لووول طبعا على مدار الـ3 ايام لين ماوصل يوم العرس....اليوم اللي كانت فيه الساعات تمر كالدقايق والدقايق كالثواني....ووديمة مب مصدقة انها اخيرا بتجتمع وي جاسم عقب كل مرحلة الصراع اللي مرت فيها عشان تحافظ على علاقتهم....تمكيجت وديمة عند هستي اللي زادها جمال على جمالها.....ولبست فستانها اللي كان من تصميم وليد عطاالله.....كان فستان من فساتين الأميرات اللي نشوفهم في الأفلام ونسمع ونقرا عنهم في القصص....والمسكة كانت رقيقة وطويلة شوي وجنها شنطة معلقتنها في ايديها....يا الوقت اللي لازم تخطي فيه وديمة خطواتها على الكوشة....كانت خايفة ومرتبكة بس ماحبت تبين لحد أو تخرب فرحتها....فقامت تبتسم بحيا للناس اللي كانوا مبهورين بها....دشت وديمة على زفة غناها لها جاسم بنفسه فكانت هاي مفاجأته لها.....فرحن البنات بوديمة ورقصن وتصورن وياها لين ماخبروهم انه جاسم بيدخل.....دخل جاسم وي منصور وأحمد وحمدان وخليفة اللي أصروا انهم يشوفون اختهم ويتصورون وياها....شربوا المعاريس العصير وقصوا الكيك وصار لازم يروحون.....طلعت وديمة وهي ميودة ايد جاسم وامها وشمة وريم والدماني وكل ربيعاتها يطالعونها والدموع تارسة عيونهم.....وبجذه دخلت وديمة حياة يديدة....حياة فكنف جاسم اللي يحبها أكثر من روحه)
    (عقب ماردوا جاسم وديمة من شهر العسل قرروا هزاع والدماني يزورونهم فبيتم....وكان هزاع وجاسم يدورون ع القناة الرياضية بيتابعون مباراة جان يطوفون على قناة نجوم الخليج)
    الدماني:جاسم خله
    جاسم:منو الكثيري؟ ماشاء الله عليه فنان هالولد
    وديمة:هيه فديته كيوت وايد
    الدماني:وديمة ماتذكرج بشي هالغنية؟
    وديمة:هيه تذكرني بالظروف اللي تلاقينا فيها انا وجاسم
    الدماني:وانا وهزاع ههههههههههههه
    جاسم&هزاع : آآآآآه وياحلاة التلاقي


    الــــــــــــــنـــــــــــــــهــــــــــــــــا يـــــــــــــــــــــة










  7. #17
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    اتمنى الكل يكتب رايه ف القصه حلوة ولا لا










  8. #18
    عضو فضي
    الصورة الرمزية ! منسيهـ!
    الحالة : ! منسيهـ! غير متواجد حالياً
    رقم العضوية : 40367
    تاريخ التسجيل : 15-08-09
    الدولة : الـإمـ .. ـآآرااتـ}..
    الوظيفة : طـُـأإأإألبـ .. ـة
    الجنـس : انثـى
    المشاركات : 440
    التقييم : 38
    Array
    MY SMS:

    حال قلبي ف العشق مثل من قال وصدق طول عمره ماتبخر ثم تبخر واحترق}ْ..........

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    حرااااااااااااام عليكم 82 مشاااهد ولا رد










  9. #19
    عضو فضي
    الصورة الرمزية سوسو$_$
    الحالة : سوسو$_$ غير متواجد حالياً
    رقم العضوية : 51971
    تاريخ التسجيل : 18-01-10
    الدولة : فوق القمر
    الوظيفة : اراضي الزعلان ّّ_ّ
    الجنـس : انثـى
    المشاركات : 220
    التقييم : 22
    Array
    MY SMS:

    ّ_ّيــــكـــفــــيـــنــي مــا فـــيـــنـــي ّّ هـــم وتـــعــــب وفـــــراااااق ....ّ_ّ

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    والله القصه رووووووووووووووعه ...
    تسلميييين دبوووه ع القصة الحلووو شرااتج






  10. #20
    عضو الماسي
    الصورة الرمزية عاشقة العشق
    الحالة : عاشقة العشق غير متواجد حالياً
    رقم العضوية : 42745
    تاريخ التسجيل : 08-10-09
    الدولة : الامارات العربية المتحدة
    الوظيفة : طآلبه ,
    الجنـس : انثـى
    المشاركات : 1,850
    التقييم : 200
    Array
    MY SMS:

    المحبة من الله , انت تحدد مكآنك !

    افتراضي رد: حلـــــــــــــاوة التلـــــــــــــــــاقي }ْ.... كـــــــــــاملة


    ثانكسسسسسسسسسسسسسس ما قصرتي نايس ^^






صفحة 2 من 3 الأولىالأولى 123 الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •