عيدكم مبارك و عساكم من العائدين ..اخوكم amir257




 تنبيه :: عزيزي اذا واجهتك مشكلة في تصفح الموقع , فاننا ننصحك بترقيه متصفحك الى احدث اصدار أو استخدام متصفح فايرفوكس المجاني .. بالضغط هنا .. ثم اضغط على مستطيل الاخضر (تنزيل مجاني) .
 
 
صفحة 6 من 43 الأولىالأولى 123456789101116 ... الأخيرةالأخيرة
النتائج 51 إلى 60 من 424
Like Tree1Likes

الموضوع: {مــوعد مـع الســعادهـ} قصه من الامارات روعه كامله

  1. #51
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 446
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    الجزء الرابع عشر



    ---------------------------------

    اليوم: الاثنين..

    المكان: في صالة بيت خلفان..

    الوقت: الخامسة والنصف مساءا..

    ----------------------------------

    (مهرة)....



    بعد ماطلع سيف من الصالة وراح ورا سهيل...تميت انا على اعصااابي...اول مره اواشي على سيف...دايما كنت اخطف له هفواته ولا اخبر حد عنه...لكن الزقااره موضووع ماقدرت اسكت عنه لانه بيضره...

    وبصراحه زقرة سهيل له ماتبشر بخير..الله يستر بس ماتستوي ظرابه..!

    اخاف سهيل يقول له وسيف ايي يكفخني انا.. هالمره بيكسر لي ايدي الثانيه وريوولي بعد. واذا رام يقص لساني بعد بيقصه يسويها...!!..

    سكرت اللعبه اللي ماقدرت اندمج فيها من كثر ما انا متوتره...وقعدت في كرسي مجابل باب الصاله عشان اشوف شو يصير في الحووش..وماكفاني هالشي..رحت وفتحت باب بيتنا اللي يودي للحوش عشان اسمع اصواتهم اذا صارخوا....!!!

    ليش انا اتوقع الاسوا دوم..!!..عافان الله متشائمة في حياتي... قعدت في مكاني ارقب أي حركه تصير لكن ماصار شي ..واصوات عاليه ما سمعت...وبعدها بدقايق.. شفت سهيل يطلع بسرعه من الميلس..وايي صوب البيت وملامحه ماتفصح عن أي شي....وقف جدامي وقال..

    سهيل: وين عمتج.؟

    مهرة: مادريبها...ليش؟

    سهيل: تبا تسير بيت خالووه تقول..بوصلها فطريجي...وانتي ليش ماتلبستي لين الحين..!!

    مهرة: اتلبس ليش؟

    سهيل: تراج بتسيرين والا..!!

    مهرة: ويا عمووه..!!...لاااا..ماقالت لي....

    سهيل: المهم سيري تاكدي منها بسرعه قوليلها سهيل يترياج في الصالة...

    قمت انا ورحت اتاكد من عمووه....ملامح سهيل وتكدر مزاجه ماشجعني اني اساله عن أي شي صار داخل الميلس....

    دخلت حجرة عمتي اللي كانت واقفه تجحل وتتزين جدام المرايه...

    مهرة: عموووه...سهيل يقولج خلصتي.؟!

    صدت صوبي عمووه بسرعه...وعقدت حياتها..

    آمنه: وانتي شحقه ماتلبستي..؟؟؟

    مهرة: ماقلتيلي اني بسير وياج...

    آمنه: مطرشه البشكاره تقولج...

    مهرة: ولا يتني ولا قالت شي...

    آمنه: الله ينطبها ياربي...سيري يامهرة تلبسي فظيحه بتسلمين على خالتج صار لها ثلاث ايام طالعه من المستشفى..

    مهرة: لازم اسير عموووه..!!...

    آمنه: عيب عليج يامهرة...هي لازم تسيرين يالله خلصيني بسرعه...

    حست بووزي انا..وطلعت من حجرة عمتي ورحت حجرتي..بدلت ثيابي ولبست لي قميص سماوي يديد وتنوره بيظا مريحه... حطيت كريم مرطب على بشرتي وايدي..وتزينت على خفيف ...

    يوم نزلت حصلتهم يتريووني تحت ..عمتي وسهيل.. وكانوا يتكلمون مع بعض...

    آمنه: شو من السيايير..؟

    سهيل: رنج فضية...

    آمنه: والله حلوو... يعني انته بتسير تستلمها وبترد علينا عقب والا كيف؟

    سهيل: بوصلكم وبشل راشد وياي..ويوم بنرد انا بسوق الرنج وهو بيسوق الاودي... وعقب انتي خذي سيارتج وردوا البيت..!.

    آمنه: على خير...يالله يالله نسير ...

    ركبنا الاودي وطلعنا من البيت... وسرنا بيت خالووه...



    ---------------------------

    اليوم: الاثنين..

    المكان: في شقة ناصر..

    الوقت: السابعه والنصف مساءا..

    ----------------------------

    ( ناصر)....

    ربطت الخيط مال جوتي الرياضه وقمت من الشبرية... وعالوقت بالضبط..سمعت جرس الباب... خذت اغراضي الشخصية بسرعه وفتحت الباب...

    ناصر: عالوقت ماشاء الله عليك ياعبد العزيز...

    ابتسم لي عبدالعزيز وقال..

    عبدالعزيز: جاهز..؟

    ناصر: هي نعم...توكلنا على الله.... وهالمره بنسير بسيارتي....

    قفلت باب شقتي ونزلت مع عبدالعزيز وركبنا السياره...

    عبدالعزيز: ماقلت لي شو شفته علي..؟؟ ارتحت معاه؟

    فكرت شوي بلقائي البسيط مع ربيع عبدالعزيز علي...

    ناصر: ماعليه قصور ماشاء الله....ريال مثقف وملتزم..واحس شخصيته قوية ويقنع أي حد بكلامه بدون مايبذل جهد...

    عبدالعزيز: فعلا.... لانه يكون واثق من كلامه مايقول كلام خرابيط...

    ناصر: انا بعد حسيت جي...ماشاء الله قعدتنا كلها كانت مفيده ....

    عبدالعزيز: الحمد لله انك ارتحت معاه...وان شاء الله الربعه بينكم تقوى مع الاياام...

    ابتسمت انا بتسامح... لاني ما اعرف شو مستقبل هالربعه...لكن اكيد مابتكون مضره...

    ناصر: ان شاء الله... وين نسير..الكورنيش؟

    عبدالعزيز: كيفك انا اركض هناك كل يوم...

    توجهت للكورنيش بدون نقاش.. ويوم وصلنا ..خلينا تيلفوناتنا واغراضنا في السياره وقفلناها ونزلنا..بدينا بالمشي السريع... تسخين قبل الركض...

    ناصر: الا بسالك ياعبدالعزيز... من متى تعرف علي؟

    عبدالعزيز: اعرفه الله يسلمك من ييت بوظبي...يعني من اربع سنين ونص تقريبا...

    ناصر: ليش انته من وين اصلا؟

    عبدالعزيز: الله يسلمك انا من خور فكان...

    ناصر: وعلي كيف تعرفت عليه؟ يشتغل وياك؟

    ظحك عبدالعزيز...

    عبدالعزيز: ههههههه علي هو مدير الشركه اللي اشتغل فيها...

    ناصر: اهااااا ماشاء الله اشوفه عنده خييير الله يزيده...

    عبدالعزيز: هي ماشاء الله...

    سكت شوي وبدينا بالركض.... وفجاه قلت بفضول...

    ناصر: اقول...ولده الصغير سالم... عيونه خضر..!!!!!...

    ظحك عبد العزيز على سؤالي الغريب...

    عبدالعزيز: ههههههههههه عرفت انك بتسال عن هالشي من شفتك معقد حياتك وتطالع الصغيرون...

    ظحكت انا بعد على دقة ملاحظة عبدالعزيز...هذا معناته انه كان يراقبني طول الوقت..!!!..

    ناصر: هههه صدق والله... يعني علي..حنطي البشره ...عيونه بنياات... وولده شي مختلف..!!

    عبدالعزيز: الله يسلمك علي ماخذ شاميّة... واظن الولد طالع عليها...وعلى فكره عنده بنتين صغار ...اصغر وحده اربع سنوات... شفتهم في بداية تعارفنا... لكن الريال من شدة التزامه مايحب يعود بناته مهما كانن صغار انهن يطلعن جدام رياييل...!!

    عقدت انا حياتي لهالمبالغه....

    ناصر: بس ماجنه مبالغ شوي..يعني هذيلا يهال شدراهن..!!

    عبدالعزيز: هذا تفكيره ومعتقداته....انا ناقشته مره بهالشي...وقالي انه بين اهله وخواته كلهم تربوا جذي... ويقول ان الدنيا هالزمن مالها امان...والبلاد متروسه ذيابه...ومهما كان سن البنت صغير بيتمون يدققون فمفاتنها... وهو في منصب يخليه يجتمع بكل انواع الناس... هذي طريقته بالمحافظة على سمعة اهلة وبناته...



    سكت...مب لاقتناعي بالكلام اللي انقال...لكني حسيت اني المقصود... "ذيابه"... مب انا كنت من هالفئة؟ او مازلت...!!...وهالافكار خلتني اوقف ركض من دون ما ادري... تسارعت انفاسي وانا اتذكر ابشع موقف سويته او مريت فيه في حياتي كلها...!!!.... وغمضت عيوني باسف....وندم شديد.... امثال علي وايدين..يحاولون يحمون اعراضهم وبناتهم من الشباب من امثالي انا..!!!.... انا من الفئة المنبوذه من الناس... محد يقدّر او يحترم الشباب من امثالي... كيف كنت استمتع بحياة مثل هذي مادري..!!!...

    حسيت بايد عبدالعزيز على جتفي بعد ماانتبه لوقوفي عن الركض.ورجع لي يستفسر شوفيني...

    عبدالعزيز: فيك شي؟

    هزيت راسي بالنفي...وعيوني للارض...

    طال سكوت عبدالعزيز ..ويوم رفعت عيني اشوفه..لقيته يبتسم...

    عبدالعزيز: انا اسف ان كنت جرحتك بكلامي..لكني ابدا ما لمحت لك باي كلمه ومب قصدي هالشي... تدري ياناصر.. علي وانا..تربينا على الدين والالتزام.. لكن لا تفكر بان هالشي بيخلينا احسن منك باي مجال... لانك انته اقوى مني ومن علي...انته خضت امتحان..وامتحان صعب..خلاك تلتزم...والامتحان الاقوى انك تحافظ على هالتوبه وتثبت عليها... ماريد اشوفك منزل راسك خجل...اباك ترفع راسك بتفاخر بانك قدرت تتغلب على الشيطان بداخلك .. ودايما حط فبالك فكره انه مابيستسلم..وبيستمر بالاغراء... بس خلك انته اقوى منه واثبت....



    سكت...وابتسمت بامتنان...كلامه ريح اعصابي شوي... لكنه لو يدري باللي انا سويته.. بيحتقرني طول عمره... ومابكون واقف معاه هني ومرابعنه..!!... حتى لو كنت تايب وملتزم... اللي سويته انا ما ينمحي بهالسهولة... هذا اذا كان ينمحي اصلا.... !..


    اليوم: الاثنين...

    المكان: بيت بو راشد..

    الوقت: الثامنه والربع مساءا..

    -------------------------------

    (راشد)....

    بصراحه كانت سيارة سهيل فنانه.... وانا غرت... وبديت افكر اغير سيارتي انا بعد..... نزلت من سيارة عمته الاودي ...وانا اسب سهيل فخاطري لانه ماطاع يرجع معاي البيت.... اون شوو..؟؟ ناش من الفجر وتعبان... السبال..!!!... احين شو اسوي انا ارووحي..!!

    دخلت البيت ووقفت عند باب الصالة... سمعت اصوات حريم...واستحيت ادخل... خليتهن ورحت فوق ابدل كندورتي اللي خاست يوم كنا في الصناعية...

    كان باب حجرة شويخ مفتووح... دخلت.. او بالاحرى دخلت راسي بس... وابتسمت...شيخه ومهرة كانن لابسات شيل صلاة ويصلن مع بعض صلاة العشا...حليلهن...

    وقفت ثواني اتامل بويه مهرة الهادي... وكيف انها غمضت عيونها يوم انتبهت لدخولي حتى وهي تصلي... اكيد غمضت عشان تندمج في صلاتها...!!.. بس ماقدرت اتزحزح من الباب..وقفت هناك متساند اتاملها.... واتامل رشاقة حركاتها...وايدها الصغيره وهي لابسه خاتمين صغااااار ناعمات... وشفايفها الناعمة وهي تقرا الآيات بصوت واطي...

    شو هاا.!!.. عيب علي..

    تحركت ودخلت الحجرة اكثر... ادور شنطة مهرة اللي اكيد انها يابتها ... عشان احط فيها سويج السيارة..

    ويوم حصلتها عالطاولة الجانبية مسكتها وفتحتها...

    فجاه حسيت بحد يمط الشنطه من ايدي... التفت بسرعه وحصلت مهرة تسحب شنطتها من ايدي...تركت لها الشنطة وابتسمت...

    بينما هي كانت تحظن شنطتها واطالعني بعين زايغه... وتبتعد بعيد..

    راشد: شحالج مهرة...تقبل الله منج...

    مهرة: منا ومنك صالح الاعمال...

    نزلت عيونها للارض.. وبعدها نقلت عينها لشيخه اللي خلصت العشا وبدت تصلي السنه ومطنشة وجودي...

    راشد: شو اخبار الجامعه..؟

    مهرة: زينه...

    ماعرفت شو اقول لها...البنت ماتشجع أي شخص انه يكلمها....او هي بس تتصرف جي معاي..!!!..

    واللي قاهرني اني احس نفسي معجب فيها...واتاثر بتقبلها او رفضها لي...واهتم لامرها.... بينما هي كارهه حتى شوفتي وكلامي معاها....

    ليش اهتم؟؟؟....

    راشد: لا تفكرين غلط ماكنت اسرق من شنطتج شي...

    مهرة: بس كنت تفتش..!!

    زمّيت شفايفي بعصبية....انا افتش..؟؟؟...عمري مافتشت حجر خواتي من كثر الثقة....اقوم افتش شنطة بنت خالتي..!!!!!...

    رفعت ايدي بالمفاتيح...وقلت بسخرية..

    راشد: كنت ابا احط سويج سيارة عمتج...الا اذا كنتي ناوية تردين مشي لبيتكم...!!.

    رفعت نظرها لي....وبغيت اموت قهر يوم شفتها اطالعني من فوق لتحت بوقاحه...!!...شفيها هذي..؟ شو مشكلتها..!!!..

    صديت عنها بتقزز...فعلا لاعت جبدي من تصرفاتها معاي... فريت سويج السياره عالشبرية وطلعت من الحجرة وانا اهز راسي باسف....

    هي الخسرانه...اكررها للمره الالف....انا مية بنت تتمناني... منو تكون الانسه مهرة عشان ترد لي اهتمامي بمعاملة زفته مثل هذي..!!!..

    هذي انسانه مريضة نفسيا.... ودلووعه مثل ماقال سهيل....



    رحت غرفتي وانا ابذل جهدي اطرد مهرة من مخي .... بدلت ثيابي ورجعت طلعت بسيارتي وسرت للسوق اشتري شوية اغراض شخصية لي...

    -------------------------

    اليوم: الثلاثاء ...

    المكان: في صالة بيت سلطان..

    الوقت: الرابعه عصرا..

    -------------------------

    (منى)....



    سكرت عن كنه وانا مهموومه باللي خبرتني به....المشكله ان انا وهي تقريبا عديمات الخبره في امور حماية الكمبيوتر....ومانعرف فيه شي.... بس لازم حد يتصرف...مسكينه ميته من الخوف...



    يوسف..!!..

    ماشي غير يوسف...

    ركظت على الدري ودقيت الباب على حجرة يوسف ودخلت...حصلته كالعاده مثل ماتوقعت...لابس نظاراته الطبيّة ويطقطق على هالكمبيوتر ومعقد حياته..

    منى: اقوول يووسف...شو تسوي.؟

    يوسف: شو تبين.؟

    منى: ابا استشاره كومبيوتريه..!!

    ابتسم يوسف....

    يوسف: لحظة..

    وبعد دقايق..شكله سكر الماسنجر ماله وصار فاظي للكلام...

    يوسف: آمري اخت منى.... شو خربتي في كمبيوترج..!!!

    ابتسمت ....

    منى: لا الموضوع مايخصني بس ابا اسالك...

    يوسف: سالي..

    منى: ربيعتي تستخدم النت انزين..!!..واليوم تقولي حست ان كمبيوترها يخضع لعملية تفتيش...!!!!..

    عقد يوسف حيّاته وماقال شي...ويوم طال سكوتي انا بعد..سالني..

    يوسف: فسري اكثر...تفتيش كيف..؟؟

    منى: هممم..مادري هي قالت ..حسيت ان الملفات تنفتح..والفلوبي يتحرك مع اني ماشغلت الفلوبي...يعني مثل هالاشياء...

    يوسف: يمكن هاكر....

    حست انا بوزي متظايجه..هذا اللي كنا خايفين منه.....

    منى: والحل..؟

    يوسف: اكيد الكمبيوتر فيه باتش... يعني ملف تجسس...ملف يخلي الهاكر يقدر يدخل على الكمبيوتر...مثل فتحه في الايدار.. ولازم يتنظف من هالملفات...

    فجيت حلجي بغباء مب فاهمه شي.... انا فاهمه...لكني فكرت بردة فعل كنه يوم اقولها هالسوالف كلها... اكيد مابتعرف تتصرف...وبتيها هستيريا.!!!...

    فاجاني يوسف بسؤاله ونبهني من سرحاني...

    يوسف: ربيعتج مخزنه صورها في الكمبيوتر..؟؟؟؟؟

    منى: لا مب سالفه صور...لكن بحوثها وجي..كلها حاطه فيها اسمها الكامل ورقمها الجامعي... يعني...فضايح..!!

    عقد يوسف حياته اكثر...

    يوسف: قولي الصدق منّوووه... كمبيوترج هذا اللي ترمسين عنه.!!!

    منى: لا والله مب كمبيوتري... كمبيوتر كننووه...بنت عمك...

    راقبت الصراع الداير على ويه يوسف.... كنه بنت عمه..مهما صار مابيرضى عليها...لكني حسيت بان يوسف ماقاعد يفكر فيها شخصيا...يفكر باسمها...بنت عمه..واسمها مثل اسمه...واذا لحقتها فظيحه بتلحقه هو بعد...!!...

    قلت له برجاء...

    منى: ماتروم تتصرف..!!!...

    ركز يوسف نظراته على الشاشه بتركيز غريب...

    يوسف: شو تبيني اسوي يعني..!!!..خليها اطرش كمبيوترها الفورمات ينظفونه..!!

    منى: هي ماتبا توديه الفورمات تقول وايد ملفات بيظيعن عليها...

    يوسف: تقول له يخزن ملفاتها في " ديرايف دي"... وجذي مابيظيعن...

    منى: بس مب جنه المشكله هي نفسها..!!..يعني اذا مثل ماتقول فيه ملف تجسس معناته اكيد موجود في واحد من هالملفات ومدسوس...اذا احتفظت بالملفات بيتم الملف موجود...

    عقد يوسف حياته اكثر وحسيت انه متظايق من خبرتي" البسيطة" بالكمبيوتر اللي استمديتها منه هو شخصيا...!!!..

    عرف ان كلامي صحيح...ودامني طلبت منه...غصبن عليه بيدخل...

    يوسف: خلاص بشوف شو اقدر اسوي...انتي قوليلها لا تشبك النت لين ما اصلح لها الكمبيوتر....

    قلت بحماس...

    منى: شو رايك نسير اليوم..؟؟...

    يوسف: خلاص عاد منى لا تحشريني...

    منى: فدييييييتك...

    يوسف: فداج الند...

    منى: ههههههههههههههههههههه دخيلك يوووسف...

    يوسف: قلت لج بشووووف...وبعدين مب لازم انتي ترزين بالويه كل مره حد يسير عندهم...

    منى: لازم اسير عشان اكون مع منى يوم تشرح لك المشكله...

    يوسف: اظن عندها خوات...

    منى: انا اختها اكثر منهن...

    يوسف: اوهوووووووووو فكينا خلاص طلعي....

    قلت له بفضول...

    منى: منوو تغازل عالمسنجر..؟؟

    يوسف: عنبووو هالويه لج يالسباله...طلعي برا..ومالت عليج انتي وبنت عمج واللي يفكر يساعدكن...

    منى: هههههههههههههههه امزح والله امزح... يوم بتسيرلهم خبرني...

    يوسف: جلبي ويهج...

    ظحكت على يوسف اللي رجع فتح المسنجر ورجع يطقطق بعصبية... طلعت من حجرته وفكرت اني اخلي سيرة يوسف لبيت يدووه عشان يصلح كمبيوترها مفاجاه... وبتستانس يوم بيتعنّالها وبيساعدها في مشكلتها...!!


    اليوم : الثلاثاء..

    المكان: سيارة آمنه..

    الوقت: الخامسة مساءا...

    -----------------------------

    (مهرة)....

    ركبت سيارة عمتي وتنهدت بارتياح...

    مهرة: السلام عليج...

    آمنه: وعليج السلام...تاخرتي وايد اليوم مهرة..ابوج مستهم عليج...

    مهرة: شو اسوي عموووه زحمه وايد عند توزيع الجداول ..والعفسه فكل مكان...لازم بنتاخر..

    آمنة: والحين الدوام السبت الياي..!!

    مهرة: هي...

    آمنه: مابتسجلين اسمج في الباص..!!

    سكت فتره...خايفه اني اقول جوابي بالنفي وتحتشر علي عمووه بسبب التوصيله...

    مهرة: لا عمووه...خلاص لاعت جبدي من الباصات...انا بكلم ابوويه اييبلنا دريولية عشان مشاوير الجامعه شو رايج..!!

    آمنه: تراج وايد اطلبتي على ابوج هاليومين....تبين كمبيوتر وتبين دريولية ومن كم يوم سايره وخامه السوق كله...ماصارت جامعه هذي...



    على فرحتي بنتايج امتحانات تحديد المستوى..واستلامي الجدول..والحماس المصاحب.. الا انه كله طار من كلام عمتي...

    عافان الله ابدا مايشجعون الواحد يدرس..اللي يسمعها يحس انها تبا تكرهني بالدراسه وتباني اقعد في البيت.... يعني لا قعدتي في البيت مريحتنها ولا طلعتي بعد...شو تباني اسوي..؟!!!

    لكني وسعت صدري وحاولت مره ثانيه...

    مهرة: شو اسوي ماريد العوز حد منكم بتوصيلاتي... ودامني انا طلبت الكمبيوتر منه..شو رايج انتي تطلبين منه الدريولية...وانتي عندج خبره بهالامور انتي شوفيلنا دريولية مناسبه...

    آمنه: حتى لو يبنا دريولية... سيارة منو بتسوووق...لا تقولين سيارتي...!!!

    سكت عنها لان النقاش معاها مفروغ منه... ماتبا تتعاون...وماعليه انا الا اني اكلم حد من خواني بهالسالفه ...لكن بعد مايطفرون من توصيلاتي مب قبل...عشان يتعاونون معاي...

    وصلنا البيت ونزلت من السيارة وعلى طول ركبت لحجرتي فوق.. تسبحت.. ورجعت انسدح عالشبرية وانا اتامل جدولي بحماس...

    كان يبدا من 8 بمحاضرة رياضيات... وتسع عندي استراحه لين عشر..وعشر عندي محاضرة عربي.. لين 12... ومن 12 لين 1 عندي استراحه... وبعدهامحاضره كمبيوتر لين 2..وبعدها عندي محاضرة انجليزي من 2 لين 4...وخلاص..

    صح الجدول مثل ويووههم...لكن اللي عجبني ان اوقات الاستراحات مناسبه... 9 للريوق... والساعه 1 للصلاة والغدا... الحمد لله على كل حال رغم اني حاسه ان الدوام بيكون متعب...



    رجعت الجدول في الشنطه وانا اتذكر فجاه كلام شيخه امس.... بعد ما خلصت صلاتها عاتبتني لمعاملتي لراشد... وقالت لي"ابدا لا تحاولين تقارنين راشد او تشبهينه بذاك الريال اللي هاجمج... ولا تفكرين ان كل الرياييل واحد.. واطلعين حرتج براشد...لانه مايقصد الا كل خير.."

    تنهدت... ما حسيت نفسي عاملته بطريقه مب حلوه...!!..ليش قالت لي ذاك الكلام يعني...!!...

    بس المشكله اني ما اطيق اشوف الرياييل... اخواني يالله يالله اتحملهم لانهم خواني غير...اما غيرهم لا...

    ما اتحمل...كلهم ما يستحوون على ويوههم...!!

    وبعدين راشد مب محتاج انه يتكلم معاي ويدق سوالف....مب محتاج انه يسلم علي اصلا....فاحسن له يوفر علينا هالمواقف ...

    وبعدها غيرت الفكره وشليتها من بالي..وفكرت بشي ثاني...

    ابتسمت يوم تذكرت ان عليا وحمده طلعن معاي في محاضرة العربي..اما الباقي وبسبب اختلاف الكليات..ما صادف ان نكون مع بعض..والله يستر من البنات والاساتذه...

    بصراحه لين احين احس بحرج شديد وتوتر بسبب الاساتذه الرياييل...!!!... واليوم شفت كذا دكتور مواطن... الشي اللي سبب لي صدمه...

    كنادير بيض ملاحقتني وين مارووح...مابفتك انا منهم هذيل..!!.. بس رجعت وهديت نفسي بانه هذيلا ريايل متعلمين ومحترمين مب مثل معظم الشباب الوقحين...!!!

    بس تم الامل مصاحبني ودعواتي ما وقفت بان اساتذتي كلهن يكونن حريم...وتمنيت تتنفذ لي هالدعوى رغم صعوبتها...لانه 75% تقريبا من اساتذه الجامعه هم من الرياييل..هذا اذا ماكانت النسبه اكبر من جذي...!!!



    الله يستر..



    -------------------------

    اليوم: الثلاثاء..

    المكان: صالة بيت خلفان..

    الوقت: الثامنه والنصف مساءا..

    -----------------------------

    (سهيل).....

    كنت يالس اتعشى مع ابويه وسيف في الصالة جدام التلفزيوون... وانا ملاحظ على سيف هداوته من كلمته امس...!!...

    انا ماريده يزعل مني لكن لمصلحته قلت اللي قلته...!!!... لكن اللي زعلني التحفظ اللي يعاملني به...

    فاجاني ابويه وهو يوجه لي الكلام...

    بوحمد: اقول سهيل...

    سهيل: آمر ابوويه...

    بوحمد: اختك محتايه شي للجامعه نسيت شو اسمه...

    سيف: تبا كومبيوتر...

    بوحمد: هي تبا هذا...وانا ماعرف اشتري لها...

    سهيل: شو تبابه بعد الكمبيوتر...!!!...

    بوحمد: تقول حق الجامعه....

    سهيل: يووووه مهروه ماتخلص طلباتها...

    بوحمد: بعطيك فلوس وخذ لها اللي تباه ..ماعندكم غير هالاخت لا تقصرون فيها...

    سهيل: يابويه مب سالفه فلوس بس انا اروحي ماعرف الكمبيوتر الزين من الشين...

    سيف: راشد يعرف...

    سهيل: بعد بتعبلووون بالريال..!!!..

    بوحمد: مافيها شي تراها مثل اخته هو بعد....المهم خذ لها اللي تباه واذا تبا فلوس خبرني بعطيك...

    ماحبيت اناقش ابوي اكثر....

    بتفاهم انا ومهرة بعدين...عليها طلبات..!!..من وين اشتريلها كمبيوتر انا احين..!!..

    سهيل: ان شاء الله ابويه...

    وبعد ماشبعت من العشا...قمت وغسلت ايدي.... ويوم رجعت للصالة رن التيلفون مال البيت...

    وبما ان ابويه وسيف مشغولين بالعشا...وعمتي في حجرتها..ومهرة فوق... وحمد وحرمته طالعين...رديت انا عالتيلفون وانا احس بالغرااابه....لاني ابدا ما ارد عالتيلفون الا نادر...

    سهيل: آلوووه..!!

    شيخه: اوهوووووووو انا ما افتك منك مووول ياخي..!!!..

    ابتسمت ويلست عالكرسي باسترخاء... وتجاهلت الرعشة اللي سرت فكياني يوم سمعت حس هالمينونه...!!

    سهيل: متصله بيتنا وتسبين..!!..قولي عاد قولي انج مااطيقين يمر عليج اليوم ماتشوفيني ولا تسمعين صوتي...!!

    شيخه: ههههههههههههه الله يخليك....مهرة لو سمحت..

    سهيل: ادري انج ماتصبرين مافي داعي تقولين ...

    شيخه: اهااا تدري انته بكل شي ماشاء الله عليك....

    سهيل: شفتي كيف..!!

    شيخه: اكيد بعد تدري انه عيب هالكلام يطلع من ريال لبنت..!!

    انحرجت ...انا كنت امزح...!!!..واول مره شيخه تاخذ الامور بجدية...

    سهيل: بنت..!!.أي بنت..منو تقصدين..!!!

    شيخة: هاهاهاهاها.. زخّه زخّه دمّك عن يطير عنك من خفته..!!

    سهيل: تطنزين..؟!!

    شيخة: عطني مهرة سهيل بليز....

    حسيت ان مالها مزاج للكلام....شفيها معقوله زعلت مني..!!!!

    سهيل: لحظة شوي..

    خليت السماعه عالكرسي وقمت وركبت فوق وانا افكر بشويخ اللي لاول مره تكلمني بهالطريقه..!!...

    دقيت الباب على مهرة وماسمعت جواب...فتحت الباب وحصلتها راقده..وشعرها مفتوح ومنشور عالمخده..وفوق هذا راقده بلا لحاف...شكلها رقدت بدون ماتحس...

    تقربت منها وسحبت اللحاف ولحفتها... شكلها تعبانه ..!!..سكرت الليت مال الغرفه وسكرت الباب ورجعت انزل...

    مسكت السماعه ...

    سهيل: الوو...شويخ مهرة راقده الحين....

    شيخه: من الحين راقده..!!!!...

    سهيل: شكلها رقدت بدون ماتحس...قالولي اليوم لين العصر في الجامعه وشكلها تعبانه....





    شيخه: حليييلها....خلاص سلم عليها وقول لها اني اتصلت...باي..

    سهيل: شيخه..!!!...

    شيخه:.......... هلاا...!!

    سهيل: زعلتي ؟

    شيخه: من.؟

    سهيل: مني..!!

    شيخه: همممممم ليش انته مسوي شي عشان ازعل بسببه..!!

    سهيل: لا... واذا سويت شي بدون قصد....وخلاج تزعلين مني...بطلب منج انــج..

    شيخه: اني شووو..؟؟

    ابتسمت وانا ادري انها تتريا كلمه "تسامحيني.."....

    سهيل: اذا سويت شي وزعلتي بسببه...اباج ..تنقعين في درام...

    شيخه:......................

    سهيل: ههههههههههههههههههههههههههههههه.....

    شيخه: سخيف ياخي...السخافه تقطر منك تقطير...

    سهيل: والله.؟ عيل بفتح لي مصنع ...

    شيخه: بتربح من كثر السخيفين اللي مثلك...باي...

    حسيتها زعلت صدق هالمره...

    سهيل: شويخ....

    لكن الجواب كان رقعه معتبره من التيلفون...فويهي...!!..بغيت امووت من الظحك...

    لكن شويخ بتزعل الحين بس بتنسى بعدين....انا اعرفها...!!..



    واحبها...



    ما اقدر اخدع نفسي او اقنع نفسي بالعكس بمجرد اني اتجاهل شعوري صوبها....



    لكني متاكد من اني بالنسبه لشويخ مجرد...اخ...


    اليوم: الاربعاء...

    المكان: بيت ام سلطان.. (الجدة)..

    الوقت: الخامسة عصرا...

    ----------------------------

    ( يوسف)....



    وقفت سيارتي جدام بيت يدووه... وبحركة سريعه من عيني لاحظت غياب سيارة مايد...اوففف ياهي حااله..!!.. فاجاتني منى اللي قاعده عدالي متحمسه...

    منى: يالله مابتنزل...؟!!

    يوسف: مايد مب موجووود..!

    منى: وشوو تبا مايد انته يمكن ايي بعد ماتصلح الكمبيوتر...

    مديت ايدي للسدة اللي بالوسط وفتحتها..وطلعت منها سيديّات يمكن احتاجها...وبرامج حماية ناوي اركبهن على كمبيوتر هالخبله...!!... ونزلنا...

    خليت منى تجدمني للبيت عشان تسوي لي درب..ويوم دخلت للصالة ...شفت نوره وعايشة اللي في الثانوية بس هناك...

    يوسف: السلام عليكم...

    نزلت عيوني للارض... وانا اسمعهن يردن سلامي...

    يوسف: شحالكن..؟؟

    نورة وعايشة: بخير وسهاله شحالك انته ؟

    يوسف: الحمد لله بخير...عيل وين مايد وقوم يدووه..؟؟

    نورة: مايد شل يدووه وامي وكنووه ولطوووف وساروا العزبه من الساعه 3...

    منى: لااااااااااااا...كنوووه في العزبه..؟؟ عنلاااااتها زاد نحن يايين عشانها...

    عايشة: يايين عشانها؟ ياسلاااام..

    نورة: ليش يايين عشانها..؟؟ اقرب يوسف استريح...

    ييت انا ويلست عالكرسي بينما اسمع منى تشرح المشكله باختصار لنورة وعايشه...

    ساعتها ابتسمت نورة ابتسامه خبيثه...

    نورة: اهااااااا عشان كمبيوتر كنه عيل..!!..تمام...تعالوا تفاولوا اول عقب سووا اللي تبغونه...

    يوسف: لالا نورة مشكووره..جان منى تبا تتفاول كيفها بس انا مستعيل.. بس ودوني صوب الكمبيوتر وانتوا برايكم..

    نورة: مايصير ياولد عمي...!!

    يوسف: بلى يصير انا مب غريب...

    ووقفت ..وانا اترياهم يقودوني للمكان اللي فيه الكمبيوتر...

    راحت منى وعايشه جدامي لحجرة كنه..ودخلن قبلي عشان يغطن الصور ويبعدن أي شي شخصي ممكن انه يشكل حرج لي ولكنه...وبعدها دخلت.... وتفحصت بعيني حجرة كنه الصغيره والحميمة في نفس الوقت...حسيت بالحرج من اني داخل حجرتها... لكن لاباس ...يلست عالكمبيوتر وشغلته وقعدت منى عدالي...بينما عايشه استحت وطلعت...

    يوسف: سيري يلسي عند بنات عمج انا يمكن اطول وبعدين ماريدج تزعجيني عشان نخلص سرعه...

    منى: يالله عاد بيذلنا عشان هالخدمه...

    يوسف: هي بذلج كيفي..طلعي...

    منى: انزين...لا تفتش وايد عاد....

    قالت منى هالتهديد وطلعت من الغرفه..بينما انا بديت شغلي بالكمبيوتر...وابتعدت عن فتح أي ملف شخصي.. مب لشي..لكن حفظا للخصوصيات...ولاني بعد ماكنت مهتم...

    بعد دقايق دخلت نورة الغرفه ...بروحها..وخلت الباب مفتوح...

    نورة: ياحظك..!!

    وابتسمت...

    وانا عقدت حياتي...

    يوسف: ليش ياحظي..!!!!

    نورة: قدرت تدخل الكمبيوتر الممنوع علينا كلنا..

    ابتسمت انا..

    يوسف: هههه ما اشوف فيه شي مثير للاهتمام ذاك الزود عشان تستخدمنه..!!!

    تساندت نورة عالمكتب بطريقة ماعجبتني ..وفي نفس الوقت..وترتني...

    نورة: يمكن لانك مافتشت عدل...!!

    وابتسمت بخبث... وانا اظايقت من تلميحها...

    يوسف: مافتشت اساسا ولا اريد افتش...

    نورة: ههههههه ليش تفوت الفرصه....صدقني بتحصل اشياء تستغرب من وجودها...

    عقدت حياتي اكثر بفضول..

    يوسف: عطيني سبب واحد يخليني افتش خصوصيات غيري...!!..

    نورة: همممم..يمكن لانه الخصوصيات هذي تتعلق فيك...!!..



    صدمني كلامها...وباختصار..بلعت لساني...ونسيت الحروف...!!

    شو قصدها نورة بان خصوصيات كنه تتعلق فيني..!!!....

    نورة: ناصر فبوظبي.؟؟؟

    خذت وقت لين استوعبت سؤالها...

    يوسف: هي..

    نورة: بخليك فشغلك..

    وطلعت نورة وخلتني وسط ملايين التساؤلات...!!..

    وبدون ما اقدر اقاوم...بديت بالتفتيش ...مره ثانيه...لكن هالمره في الملفات الشخصية... ادري مابسامح نفسي على هالشي..لكن لازم اعرف الجواب والا بيتم فخاطري...

    فتحت الدوكيومنت.. كانت فيه فولدرات الصور والاغاني والبحوث..مافيها شي مهم وشخصي...

    .وحصلت فولدر اسمه"خاص" ... فتحته وحصلت فيه عدة فولدرات فرعية... باسماء مختلفه... واللي شد انتباهي..فولدر اسمها "رحلات"... فتحته حصلته مليان صور...

    مب أي صور...

    صوري انا بالذات...في رحلات مختلفه للعايلة من سنين.... صلالة...التخييم في البر.... ويوم سرنا كلنا السعودية للعمره.... وصورة ثانيه شخصية هي اخر صورة صورتها انا قبل سنه ونص تقريبا في الاستيديو...



    شعوري كان لا يوصف... شو معناته هذا كله..؟؟؟ ليش صوري انا...!!!... طلعت من الفولدر ودخلت فولدر ثاني حصلته مليان خواطر...قريت ثلاث منها...كلها تتكلم عن الحب من طرف واحد...

    حطيت ايدي على ويهي في محاولة اني اصحصح...واتاكد من اللي اشوفه...!!!..

    شو معناته هذا كله ..!!!...

    طلعت من هالفولدر ودخلت فولدر ثاني اسمه " تواريخ وارقام"... دخلته حصلت فيه ملف واحد للقراءة...فتحته...

    كانت هالجمله تتصدر الملف... " عذرا لبقية التواريخ...بدئت بتسجيل الاحداث المهمة فور ادراكي بانني احب..!!"

    وكان اول تاريخ هو تاريخ يوم ميلادي انا....وبعدها على طول تاريخ يرجع ست سنوات تقريبا يوم دخلت المستشفى لاستئصال الزايده...

    بعدها تاريخ استلامي الليسن...

    وبعدها تاريخ تخرجي من الثانوية العامة بنسبة 84,7% ...

    وبعدها استلامي هدية نجاحي اللي كانت سيارة نيسان من ابوي مناسبة نجاحي...

    وبعدها تاريخ دخولي الدوره في الجيش... وتاريخ طلعتي منها...

    تاريخ دخلتي الجامعه...

    واخر تاريخ كان قبل يومين...ومكتوب تحته " تاريخ مب مهم..لكن عشان خاطر جملة "سلمتي..وفدوة عن راسج"...



    سكرت الفولدر الاصلي كله بالملفات المفتوحه كلها..... ماقدرت اتحمل هالكمية من المعلومات دفعه وحده...!!!..

    مديت ايدي ومسكت رقبتي.. ..وحاولت اني اهمزها شوي عشان اخوز التوتر والتصلب اللي صابها...!!.

    مستحيل...

    مستحيل كنه تحبني انا....مب بس تحبني هذي مهوووسه..!!..والا كيف تحتفظ بكل هالملفات عني...!!..صور وخواطر ...وتواريخ .!!!... تواريخ انا نفسي ما اذكرها....

    من وين يابت كل هالمعلومات..!!...

    منى... محد غيرها مسودة الويه...

    لكن المهم في الموضوع هذا كله مب منوو خبر كنه عن تفاصيل حياتي.!!..المهم هو انه كنه تحبني انا...ومن سنين...!!..

    وانا مادريت شي عن الموضوع الا احين...!!!...








  2. #52
    عضو فضي
    الصورة الرمزية إماراتيه كلي فخر
    الحالة : إماراتيه كلي فخر غير متواجد حالياً
    رقم العضوية : 42683
    تاريخ التسجيل : 07-10-09
    الدولة : الإمارات
    الوظيفة : طالبة
    الجنـس : انثـى
    المشاركات : 233
    التقييم : 16
    Array

    افتراضي رد: {مــوعد مـع الســعادهـ} قصه من الامارات روعه كامله


    جــــــــــااآآآاااآآآري القراااآآآاااآآآآءة






  3. #53
    عضو فضي
    الصورة الرمزية إماراتيه كلي فخر
    الحالة : إماراتيه كلي فخر غير متواجد حالياً
    رقم العضوية : 42683
    تاريخ التسجيل : 07-10-09
    الدولة : الإمارات
    الوظيفة : طالبة
    الجنـس : انثـى
    المشاركات : 233
    التقييم : 16
    Array

    افتراضي رد: {مــوعد مـع الســعادهـ} قصه من الامارات روعه كامله


    رووووووعهـــ أبا التكملهـ
    فضووول ابا اعرف شو بيستوي






  4. #54
    عضو جديد
    الحالة : همس الورد غير متواجد حالياً
    رقم العضوية : 880
    تاريخ التسجيل : 28-01-08
    الجنـس : انثى
    المشاركات : 8
    التقييم : 10
    Array

    افتراضي رد: {مــوعد مـع الســعادهـ} قصه من الامارات روعه كامله


    تسللمييييييييييييييييييييين عالقصة الفنتك






  5. #55
    عضو مجتهد
    الصورة الرمزية damascus star
    الحالة : damascus star غير متواجد حالياً
    رقم العضوية : 22022
    تاريخ التسجيل : 13-10-08
    الدولة : UaE
    الوظيفة : طالبة ثاآآآآآنوية
    الجنـس : انثـى
    المشاركات : 87
    التقييم : 25
    Array
    MY SMS:

    في ناس قلوبها ذهب وناس قلوبها نحاس وناس كلامهم دوا وناس كلامهم رصاص.

    افتراضي رد: {مــوعد مـع الســعادهـ} قصه من الامارات روعه كامله


    اتريا التكملـــــــــــــــــــــــــــــــــــــة





    ŅŎ ŜĨĜŅ
    keep quit

  6. #56
    عضو فضي
    الصورة الرمزية إماراتيه كلي فخر
    الحالة : إماراتيه كلي فخر غير متواجد حالياً
    رقم العضوية : 42683
    تاريخ التسجيل : 07-10-09
    الدولة : الإمارات
    الوظيفة : طالبة
    الجنـس : انثـى
    المشاركات : 233
    التقييم : 16
    Array

    افتراضي رد: {مــوعد مـع الســعادهـ} قصه من الامارات روعه كامله


    يلا ابا التكمله
    بلييييييييز






  7. #57
    موقوف
    الصورة الرمزية مريم سعيد علي
    الحالة : مريم سعيد علي غير متواجد حالياً
    رقم العضوية : 46015
    تاريخ التسجيل : 31-10-09
    الدولة : أكيـد .:*×*:.إماراتية
    الوظيفة : بعدنيـ.:*×*:.صغيرونهـ
    الجنـس : انثـى
    المشاركات : 102
    التقييم : 20
    Array
    MY SMS:

    ••• يـــٍآٍأحلــى اسمٍـٍـٍ ••• و لكـٍٍـٍ ياآا وطنٍـٍـٍ ••• غنتـٍـٍ طيور ••• يآأجمل علمـٍـٍ ••• بسمآا مرفووعـٍـٍ

    افتراضي رد: {مــوعد مـع الســعادهـ} قصه من الامارات روعه كامله


    ثااآنكس على القصة

    الصراااااحة انا قارتنها قبل روووووووووووووعه هالقصة

    من أحلى القصص الى قريتهن

    انصحكم تقررونها

    O0:.:O0:.:O0:.:O0:.:O0:.:O0:.:O0::





    رجعوووووووووووووووووووووووووووووولي تواااااااااااااااااااااااااااااااااائمي
    سووووووووووووووووووووبر و سلعااااااااااااااااااااااااااااااااااااااااااااااا ااااااااااااي













    آلنــآس ڪلـن عَلــےَ طبعَـــﮧ ۈمنهــآجــﮧ
    ۈ آنــآ عَـن آلنـّآس مـآبــﮧ شي يفرقنـي


    إلآ إنـي دآيـم أحَـب آلـصـدق ۈأۈآجــﮧ
    مـخلـۈق ۈآلله عَلــےَ هـآلـۈضعَ خـآلقني


    حَٺـــےَ رفـيقـي ضمـآد آلقلـب ۈعَـلآجه
    عَلــےَ ڪـثـر مـآ آٺمسـڪ فيــﮧ صـدقني


    لـۈ أدري إنــﮧ مـرآفقنـي عَلــےَ حَـآجه
    لأمـسـڪــﮧ حَـآجـٺــﮧ ۈأقـۈل فـآرقـني
    [/CENTER]


    >>>>>>> مريوووم

  8. #58
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 446
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اسفه حبايبـــي اتاخرت بس جنت مشغولــه والحين بنزل

    ^____^






  9. #59
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 446
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    الجزء الخامس عشر


    ------------------------

    اليوم: الاربعاء...

    المكان: غرفة كنه..

    الوقت: السادسة مساءا...

    -------------------------

    (يوسف)....



    بعد ماخلصت من تنظيف الكمبيوتر من ملفات التجسس..وحطيت له برامج حمايه...مديت ايدي وخذت ورقه صفرا من اللي يلزقن وكتبت عليها بعض الارشادات لكنه..واشياء لازم تحطها في بالها يوم تستخدم النت..

    وبعد ماخلصت لزقتها عالشاشه... وتاملتها لدقيقة...

    رجعت سحبتها وكتبت في اخر الورقه.." أي استفسار..حاضرين... راسليني على ايميلي... ".. وكتبت لها ايميلي اللي ما استخدمه في المسنجر...

    ما ادري ليش كتبته لها.... شي في داخلي اجبرني... بعد ماعرفت اللي عرفته... وبانه كنه تحبني وااايد وساكته من متى... مادري...حسيت بتعاطف معاها...خصوصا باني مريت بتجربة حب فاشله...

    ما اقدر اقول اني اعرف اللي تحس فيه كنه من تجاهلي لها كل هالسنين...!!.. لاني ما حسيت بالحرمان من وضحه الا من كم يوم بس..!!..

    بصراحه ما اقدر افسر لكم شعوري... لاني انا نفسي مب فاهم.....

    رجعت لزقت الورقه الصفرا الشاشه...وقمت وطلعت من الغرفه....ونزلت تحت...ووقفت مكاني..حصلت منى تسلم على يدووه وام مايد ولطووف..وكنه...

    وبشكل غريب..تجاهلت الكل وركزت نظري على كنه اللي مستانسه يوم شافت منى...

    يوسف: السلام عليكم...

    تحولت العيون كلها صوبي...بالاضافه لعيون كنه العسلية...بنظرة متفاجأة... وفرحانه...لاحظتها تتحجب بسرعه بينما انا مشيت ليدووه اللي قاعده ترحب بي وسلمت عليها...وسلمت على ام مايد...

    ام سلطان: شحااالك يابووويه عساك طيب..؟ وشحال اهلك..

    يوسف: كلهم بخير وسهااله يدووه يسلمون عليج....

    ام مايد: شو هالمفاجاه الحلوه يا يوسف...!!..ماخبرتونا انكم بتونا والا ماسرنا العزبه...!!

    حسيت بويهي محترق بسبب احساسي بنظرات كنه المركزة على ويهي... !!..من قبل ماكنت انتبه...لكني فجاه صرت حساس لاي حركه تبدر منها...!!..

    يوسف: هههههه ياييين بحملة انقاذية لكمبيوتر بنت عمي..

    سمعت شهقة كنه... وظحكه منى... بينما ام مايد عقدت حياتها..

    ام مايد: شقايل مافهمت عليك...

    يوسف: كنه كان كمبيوترها خربان وييت اصلحه لها...

    ام مايد: هيي فيك الخير يايووسف...ماقصرت عبلت عليك هالخبله...

    منى: لا عمووه ماكانت تدري كنوووه...انا قـــ,,,

    وانقطع كلام منى لانه كنه سحبتها من ايدها بقوو لين الصالة الثانيه...ابتسمت...الظاهر كنه بتسوي مع منى تحقيق...خلها تستاهل...!!.. اكيد كنه خايفه من اني اشوف ملفاتها واكتشف اