تنبيه :: عزيزي اذا واجهتك مشكلة في تصفح الموقع , فاننا ننصحك بترقيه متصفحك الى احدث اصدار أو استخدام متصفح فايرفوكس المجاني .. بالضغط هنا .. ثم اضغط على مستطيل الاخضر (تحميل مجاني) .
 
 
صفحة 28 من 43 الأولىالأولى ... 18232425262728293031323338 ... الأخيرةالأخيرة
النتائج 271 إلى 280 من 424
  1. #271
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    بعد يومين...
    -------------------------------------
    اليوم: الخميس..
    المكان: بيت سلطان...
    الوقت: الخامسة والنصف مساءا...
    ------------------------------------
    (ناصر)....

    كنت يالس في الصالة مع منى وفي ثباني شماس...
    ناصر: هالعيوز متى بتمشي ياناس...!!...بتخبلبي...
    مسكت شماس من ايدها وخليتها توقف على ريولها وهي مب قادره تتوازن..
    منى: عيااازه شماس من نوقفها قعدت ماتبا تمشي...
    ناصر: عنبوو..ماشاء الله هي احين بتكمل سنه... انتي يوم كبرها تمشين ...
    منى: هههههه فديتني انا نشيطه...
    قربت ويهي من شماس وانا اضحك لها...
    ناصر: ليش ماتسوين تاتا....؟!..
    ظحكت شماس وصفقت وهي تقول تاتا شراتي...لويت عليها وحبيتها...
    ناصر: فديييتج انا....
    ورديت قعدتها في ثباني...
    ناصر: شحالها بنت عمج؟
    تنهدت منى....
    منى: على حالها...
    ناصر: ماجنها طولت...شهرين مر عالحادث...
    منى: والله كلهم يقولون مساله وقت...
    ناصر: كيف علاقتها مع يوسف؟! .. ماعرفته هو بعد.؟!
    قالت منى بحزن..
    منى: مايتلاقون... بروحك تشوفه يوم يسير هناك يتم في الميلس... واذا بيدخل يسلم على يدوه دقيقه وبيطلع مول مايقعد عشان تشوفه وتذكره..
    عقدت حياتي..
    ناصر: ليش جي يسوي الغبي؟!
    منى: اون مايبا يشوفها دامها ماتذكر منو هو...
    ناصر: طاااالع...شدراها هي يوم محد خبرها...!!
    منى: صدقه ناصر... لو انا مكانه مابتحمل..
    ناصر: الله يعين...ورييلها ماتحسنت؟
    منى: بلى..عقوا عنها الجبس الاولي وحطولها واحد ثاني اخف...بس بعدها بعكاز...
    ناصر: وهذيج الخقاقه...سمعت انهم ردوا من شهر البصل...آآه اقصد يعني شهر العسل...
    منى: هههههههههههههه نوره؟!... هي ردوا...مستانسه يقولولي...احمد مدلعنها آخر دلع...
    ناصر: ماااااااااااالت عليه وعليها...ليش ماكملوا شهر...؟!
    منى: هممممم مادري يمكن احمد عنده شغل...
    ناصر: هههههههه الا قولي خلصت فلوسه وخسرته عشان جي ردها...
    منى: ههههههههههههههه والله انته...ايييه لا تقعد تتشمت..بنشوفها حرمتك شقا بتطلع...
    تذكرت سعاد وابتسمت..
    ناصر: فديت حرمتي انا...
    منى: اندوكم....يالوهقة... يتفداها وهي بعدها مايت....
    ناصر: هههههههه...اقول منى... لو كنت معرس وحرمتي حامل... شو تتوقعين اييب اول ولد والا بنت؟
    منى: هممممممممم ولد....
    اختفت ابتسامتي...
    ناصر: مالت عليج...
    منى: ههههههههه خلها تي اول هالحرمه وتحمل عقب بنشوف....ليش انته تباها بنت...؟!
    لويت على شماس اللي قاعده تلعب بتيلفوني وهي يالسه في ثباني...
    ناصر: هي...ابا بنت مثل شماس... فديت دلعها محلااه....!! تعالي وين اهلها؟!
    منى: توك سالت هههه... سايرين العين مول وشالين سلطان وياهم...وخلوا عندي شماس...
    ناصر: حمير ليش مايشلونها تلعب...!
    منى: شو عرفها هاذي باللعب....
    ناصر: المهم.... سمعت انكم قررتوا تجدمون الملجه....!!
    تنهدت منى..
    منى: هيي... راشد يبا يملج قبل العرس بشهر...
    ناصر: وانتي ماتبين؟!
    منى: مادري...زايغه.... اخاف هالملجه تخرب على علاقتنا عقب..
    ناصر: لا مابتخرب لا تخافين... راشد عاقل..وبترتاحين وياه ان شاء الله..
    منى: ان شاء الله....
    دخلت امي في هاللحظة ....ويلست معانا..
    ام محمد: اشوفكم قاعدين...
    ناصر: امبوني بسير....بس يوم شفت هالعيوز مارمت افجها...
    ام محمد: هههههههههههه الله يعطيك مثلها ان شاء الله....
    ناصر: آآآآآآآآآمين يا امايه....
    ام محمد: هااااه ناصر... اشوف خاطرك بلعيال...!!
    سكت انا شوي بعد ما ادبّست..
    ناصر: خاطري بلعيال مب بلحرمة...
    ام محمد: خل عنك انته هالرمسات... لين متى يعني تبا تصبرنا مانفرح فيك..
    ناصر: فرحوا بيوسف انزين...
    ام محمد: مانقدر احين ماشي مجال نفرح بيوسف... بنت عمه حالتها ماتسمح الحين انه نخطبها ... لين ماتتذكر هي كل شي ...عقب بتروم تاخذ قرارها بقناعه...احين لا..وبعدين مايصير نيوز الصغير والعود موجود...
    ناصر: هالعود هذا مايبا يعرس...
    منى: آآآآه..ناصر عطني شماس ببدل لها...
    عطيت شماس لمنى وانا احسدها انها قدرت تشرد قبل ماتبدا الحشره....لكن انا شو اللي بيشردني..!!
    ام محمد: هاااه شو قلت...انا محصلة عرب حشام مابنحصل اخير عنهم ...
    ناصر: قلت لا اله الا الله.... كم بعيد وبزيد في هالموضوع يامي...ماريد اعرس انا...
    ام محمد: عذرك الاولي انك ماتبغي نوره....نوره وعرست....احين شو عذرك...؟!..
    حمدت ربي لانه تيلفوني رن في هاللحظه...لانه ماعندي عذر مقنع اجاوب به امي...
    ناصر: لحظة امايه....
    شفت في الشاشه اسم عبد العزيز...
    ناصر: مرحبااا....
    عبد العزيز: هلا ناصر...شحالك؟
    ناصر: الحمد لله بخير....شحالك انته؟
    عبدالعزيز: بخير وسهاله...اقولك...انته في العين صح..
    ناصر: هي نعم يالس في البيت ....شو فالخاطر؟؟
    عبدالعزيز: اباك تي مستشفى الـ(.....).. فبوظبي.. الحين...
    تم قلبي يدق بخوف...وملامحي تجمدت...
    ناصر: شفيك شو صاير؟
    عبدالعزيز: حرمتك في حالة ولاده ياناصر....ختها عندها توها يايه بس لازم تكون انته بعد موجود...
    ناصر: شووووووووه..!!.. الحين..!!
    عبدالعزيز: انا مثلك مستغرب...تقولي الحرمه بعدها في الشهر الثامن...
    ناصر: الحين باييكم...




    عبدالعزيز: لا تسرع...
    ناصر: فمان الله...
    سكرت عن عبدالعزيز وانا كلي خووف...سعاد بتولد الحين؟!!... بس هي بعدها في الشهر الثامن.... وموعدها مب قبل شهر...!!...
    قمت بلا حاسيه من قعدتي لكن ماحسيت الا وبامي ماسكه ايدي وردت تسحبني عشان اقعد..
    ام محمد: وين ساير وانا ارمسك..!!!
    ناصر: امايه مضطر اروح....
    ام محمد: الا قووول شارد...دومك تشرد يوم افتح وياك هالموضوع لكن اليوم ابدا مابتقوم مني...
    اطالعت امي بقهر.... افهمي يا امايه انا مضطر اروح....!!!
    ناصر: امايه غير المره بنكمل الموضوع هذا اوعدج....
    ام محمد: لا ابدا.... انا تعبت منك ياناصر تعبت....ومافيني شدة اكلمك بهالموضوع مره ثانيه... اصلا نحن متى نشوفك غير في السنه حسنه...والايام تركظ ياناصر اخاف اموت قبل مافرح فيك...
    ناصر: امايه ليش تقولين هالكلام انتي احين هاااه...قتلج عقب بنرمس في هالموضوع...
    ام محمد: لا...الحين...
    ناصر: اوهووووو ماتفهمون الرمسه انا لازم اروح احين....
    قمت من قعدتي مره ثانيه ومشيت صوب الباب بعصبية.... سمعت صوت امي العالي يوصلني...
    ام محمد: والله يا ناصر وهذا انا حلفت...ان طلعت من هالباب قبل مانخلص رمستنا ياغضب عليك لين يوم القيامه...!!
    وقفت مكاني متجمد....ربطتني امي بحلفتها.... بس انا ابا اسير.... سعاد بحاجتي احين ولين ما اوصل هناك يبالي ساعه ونص...!!...
    التفت لامي بياس..
    ناصر: امايه...افهميني...عندي شي ظروري ابا اروح عشانه الله يخليج يامايه...
    ام محمد: انا حلفت.... مابتطلع الا يوم اخذ موافقتك...
    صرخت وانا افور من غيظي...ما اهتميت ساعتها هذي امي...ابوي.... اصغر عيالي اللي قاعد اصرخ عليه... ماكنت مهتم الا اني اطلع من هالباب واروح....!!
    ناصر: شوووو تاخذين موافقتي على شووووووو....!!
    ام محمد: بخطب لك...
    قلت بلا حاسية وانا بعدني اصارخ....
    ناصر: خطبي اللي تبينها ومن العرب اللي تبينهم.... قوليلي بس متى موعد العرس وبكون موجود...بس خليني اطلع يا امايه دخيلج....
    سكتت امي شوي وهي اطالع فويهي بعصبيية....
    ام محمد: خلاص برايك سير...
    ماصدقت على الله تطلع هالكلمه منها... برايك روح....
    طلعت من البيت وانا مب حاس بنفسي... ركبت السياره وشغلتها...حتى اني انتبهت ليوسف وهو يدخل بسيارته وينزل...شكله كان ياشر لي ويكلمني بس انا ما انتبهت زين له....
    طرت برا البيت.... مسكت خط بوظبي...وانا مب مهتم الا بحالة سعاد....
    يارب سهّل عليها يارب....!

    ----------------------

    نهايه الجزء الــ37 >> متأثره


    __________________








  2. #272
    عضو فضي
    الصورة الرمزية **الهاشمي**
    الحالة : **الهاشمي** غير متواجد حالياً
    رقم العضوية : 46834
    تاريخ التسجيل : 06-11-09
    الدولة : أرض الوطن
    الوظيفة : طالب جامعي
    الجنـس : ذكـر
    المشاركات : 269
    التقييم : 57
    Array
    MY SMS:

    اللهم صلي وسلم على سيدنا محمد... أستودعكم الله الذي لا تضيع ودائعه

    افتراضي رد: {مــوعد مـع الســعادهـ} قصه من الامارات روعه كامله


    جاري الأنتظار






  3. #273
    عضو جديد
    الصورة الرمزية мịṧṧ τйτ
    الحالة : мịṧṧ τйτ غير متواجد حالياً
    رقم العضوية : 51195
    تاريخ التسجيل : 10-01-10
    الدولة : el3in
    الوظيفة : student
    الجنـس : انثـى
    المشاركات : 7
    التقييم : 10
    Array
    MY SMS:

    ~\ وش لىي بنجمـ،،ــة سمىآآ عقبــ،ـكـ ..يىآ قمـ،ـر بالقلـ،ـب ضميىتـهــ \~

    افتراضي رد: {مــوعد مـع الســعادهـ} قصه من الامارات روعه كامله


    هلاآآ ... عيبتني القصـ،،ــهـ وآآيد
    ياليت لو تنزلين 3 أجزاء ورا بعض كل يوم << أدري بنتعبج ويآناآآآ وتسلمين غلاآيهـ






  4. #274
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    ان شاءالله بنزل هاليومين 5 اجزاء

    لان عندي امتحانات بعدها ومن عينوني






  5. #275
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    الجزء الثامـــــــــــــــن والثلاثون..
    ------------------------
    اليوم: الخميس..
    المكان: سيارة ناصر..
    الوقت: السادسة والنصف مساءا...
    ----------------------------------
    (ناصر)....


    كنت اسوق سيارتي بسرعه شبه جنونية.... مب حاس بنفسي... في نفسي مشاعر خوف وقلق اول مره احس بها بهالحجم....
    كنت خايف موووت على سعاد....
    كيف تكون في حالة ولاده احين؟...توها في الثامن..!!..
    تذكرت باسف كيف كنا نتفق اني لازم اكون موجود وقت ماتحس بالآلام....وانا وين كنت؟...عند امايه....اتكلم عن موضوع اتفه مايكون...!!
    ماعطيت موافقتي على الخطبه اهمية كبيره لاني حسيت من نظره امي الاخيره بانها عارفه اني وافقت بس عشان اطلع ومب عن اقتناع....اكيد رحمت حالي عشان جي قالت لي روح...
    والا ماظني تاخذ بالموافقه هذي...
    مااعتقد...
    واذا خذت بها.؟...امي حركات...شوبسوي؟...
    لالا ...بطمن على سعاد..ويوم تقوم بالسلامه برجع وبخبر امايه واهلي بكل شي...عشان افتك من موضوع الزواج هذا نهائيا....
    لاني مستحيل اخذ وحده على سعاد...
    سعاد ماقصرت فيني...بكون ظالم بهالطريقه....
    وانا اصلا ماريد خلاص..
    صرفت الموضوع عن ذهني وانا ازيد السرعه شوي...اففف متى بيخلص هالطريج وبوصل المستشفى...
    والقهر بعد ان بوظبي زحمه يعني بتاخر في شوارعها...
    فكرت اتصل....
    لكني ماحب اسمع الاخبار عن طريق التيلفون...دايما دايما توصلني اخبار شينه....عشان جي بتريا لين ما اوصل هناك....
    وان شاء الله كل شي عندهم بيكون بخير....
    حتى ان يوسف اتصلبي ثلاث مرات لكني مارديت عليه.....مب احين برد عليه عقب...يوم بطمن...بخبره..

    بعد نص ساعه وصلت المستشفى... اتصلت بعبدالعزيز حصلته مشغول..اتصلت بعلي..اكيد انه مع حرمته امل ياي هني...وفعلا حصلته موجود...
    خبرني بمكانهم وسرت لهم وانا جني اركض ما امشي...
    هناك حصلت علي وعبدالعزيز واقفين على جنب..ومن الصوب الثاني بعيد شوي حرمتين ثانيات...خمنت انهن امل وحرمه عبدالعزيز...
    عصبت..ليش مخلين سعاد روحها؟!!....ليش مادخلن معاها..!
    سرت صوب علي وعبدالعزيز....
    قلت لهم بلهفة...
    ناصر: هاااه....شو صار؟!
    علي: اذكر الله يا ناصر...
    ناصر: لا اله الا الله...علي شو صار خبرني لا تقطع قلبي...
    علي: ماصار شي.... الحرمه بعدها في العمليات....
    انصدمت....ليش عمليات؟!
    ناصر: عمليات؟!....ليش...ليش يسولها عملية؟!...
    نقلت انظاري بين ويه علي وعبدالعزيز..اتريا واحد منهم يرمس بس هم تلفتوا لبعض بتوتر...
    عبدالعزيز: انا بسير شوي وبرجع....
    راح عبد العزيز..وخمنت انه يبا يعطينا شويه خصوصيه...انا وعلي نسايب ونرمس بحرية...
    ناصر: شو صار علي ...لا تغبي عليه..
    تنهد علي وحط ايده على جتفي...
    علي: سعاد يا ناصر...طاحت بالحمام على ظهرها يوم كانت تنظفه...وطيحه مثل هذي..خطيره ..وهي اللي خلتها تقدم موعد الولاده....حالتها شوي..تقول امل..انها متعسره...فلازم لازم قيصرية...والا يمكن اللي فبطنها يروح فيها..!

    يلست انا على كرسي قريب لانه ريولي خلاص صارت مطاط وماقامت تشلني....
    قيصرية؟!...
    عمري ماحطيت هالاحتمال....
    فديتج يا سعاد والله ماتستاهلين....
    كنت احس بذنب فظيع....بلوم محد يتخيله....
    دموعي كانن يهددن بالنزول بس تماسكت....
    علي: خلك قوي يا ناصر...ادري انه موقف يهد الحيل بس انته ريال تحمل...سعاد بحاجه لقوتك الحين...
    سكت ومارديت عليه....
    رجع عبدالعزيز..وانضم لعلي..وسكتوا...شو بيقولوون يعني؟..او يمكن كانوا يتكلمون وانا ماسمعتهم....
    لاني كنت في عالم ثاني....عيني عالباب اللي جدامي اتريا أي حد يطلع منه....
    يوم تقوم سعاد بالسلامه ان شاء الله.... بمنعها من الحمل مره ثانيه....
    ما بتحمل ولا هي بتتحمل موقف ثاني مثل هذا...
    وبتحصل هزاب معتبر مني يوم تقوم....والا شو تبابه الحمام تنظفه وهي بكرشتها...!!...
    زين احين لي صار؟!..

    بعد حوالي اربعين دقيقه... طلع الدكتور من غرفة العمليات وملامح ويهه جامده...كان يمسح العرق عن يبهته بمنديل ويرجع يمسح ايده....بتوتر...
    طرت انا صووبه...ومعاي علي.... شفت من طرف عيني الحريم يتقربن بعد عشان يسمعن شو صار....
    ناصر: بشر دكتور....شحالها ؟..
    الدكتور: انته زوجها؟...
    ناصر: هي انا زوجها...شو صار؟؟..
    الدكتور: تعال معي...
    استغربت...ليش مايبا يقول في الممر... رحت معاه لغرفة ثانيه..هناك يلس على مكتب وقال لي..
    الدكتور: تفضل استريح...
    يلست انا ببطئ....
    ناصر: خبرني....دخيلك دكتور..شو صار.!!
    الدكتور: آآآآه...حالة زوجتك كانت خطيري..الولاده في الشهر التامن تكون صعبة بالعاده...زوجتك صارت لها مضاعفات بالعمليي......هممم... اضطرينا ننقذ الجنين....

    وسكت...
    يطالع بويهي باسف يترياني افهم....بس انا ما افهم....
    ناصر: وسعاد..!!...
    هز الدكتور راسه ونزل عينه....
    الدكتور: انا آسف....البقية فحياتك اخي العزيز..عملنا اللي قدرنا عليه والله الشاهد...بس هيدا كلو من رب العالمين....

    ماسمعت شي من عقب كلمه "فحياتك".... ماقدرت اصدق...
    حسيت شي بداخلي طاح لمعدتي... الله واعلم انه قلبي....
    ماقدرت اصدق.....ماقدرت اصدق اللي يقوله....
    كيف اصدق.؟!... سعاد حبيبتي....ماتــ...لا....لا مستحيل....
    الدكتور: تقدر تروح تشوفها اذا حبيت...
    شاف نظرتي له وفسرها على انها موافقه...
    الدكتور: تفضل معي...
    قام الدكتور وقمت انا وراه اسحب ريولي سحب.... مادري كيف حسيت بغباء انه سعاد يوم بسيرلها بترجع تقوم...
    اكيد غلطان الدكتور......اكيد سعاد متفقه معاه عشان يسوون وياي مزحه ثقيله...لاني ماكنت موجود مثل ماوعدت...
    مستحيل يصير هالشي....مستحيل يصير وياي...!!...
    طلعت برا المكتب وانا احس بجمود في نفسي....شي ثقيل هبط على صدري مانعني من اني اتنفس...
    في الممر شفتهم ايون صوبي يسالوني لكني اشرت لهم بايدي بانهم يسكتون ولا حد منهم يكلمني...
    رحت مع الدكتور لداخل القسم....وقف هو عند باب ...اطالعني بنظره...
    الدكتور: انا اسف جدا...لا تعتبره مجرد كلام....لكني فعلا اسف...وببذل جهدي للعناية بالجنين....تفضل..
    ماهمني كلامه...أي جنين أي خرابيط....
    مد ايده الدكتور وفتح لي الباب...
    دخلت...ويوم رفعت نظري...
    هناك ريولي صدق حسيت بها فتات...ماقامت تشلني...قمت تساندت عالايدار...
    كانت سعاد ممدده عالشبرية البيظا....مغطايه بشرشف ابيض..كامل....
    ببطئ وبقوة جباره قدرت اني امشي لها...وقفت وسحبت الشرشف عن ويهها....
    كانت هناك....جنها نايمه...بملامحها الملائكية....
    ناصر: سعاد...!

    ماردت علي... مديت يدي...حطيتها تحت راسها..وبايدي الثانيه ضميت سعاد لصدري...
    ولين ماحسيت ببروده جسمها....ساعتها انفجرت بالصياح جني ياهل صغير


    __________________






  6. #276
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: الخميس...
    المكان: بيت سلطان..
    الوقت: التاسعه والنصف مساءا...
    ----------------------------------------
    (يوسف)....


    كنت يالس اتعشى ويا ابويه ومحمد اخويه وولده سلطان...وامي ومنى وميثا حرمه اخوي يالسات عالكراسي....
    كنت شوي وبغص من اللي سمعته من امايه...
    بلعت اللي فحلجي بصعوبه...
    يوسف: شو امايه؟!...
    ام محمد: مثل ماسمعت....خوك وافق اني اخطب له اخيرا....
    بهت في ويه امايه....ناصر وافق؟...كيف يوافق هذا مينون؟!.... يمكن عشان جي طلع من البيت معصب ولا رد علي لين احين؟!...
    بو محمد: والله الا انتي ولدج هذا مسوتله شور...قلت لج خطبيله وحطيه بالامر الواقع مابيروم يقول لا..بس انتي مبزتنه تترينه يوافق ...
    ام محمد: والله مايهون عليه يا سلطان...مابغيه يعرس وهو يفكر انه انغصب....
    يوسف: امايه انتي متاكده انه وافق.؟!...
    ام محمد: هييي....وابوي هذي بعد شو يبالها اخربط فيها؟!...
    سمعت محمد يسال امي شي...بس من صدمتي...ما انتبهت له..قمت من العشا ..تغسلت وطلعت للسياره...
    هناك اتصلت بناصر...لازم عاد اعرف السالفه احين....
    اتصلت مره مرتين...مارد...
    لكني كنت مصرر.....في الثالثه رد علي...بصوت تعبان جدا...
    ناصر: آآلووه...
    يوسف: هلا ناصر...وينك من متى ادق لك...
    ناصر: هلا يوسف...
    عقدت حياتي..ماشفت له بارظ في الكلام...شي غريب..شفيه؟!...
    يوسف: ناصر شفيك؟!... طلعت من البيت بحالة غريبه شغلت بالي.. شفيك؟!...
    ناصر: سعاد يا يوسف...سعاد...
    يوسف: شفيها سعاد؟...
    ناصر: ماتت...
    انصدمت....ماتت؟....
    يوسف: شووووووووووه..؟!!.....
    سمعت ناصر يصيح... صدمتي كانت فظيعه....
    يوسف: الوووه...
    لكنه سكر فوييهي.... مالومه .. وين له بارظ يكلمني احين....
    سكرت تيلفوني وفريته عالسيت اللي عدالي...شغلت السياره وطلعت بها من البيت..ومن العين..
    توجهت لبوظبي....اخويه بحاجتي احين... ليش ماخبرني من قبل..!!!
    كيف ماتت سعاد..!!...والي فبطنها وين راح...!!
    غصبن عني...دمعت عيوني.....
    سعاد انسانه طيبه جدا... وكانت زوجه صالحه وصابره لناصر... والا مافي حرمه تتحمل حركات ناصر ومزاجيته...
    مسكينه ياسعاد....الله يرحمها...

    الساعه 11 الا ربع تقريبا وصلت شقة ناصر....دقيت بابها...وفتح لي ريال ثاني...خفت اني مخربط بالشقه...
    يوسف: السلام عليكم..هذي شقة ناصر؟
    عبدالعزيز: وعليكم السلام يامرحبا....هي نعم ..اقرب...
    يوسف: قريب...(دخلت البيت وانا اتلفت)... انا يوسف اخوه...كيف الحال؟
    عبدالعزيز: بخير الله يعافيك...وياك عبدالعزيز يار ناصر..شفتي هذي المجابله...
    يوسف: هييي يامرحبا الساع...وين ناصر؟
    قال عبدالعزيز باسف..
    عبدالعزيز: بغرفة الضيوف...
    يوسف: عن اذنك...
    مشيت صوب غرفة الضيوف..وخمنت ان ناصر مايبا يدخل غرفته وغرفة سعاد...اكيد انه مابيتحمل..
    دخلت عليه الغرفه.. حصلته يالس عالشبريه...راسه بين يديه بحالة ياس فظيعه...
    اول مره اشوف ناصر جي...
    يوسف: ناصر...!
    رفع ناصر راسه واطالعني بعيون مليانه دموع.... تنهد..حسيتبه فرح يوم شاف حد منه وفيه ومن لحمه ودمه...
    قام ولوا عليه بالقو....
    ناصر: سعاد ماتت يا يوسف....ماتت...خلاص راحت وخلتني....
    تاثرت بصراحه لكني مسكت نفسي....
    يوسف: عظم الله اجرك يا ناصر...تصبّر.. هذي الحياة تراها...محد يعلم بعمره ياخويه....خلك قوي...
    ناصر: وعدتها باشياء وايد وماسويتها....سعاد ماكانت مستانسه وياي....ليتني خليتها عند اهلها وماظلمتها وياي جان احين بعدها عايشه ومستانسه....
    يوسف: ناصر ..انتبه تراك تغلط...كل شي بايد الله وهذا عمرها ...سواء عندك او عند اهلها....اذكر الله ياناصر...
    ابتعد عني ناصر ويلس مره ثانيه عالشبرية....يلست انا عداله...
    يوسف: دفنتوها؟..
    هز ناصر راسه بالايجاب...خمنت انهم صلوا عليها مع صلاة العشا...مسكين حالك ياخويه....الله يعينك على ما ابتلاك....
    يوسف: واللي فبطنها؟..
    عقد ناصر حياته....
    وقال بعداوه...
    ناصر: مادريبه....
    يوسف: يعني عاش؟..
    ناصر: مادري...اظني...
    عصبت على موقفه..عنبوووه ضناك ماتسال عنه ولا تدريبه شو حاله؟!...بس مابغيت اعاتبه هو اللي فيه كافيه....
    يوسف: ارقد يا ناصر..الوقت متاخر...انا برقد عندك الليله...ارتاح شويه....
    ماعارض ناصر..انسدح عالشبريه بملامح كئيبه...اما انا خليته وطلعت وسكرت الباب وراي..
    في الصالة حصلت عبدالعزيز...
    عبدالعزيز: انته كنت تدري بزواجه صح..
    يوسف: هي ادري...الله يرحمها...وايد كانت طيبه...
    عبدالعزيز: الله يرحمها...
    يلست عالكرسي...
    يوسف: خبرني شو صار؟..كيف ماتت ..ماخبرني شي ناصر.!!
    عبدالعزيز: طاحت الحرمه في الحمام...وهي في الشهر الثامن...فيت الولاده صعبه ..سوولها عملية قيصيرية لكن صارت مضاعفات في العملية على حسب قولهم...اضطروا انهم ينقذون الولد اللي فبطنها...وهي الله يرحمها....
    يوسف: لاحول ولا قوة الا بالله....والولد؟
    عبدالعزيز: الولد قاصر..تخبرت عنه قال الدكتور تقريبا الولد حالته زينه وان شاء الله مايطلع فيه أي عوق...حاطينه في الحاضنه هذي...
    يوسف: مسكين....واهلها؟...خبرتوهم...
    عبدالعزيز: هي...باجر الصبح بيكونون هني... الرياييل بس...ابوها ..خوانها...عمها وخوالها...
    هزيت راسي انا باسف عالموقف كله....خشيت ايدي بمخباي اطلع تيلفوني...
    اتصلت بامايه....وقلت لها اني عند ناصر وببات عنده اليوم....
    حاولت تعرف مني السبب بس انا قلت لها انه عندي شغل من الصبح فبوظبي وماريد اضيع وقت في الدرب...
    سكرت عنها..وبعدها عبدالعزيز انصرف وراح بيته...
    رجعت انا قفلت البيبان......ورحت اشوف ناصر...
    كان نايم مسكين من التعب والارهاق النفسي...سحب اللحاف ولحفته.....وفتحت الكبت الصغير وطلعت لي فراش ثاني لي....طلعت من الغرفه سكرت الليت والباب...
    اما انا فرقدت في الصالة....
    مسكين يا ناصر...
    منو اللي كان يتخيل ان هالشي بيصير له؟!..


    __________________











  7. #277
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: الجمعة..
    المكان: غرفة مهرة...
    الوقت: الحادية عشره والنصف صباحا...
    -----------------------------------
    (مهرة)....

    من شوي كنت قايمه من النوم... تسبحت...ويلست جدام التواليت اسحي شعري عشان اخليه ينشف...
    حسيت بالباب افتح بقو كانه انجلع.... جنه سياره داعمتنه من قوة الفتح...
    التفت خايفه وانا اشهق...شهالاسلوب بالدخله..!!..
    جابلتني عيون اخويه حمد...نظرته اول مره اشوف مثلها.... كانها تبا تذبحني....ترسل شرار..
    شو شرار...الا قولوا نار وبراكين...
    ياويلي انا شو سويت؟!..
    وقف عند الباب يطالعني بقهر وغيظ كبير....
    انا من زود صدمتي وخوفي قمت من الكرسي وتركت المشط من ايدي....
    مهرة: حمد....شفيك.؟!...
    شفته يتقدم صوبي...ببطء...
    زاد خوفي...
    اشوف موتي بعيونه....
    مهرة: شو صـــ...!

    انقطعت الكلمه يوم لفني حمد بكفففف معتبر عقني عالارض....صرخت انا من زود الصدمه والالم.... قعدت اطالع الارض مصدومه....شو صار..!!!..
    حسيت بايده تنمد وتمسك شعري بقو وتوقفني...مسكت ايده وانا اتالم...
    حمد: شو هذا اللي سويتيه....هذي اخرتها يا مهرووووه....
    وايده كل شوي تشد وتشد في شعري لين حسيته بينجلع....
    مهرة: شو سويت ؟!!...ليش تظربني والله ماسويت شي...
    بصعوبه قدرت اطالع بويهه لكن ماعجبني الي شفته...بالاحرى ..خفت منه...
    حمد: والله هاااه..!!..تحلفيين بعد مسوده الويه....فشلتييينا عند الناس هاي اخرة الثقة يالخااااايسه....!!
    كان يصارخ...وانا خوفي يزيد ويزيد....
    عرف....
    عرف عن التحرش اللي صابني من ذاك الريال...اكيد عرف ....ياويلي ياويلي....بيذبحني حمد...بيذبحني...
    سكت...وماقلت شي ماقدرت اتكلم الصدمه كلت لساني....
    حمد: قوليلي فشو قصرنا فيج هااااه.....بشوووووه...!!..ما تحاتين اهلج...ما فكرتي بخوانج وبسمعتج.... مافكرتي بدينج يا مهروووه....

    مهرة: والله العظيم ماسويت شي يا حمد...والله....
    حمد: لا تحلفييين...عندي ناس شافوووج....لا تنكرين...
    ترك شعري ومسك ايدي بقوو....احين يا دور ايدي يعورها....
    لكني استغربت...منو اللي شافني محد كان في البيت..!!!..
    مهرة: عن شووو تتكلم ...!!
    حمد: اتكلم عن انحرافج يالسباله في سكنات الجامعه ...ليش انتي كم فظيحه مسويه بعد عشان ماتعرفين..!!


    انصدمت...للحظه ماحسيت باي الم.....تبون الصدق...فرحت...لانه مايدري بالسالفه الادهى...اللي صارت هني...بين جدران البيت...!!..

    مهرة: انحرافيي..؟؟؟ اناااااا..!!..
    حمد: شووو عبااالج يامهروووه...ماعندج ام يعني مالج لا ولي ولا رقيب...تتحسبيني مابعرف يعني....!!...شو تبيني اسوي فيج احين هااااه ....شو تبيني اسوي اذبحج..!!..اكسرج شوو تبيني اسوي...!!

    حسيت بالقهر في نفسي..وفي نفس حمد.... حسيته مقهور من الخاطر وفعلا مب عارف شو يسويبي.... لو كنت انا مثل مايتحسبني مابلومه في النهاية انا اخته وعرضه... لكني ماسويت شي...انا مظلومه..!!
    مهرة: حمد والله ماسويت شي...والله....انا مثل ماتعرفني....
    دزني عالشبريه بقو وهو يصارخ بويهي...
    حمد: جــــــــذّااااااااااااااااابه.....!!
    طحت وانا اصيح عالشبريه....قلت بياس...
    مهرة: والله ماسويت شي...اذا كنت تطري البنات اللي كنت امشي معاهن...والله ياحمد وحلفت اني ماكنت ادري انهن جذي الا من يومين ثلاثه....وقلت لهن اني خلاص مابمشي معاهن ولا بكلمهن...والله ماكنت ادري...

    حمد: عقب شوووووه..؟!!...عقب مافظحتينا بين الناس....نص الجامعه تدري عنج وعن حركاتج وسيراتج السكن..... ماتعرفين يعني انه ممنوع عليج تسيرين هناك...يزانا وثقنا فيج وطرشناج تتعلمين جذي تشوهين سمعتنا وياج..!!
    زادت دموعي وزاد صياحي....
    مهرة: بس انا ماسويت شي يغضب ربنا ولا يغضبكم....والله ماسويت شي....
    حمد: اللي يصدقج عاد يالجلبه....يكون بعلمج يامهرووووه....جامعه بعد اليوم ماشي....تنزربين في البيت تسمعين والا لا.....
    لف عني بيطلع من حجرتي....طرت انا صوبه ومسكته من ايده...
    مهرة: لالالا.....لا دخيلك ياحمد دخيلك هالكورس بس خلني اكمله الله يخليك....
    سحب ايده مني بقوووو وبعنف...
    واطالعني باحتقار واشمئزاز....
    حمد: فجيني والله اني اجز حتى شوفتج كيف تصكيني..!!...
    عورتني الكلمه...لكني حاولت مره ثانيه...
    مهرة: الله يخليك ياحمد ماباقي شي عن الامتحانات النهائية خلني اكمل...الله يخليك ياحمد...لا تحرمني من دراستي...
    حمد: قلت لج لا....واحمدي ربج اني مابخبر ابويه عليج لانه انسان شيبه وصحته هالايام تخونه...وهو يشوف امايه فيج ويتحسبج ملاك مثلها....والا والــــلـــــه يا مهرة ان خبرته انه يكفر بج كفر....ومابيتحمل....ويدفنج وانتي حيّة.....تسمعين.؟!!.... وان يبتي طاري هالسالفه عند حد او اشتكيتي عند حد...انا اللي بكفربج هالمره.....

    طلع حمد من غرفتي...ورقع بالباب وراه....ومع رقعه الباب...انهرت انا عالارض... في موجه صياح فظيعه...!!...



    __________________






  8. #278
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: الجمعه...
    المكان: بيت علي بن سالم..
    الوقت: الثانية ظهرا...
    -----------------------------------
    (ناصر)...

    كنت يالس عالدري الخارجي للميلس...زين انه فيه ظله فوقي والا جان احترقت من الشمس....
    وليتني احترق ..واطيح ...ولا احس بشي....
    عالاقل افتك من هالالم الفظيع والجرح اللي فصدري اللي ذابحني... ...
    آخ يا سعاد... كيف تسوين هالشي فيني؟!!... ليش تعاقبيني بهالطريقه..!!
    استغفر الله انا شو قاعد اقول...!..
    حسيت بايد على جتفي...التفت..شفته يوسف...اللي مافارقني من امس لليوم...
    يوسف: مب زين ياناصر الي تسويه..
    ناصر: دخيلك يوسف مافيني ارمس وماريد حد يعاتبني خلوني عراحتي...
    يوسف: عنبوو يالس في الحر .. لا تريقت ولا تغديت احين حتى ماي ماشربت.... مب زين يا ناصر مب زين....
    ناصر:.........
    يوسف: انزين اييبلك مصحف.؟!...اقرا شوي يمكن ترتاح نفسك...!
    ناصر: ماريد...
    يوسف: ماتبا تقرا عروحها يعني.!!
    غمضت عيني انا بالم.... سعاد صارت روح..!!...راحت خلاص...مب قادر اصدق...مب قادر...
    سالت عن عيني دموع.... كتمتهن قد ماقدر بس رغم ذلك سالن...نزلت راسي وحطيته بين ايدي...اخفيه عن عيون يوسف المتفحصه.....!..
    يوسف: عمك داخل يتخبر عنك...
    ناصر: ماقدر اجابله....
    يوسف: ليش.؟!... والله شيفته ريال طيب وفاهم ومابيرد عليك اللوم باي طريقه...
    ناصر: انا وعدته ووعدت سعاد باشياء ماسويتها...احسها هب راضية علي...ولا هو راضي علي....ولا امي راضية علي ولا ابويه ولا حد....حتى....حتى مهرة هب راضية علي...شو هالحياة اللي عايشنها... انا قصرت فبنته وايد يا يوسف ماقدر اجابله....
    يوسف: شو ياب مهرة في السالفه احين..!
    قمت انا متغيظ....شو دراني شو يابها في السالفه...!!...يت وخلاص....ليش هي متى تروح اصلا..!!..
    ناصر: شو دراني انا يا يوسف اووففف....
    رفعت ايدي امسح دموعي....
    يوسف: تبانا نطلع...؟!..

    اطالعت فويهه...حبل نجاة...
    ناصر: هي ابا اطلع...
    يوسف: نسير...

    في السياره... سالني يوسف..
    يوسف: وين تبا تسير؟...الشقة؟!
    ناصر: لا...لا ماريد اروح الشقة....
    يوسف: خلاص انا اعرف وين بوديك...
    تساندت على ورا...غمضت عيوني باسترخاء...
    مايهمني وين اروح المهم ابتعد...بعيد عن الشقة...وبعيد عن اهل سعاد اللي اشوف فعيونهم اللوم....وبعيد عن كل شي..
    بعد فتره وقف يوسف السياره..
    يوسف: يالله انزل...
    فتحت عيوني..وتلفت في المكان اللي انا فيه.....اخر شي عقدت حياتي معصب...
    ناصر: ماريد اشوووفه...
    يوسف: ضناك هذا يا ناصر...بيشل اسمك... اول عيالك عنبووو...!!..
    ناصر: قلت لك ماريد اشوووفه....
    انا اريد ابتعد وهو يقربني من شخص كان اقرب لسعاد مني في الثمان اشهر اللي طافت..!!....
    حتى لو ولدي ماريد اشووفه.... ولا اريده اصلا...
    شفت يوسف يعقد حياته معصب....لبس نظارته الشمسية وقال..
    يوسف: شوف عاد..ماتبا تشوفه انا ابا اشوف ولد اخويه... ييت حياك الله ماييت براااايك...تريا في السياره...
    رقع بالباب وراح عني...وانا اراقبه بغيظ وهو يبتعد وفي النهاية يختفي بين ابواب المستشفى....!!..
    بعد عشر دقايق....نزلت انا بعد....
    مادري ليش فضول...واجب...ماعرف..انا مابا اشوفه بس بروح اشوفه...لين متى بتم اتجاهله...!!..
    وصلت قسم الاطفال....شفت يوسف واقف بقسم المواليد القاصرين.. يراقب من ورا الزجاج وعلى ويهه ابتسامه خفيفه....
    تقربت انا بخوف بسيط.. التفت لي يوسف وابتسم لي اكثر...
    يوسف: تعال شوفه..تعال الله يهديك يارب...
    تقربت من يوسف واطالعت في المكان اللي اشر لي عليه....
    شفت الصغير...في منز غريب...زجاجي...وموصوله به وايرات واشياء...!!...
    كان احمر...لكن سبحان الله...ويهه ابدا ماكان معتفس مثل باقي العيال...!!..اول ماشفته حسيت بمشاعر غريبه....
    رحمة على شفقه...على احساس بالمسؤولية....واحساس بالخساره..!!...
    انعدمت الرؤية بعيني بسبب تجمع الدموع...نزلت راسي عن صورته مب متحمل...
    هذا اللي ماتت عشانه سعاد....اللي ماتت بسببه.... حجمه صغير وايد..ليش ماقدرت تولد طبيعي ليش؟!...
    طلعت من القسم كامل وانا اتنفس بقو عشان اهدي اعصابي...
    يلست برا اتريا يوسف...يشبع من الشوف...
    وبعد دقايق رجع..ويوم رجع قمت انا ومشيت معاه لبرا المستشفى..
    في السياره قعد يوسف يتكلم عن الولد وحالته الصحية...بانه الولد محظوظ لانه نموه تقريبا مكتمل ..واحتمال كبير يطلع بصحة كامله من المستشفى بعد مايخلص فترة الحضانة...لانه في بعض الاولاد القاصرين تكون فيهم عيوب خلقية....
    لكن ولدي انا لين احين حالته مستقرة تماما...ويقول الدكتور انه مطمن....
    في داخلي انا..قلت الحمد لله....
    لكن من برا مابين علي شي...
    يوسف: متى بتسميه؟..
    ناصر: مب الحين..بعد اسبوع او عالاقل ثلاث ايام...
    يوسف: قررت عاد شو بتسميه؟!..
    ناصر:............ مايد اظن...
    يوسف: على يدي الله يرحمه.!!...زين تسوي...مب حلو التكرار وايد..لانه محمد مسمي على ابويه سلطان...!..
    سكت عنه ويلست اتذكر نقاشاتنا انا وسعاد على اسم الياهل...كنت اتمناه بنت...
    لكن ماشي تمنيته صار في الفتره الاخيره...
    رجعني يوسف للعزا...لبيت علي بن سالم...
    هالمره قويت قلبي ودخلت... قعدت عدال عمي..واستسمحت منه...عالتقصير وكل شي...
    قال لي... نصيبك ونصيبها...
    حسدته على هدوءه وقوة نفسه...!!...ليتني مثلك ياعمي...
    بس ماقدر اتقبل موت سعاد المفاجئ بهالسرعه ماقدر...
    ----------------------------------
    اليوم: السبت..
    المكان: ميلس بيت خلفان..
    الوقت: السابعه مساءا...
    ---------------------------------
    (مبارك)...

    يلست اطالع سيف وانا منقهر....
    مبارك: hey...اظني عاطينكم اجازه من المدارس هالشهر عشان تدرسون للامتحانات مب عشان تلعبون بلا ستيشن..!!

    سيف: خلني اتهنى ذبحتني من كثر ما تقرقر عراسي....
    مبارك: ويا هالراس اباك تيب نسبه زيينه عشان تدخل الكولج...
    سيف: من قالك اني بدخل الجامعه اصلا او بكمل دراستي...!!
    مبارك: انا اقولك وغصبن عنك....
    سيف: مبارك لا تلحق مهروووه...
    مبارك: الا صدق..على طاري مهروه...where is she?
    سيف: همممم في البيت اظني...
    مبارك: مختفية...
    سيف: تصدق حتى انا ماشفتها من ..همممم...اول امس...
    مبارك: شفيها.؟!...مريضه..!
    سيف: مادري..
    مبارك: مالت عليك من اخو...
    سيف: شكرا... الله ياخذه ظربني...!!
    احتشر سيف وهو مندمج في اللعبه....مافي امل منه هذا....
    لازم احصل له شي يدفعه للدراسه دفع... بحماس...
    ومع شوية تفكير..سالته..
    مبارك: سيف...كد سافرت؟!..
    سيف: لا...وين الله يخليك ....
    مبارك: مالك خاطر تسافر؟
    سيف: ياريت والله...بس ليش تسال؟
    مبارك: فكرت اشلك وياي لندن اذا رجعت انا للدراسه هناك...
    ابتسمت يوم فر سيف ايد اللعبه والتفت لي...
    سيف: والله مبارك؟
    مبارك: هي والله...تبا تسير؟ الحياة هناك وايد حلوه...
    سيف: ياريييييييت والله اغير جو عقب الامتحانات....
    مبارك: بس انا مابشلك على حسابي...
    سيف: ادري امبوني مابسافر على حسابك انا...باخذ من عند ابويه فلوس..
    مبارك: كم بيعطيك يعني؟...مابيسدنك الا اسبوع...او عشر ايام بالكثير وهذا مايكفي ابدا....
    سيف: ظنك؟..
    مبارك: شو رايك تسافر على حساب الدوله؟!...
    سيف: كيف هاي بعد؟...
    مبارك: بعثة...
    ابتسم سيف بخبث....
    سيف: nice try mbark
    مبارك: هههههههههههههههه صدق والله فكر فيها...الدراسه هناك غير والله يا سيف...تتخرج بشهادة مصدقة ومعترف فيها... يوم بترجع بتحصل لك احسن شغل واحسن منصب لانك دارس في الخارج...ووين؟..في بريطانيا مره وحده...
    سيف: دخيل الله انا ثانوية يالله يالله اخلصها تباني ادرس هناك عند الاجانب..!!
    مبارك: لا تنسى..بكون انا وياك...بندرس رباعه..بنسكن رباعه...لانه نحن بيتنا بعناه....وبساعدك انا وايد مابخليك سيف....
    سكت سيف وهو يفكر....
    سيف: احس اني ماقدر...
    مبارك: مافي شي مانقدر عليه نحن شباب والدنيا جدامنا....think about it seef..!.... حتى انته نفسك بتتغير...حياتك بتتغير للاحسن.... بترجع هني وانته عندك شي تفتخر به.... ..مب شهادة ثانوية عامه ماترفعك لمناصب محترمه...!!..
    سيف: وكيف بيييب البعثه عاد يا مبارك....
    مبارك: work hard...بس هات نسبه فوق التسعين...وبتحصل بعثه...ماتروم يعني..
    سيف: لا ماروم..ماشفت نسبتي انته في نص السنه..!!
    مبارك: ماكنت تدرس عدل يا سيف.... بعدين لا تنسى ..امتحانات الثانوية العامه ياخذون علامتك مثل ماهي ماينقصون منها شي ولا تعتمد على اعمال السنه... شغل مخك سيف...
    سيف: واذا شديت حيلي ومايبت النسبه.؟!...
    مبارك: ساعتها بنشوف اذا نقدر نقنع ابوك يصرف عليك وانته هناك بس بعد اشوفها صعبه يمكن...بس لو شديت حيلك بتيبها يا سيف....لو بعدك علمي...انته الا ادبي..
    سيف: شو اتحسبه سهل؟ والله انه صعب...
    مبارك: مايصعب عليك..you can do it....
    سيف: يصير خير...
    طنشني ورد يمسك ايد اللعبه ويلعب...
    ماعليه المهم دخلنا الفكره فباله ....واكيد انه الليله مابيرقد وهو يهويس فيها...
    احتمال كبير انه يقتنع...وان شاء الله يقتنع... وينفذها...


    __________________






  9. #279
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: السبت...
    المكان: بيت سلطان..
    الوقت: العاشره مساءا...
    ------------------------------------------------
    (يوسف)....

    توني واصل من بوظبي.... الله يعيني عالتحقيق.... اكيد بتسالني امايه شو هالشغل اللي عندي من يوم الجمعه ماخلص...!!..ماخذ اجازه اليوم عشانه....
    الحقيقه اني ماقدرت اخلي ناصر بحالته اروحه هناك... ماخليته الا يوم شفته متماسك شوي...
    ابتسمت وانا اتذكر ولد ناصر..... ماشاء الله عليه....مبين عليه بيطلع ابيض مثل امه...لانه احمر احين...اكيد بيفتح لونه عقب...بس لانه صغير جذي....
    اختفت ابتسامتي واناا فكر...منو بيربي هالولد؟...ناصر صار مجبور انه يخبر قوم امايه بالموضوع... لازم الورد يحصل حد يربيه..!! ناصر مايعرف شي بهالامور...!!...
    تنهدت بظيج من الوضع كله وقررت اترك الامور تمشي نفسها بنفسها....
    التفت للسيت اللي عدالي..خذت التيلفون وخشيته فمخباي..ومديت ايدي اخذ السي دي يات مالاتي...
    ابتسمت يوم شفتهن...
    تذكرت يوم اشلهن واصلح كمبيوتر كنه...!!!...

    وقف تفكيري عند هالحد....!!...كمبيوتر كنه..!!..كمبيوتر كنه فيه كل اسرارها....معقوله ماشافتهن للحين؟!.. لو شافتهن بتتذكر...بتتساءل عالاقل ليش مجمعه كل هالامور..!!...
    خذت الاغراض على عجل وطلعت من السياره ...دخلت البيت ماحصلت حد...ولله الحمد...
    ركبت فوق ادور منى....حصلتها بغرفتها....
    يوسف: منى..تعالي بسرعه اباج فسالفه...
    خليتها ورحت لغرفتي..حطيت اغراضي عالمكتب...وفصخت السفره وفريتها...يلست احج راسي وانا افكر بحماس...
    كيف مايتني هالفكره من قبل..!!!....
    منى: شفيك يوسف بسم الله...!!...توك ياي من بوظبي؟..
    تقربت منى ووايهتني...لانها من يومين ماشافتني...
    يوسف: هي توني..سكري الباب وتعالي...
    يلست عالشبريه مستعد للكلام....يلست هي اطالعني باستغراب...
    يوسف: منى... كنه ما استخدمت الكمبيوتر لين احين؟!
    منى: بلى تستخدمه...!... عطيتها انا الباسوورد مالته...
    يوسف: عيل كيف ماشافت الملفات اللي انا شفتهن....
    عقدت منى حياتها....!!
    قلت لها انا باستعجال..
    يوسف: الملفات والصور والتواريخ الخاصه فيني منى...!!
    منى: هي والله...صح....لالالالالالا ماظني شافتهن...
    هزت منى راسها باسف على هالمعلومه وهي تنقلها لي...
    يوسف: معقوووله...!!..ماظني ما انتبهت لهن...
    منى: بتنتبه لو هن موجودات في الكمبيوتر...
    هبط قلبي فصدري....
    قلت لها بياس..
    يوسف: لا يكون حذفتهن؟؟...
    لكن الامل تجدد في نفسي يوم شفت منى تهز راسها مره ثانيه بالرفض...
    منى: لا ماحذفتهن...نقلتهن على سي دي.... قالت ما بخاطر بانه شخص ثاني يشوفهن مثل ماشافهن يوسف...
    يوسف: وين هالسي دي؟!..
    منى: مادري...بين اغراضها اكيد.....(وعقدت حياتها وهي تفكر)... او يمكن....
    يوسف: يمكن شووو...!!...
    صفعت منى نفسها بقو... شهقت وقالت...
    منى: ياويلي يا يوووسف....بتصفعني.!!
    يوسف: منووو بيصفعج؟ ليش؟
    منى: انته بتصفعني...
    يوسف: مايحتاي صفعتي عمرج...
    منى: والله استاهل اكثر...
    يلست افكر شوي مستغرب من كلامها...
    وعقب...
    تراجعت في قعدتي بغيظ...
    يوسف: منى لا تقوليلي ان السي دي عندج كل هالفتره....!!..
    عظت منى على شفايفها وهي متلومه وخايفه...
    منى: اظني مب متاكده..مافتشت...
    يوسف: بتذكرين لو عطتج اياه....
    منى: ترا هي عطتني صندوق فييه اغراض...صندوق صغير...قالت لي دسييه عندج..وانسي وجوده ... وانا نسيته صدق...ولا فتشته لانه عيب...خصوصيات كنه حتى لو انا اعرفها بس هي ما اذنت لي اشوفهن...!!
    يوسف: سيري هاتييه بنشوف شو فيه...
    عقدت منى حياتها..
    منى: لا..
    يوسف: بصفعج تراني....مب وقته هالوفاء احين....
    منى: اسفه جدا... بنوديلها الصندوق وهي بتشوف محتوياتها بنفسها....
    يوسف: واذا ماكان فيه السي دي اتم حاط امل عالفاظي...!!
    منى: انا سالت كنه ذاك اليوم اذا فتشت غرفتها..قالت هي انها مازالت تفتش...ماظني موجود السي دي عندها شكله الا صدق في الصندوق عندي...
    يوسف: ياااااااربيييه ليش ماقلتي من قبل هاااااااااااه...!!...
    منى: والله نسييييييييت.... ودني باجر عندها عشان اعطيها الصندوق وهي بتشوف شو فيه...
    يوسف: لو الوقت هب متاخر جان وديتج احين والله...لكن ماعليه ..باجر الاحد ماقدر مشغول شوي..بوديج الاثنين ان شاء الله عقب المغرب... ان شاء الله بس كنه تتذكر ترا والله ماقمت اتحمل هالحاله اللي انا فيها....
    منى: ان شاء الله بتتذكر..صدقني كنه حاااسه...بس يبالها دفع عشان تتذكر...
    ارتعش قلبي يوم قالت منى كلامها....
    معقوله رغم فقدان الذاكره كنه مازالت تحبني؟! بس من دون ماتحس...!!..
    يوسف: ظنج ؟!...
    منى: مب ظن...يقين...انا متاكده 100%.... المهم برايك احين ...تعشيت؟..
    يوسف: هي تعشيت بالطريج...
    منى: خلاص عيل تصبح على خير...
    يوسف: وانتي من هله...
    طلعت منى وسكرت الباب وراها....دخلت انا الحمام اتسبح ...
    لكني من طحت عالشبريه وانا افكر...
    مارمت ارقد من زود الحماس...
    باجر يوم تاريخي...!!...بمعنى الكلمه..فحياتي.... وحياتها...
    بجبرها تسجل تاريخ باجر من بيت التواريخ...


    __________________






  10. #280
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 445
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: السبت...
    المكان: غرفة مهرة...
    الوقت: العاشره والنصف مسااء..
    ---------------------------------------
    (مهرة)....


    سمعت دق عالباب...بخوف رحت افتحه..ارتحت يوم شفت انها البشكاره مع كيس الثلج اللي طلبته من شوي...
    مهرة: ثانكس جوسي...
    راحت البشكاره وسكرت انا الباب....رحت للمنظره اشوف غزي الوارم...حطيت عليه الثلج...
    مهرة: ياربي متى بيخوز هالورم...!!.. من حجرتي مب رايمه اطلع بسببه...!!...
    رحت وانسدحت عالشبرية وانا افكر...بزعل...على حالتي...
    من وين عرف حمد..؟!... منو هذا اللي خبره كل هالامور عني...!!
    انا فكرت فالسالفه وايد وما طلعت غير باستنتاج واحد...
    بنت من بنات الجامعه...!
    مافي شي غيره....
    حسب ما اذكر...عفرا مازالت تشك بتصرفات حمد معاها..وتشك بمعرفته لبنت ثانيه...حتى انه صارت بينهم مشكله خلت عفرا تروح بيت اهلها يومين...لكنه راضاها ورجعت الامور لمجاريها....
    معقوله يكون يكلم بنت فعلا؟..وموكل هالبنت تتخبر عني بين البنات..!!..
    وخبرته الشائعات نفسها اللي انا سمعتها من البنات عن نفسي..!!..
    باني بنت خايسه..!..
    يارب ساعدني...
    اليوم مارحت الجامعه واحس نفسي شي ناقصني...
    مافي مجال مابيخليني حمد ارووح...اليوم قلت لهم مريضه بس باجر شو بقولهم باي عذر مابروح الجامعه.!!!...
    حسبي الله ونعم الوكيل....يالله انك تفكني من هالوضع الصعب....ودعوة المظلوم مستجابه ان شاء الله...
    قعدت استرجع موقف حمد مني...
    كيف خفت وحسيته يدري بذاك الريال...زين اني سكت..والا جان صدق بروح فيها...
    سمعت دق عالباب...
    نقز قلبي على عدد الدقات...
    مهرة: منوووه؟
    شيخه: الشيخه شيخه...!!..
    ابتسمت...
    مهرة: تعالي شيخه...
    دخلت شيخه..وسكرت الباب وراها..وهي اطالعني باستغراب بسبب كيس الثلج...
    شيخه: شفيج؟!...
    مهرة: شحالها خالووه..وابوج؟ كلهم بخير؟...توج يايه والا من الصبح؟!..
    يلست شيخه وهي اطالعني بنظرة تصميم...
    شيخه: شووو....فيييج....!!..جاوبيني...!
    مهرة: ماشي...
    مدت شيخه ايدها وسحبت ايدي عن ويهي وشافت اللي شافته وشهقت...
    شيخه: شو هذا؟..ظرسج وارم والا شو السالفه..!
    مهرة: لا ظروسي مافيها شي...
    شيخه: عيل..!!..
    مهرة: حلفي ماتخبرين حد....
    شيخه: والله ماخبر حد...
    مهرة: .....حمد...ظربني...
    شهقت شيخه...
    شيخه: ليييييييييييش..!!..
    مهرة: يتحسبني كنت اصيع في السكنات مع بنات الجامعه...
    شيخه: شو تقولين انتي؟؟ حلفي؟
    مهرة: والله...يا وصفعني هني امس ..ومسكني من شعري..ودزني..وعورني...سمعني رمسه عوذ بالله منها ياشويخ لكن انا ماعليه من هذا كله....اللي مزعلني شيئين...اولهن اني خلاص طحت من عين اخويه وصار يحتقرني...ثاني شي انه حرمني من دراستي...!
    سكتت شويخ مب عارفه شو تقول....لكن الغيظ مرسوم على ملامحها...اخر شي انفجرت..
    شيخه: كل هذا يصير وماتخبريني..!!...
    مهرة: مب شي مشرف عشان اخبرج به شيخه...والله مب عارفه شو اسوي...
    شيخه: انا برمس سهيل...
    مهرة: لالالالالالالالا...خبله انتي سهيل اشد عن حمد بروحج تشوفينه كيف يوم يعصب...والله يا يذبحني مابيصدقني هذا بعد...
    شيخه: سهيل مب شكاك يا مهرة وعمره ماشك فيج...مابيفكر تفكير مثل هذا...حمد غير شكل يتحسبج الا بتغلطين شرات ماهو يغلط...سمحيلي على هالرمسه بس الحق ينقال... فرق بين حمد وسهيل..
    مهرة: حتى لووو لا تخبرين حد...خلاص انتي حلفتي...
    شيخه: بصووم...
    مهرة: شيخه الله يخليج لاتخليني اندم اني خبرتج... حمد مهددني ان اشتكيت عند حد يا يكفر بي كفر... دخيلج مافيني...اروحها ايدي تعورني من امس بسبب مسكته...
    شيخه: مسكج على ايدج المكسوره؟
    مهرة: هي ..محصلين غيرها هم...!!... اظني تعمد عشان يعورني...
    هزت شيخه راسها...
    شيخه: الله يهديه...كيف يسوي جي باخته...!!...
    مهرة: مثل ماقلتي انا اخته ياشيخه ..عرضه وشرفه ... زين انها وقفت عند جذي ..كان ممكن يذبحني...
    شيخه: ادافعين عنه بعد.؟..تراه الا سامع الرمسات من البنات الخايسات من وين يعني بييب هالكلام..!!.. كلن يرى الناس بعين طبعه..دام هو يخون الثقة يتحسبج الا شراته...
    مهرة: انتي تعرفين بالسالفه بعد..!!..منو خبرج..
    شيخه: سهيل كان ملاحظ عليه من فتره طويله انه مب على طبيعته...يرمس وايد في التيلفون باسلوب مايرمس فيه رياييل...منو بيكون يرمس يعني...الا يغازل...
    تنهدت انا بتعب...
    مهرة: المهم احين شو اسوي...شو اعطيهم من الاعذار عشان افسر غيابي عن الجامعه..!!...
    شيخه: انتي شو قلتيلهم اليوم؟
    مهرة: قلتلهم مريضه مابسير..
    شيخه: همممممم قوليلهم ما ارتحت في الجامعه...وماريد ادرس...
    مهرة: بيبلعونها...!!
    شيخه: دخيلج امبونهم هب فارقه عندهم كملتي دراسه والا ماكملتي...
    مهرة: هي والله صدقج.... شيخه...لا تخبرين سهيل....حذرتج...
    شيخه: ربطتيني بالحلاف والتهديد شو اسويبج بعد...مابقوووله... المهم تعشيتي؟
    مهرة: لا والله مارمت انزل وغزي جذي وارم...
    شيخه: ولا انا تعششيت..بطلب من المطعم وبطلب لج وياي...
    مهرة: مشكووره..
    شيخه: العفو حبيبتي...حطي حطي الثلج....جان يخف لين باجر...
    قامت شيخه عني وطلعت...
    وانا يلست مكاني....
    حالتي صعبه صدق..
    لا تسر لا عدو ولا صديق...


    __________________






معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 6 (0 من الأعضاء و 6 زائر)

المواضيع المتشابهه

  1. طويلة : رواية أنت لي ..كامله
    بواسطة بنت العين 2 في المنتدى قصص الطويلة , الروايات
    مشاركات: 29
    آخر مشاركة: 17-05-18, 10:52 AM
  2. اذاعه كامله عن عيد الاتحاد
    بواسطة الاميره الصغيره في المنتدى منتدى النشاط و الاذاعة و المشاريع المدرسية
    مشاركات: 27
    آخر مشاركة: 13-11-09, 03:43 PM
  3. حل صفحة 12 كامله
    بواسطة جهاد يحيى في المنتدى اللغة العربية
    مشاركات: 2
    آخر مشاركة: 13-02-09, 04:29 PM
  4. صور رمزيه اسلاميه روعه × روعه
    بواسطة brodk في المنتدى منتدى الوسائط Media Forum
    مشاركات: 15
    آخر مشاركة: 09-07-30, 08:35 AM
  5. أنت لي (كامله)
    بواسطة أحمد البقشي في المنتدى قصص الطويلة , الروايات
    مشاركات: 25
    آخر مشاركة: 08-07-03, 12:30 PM

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •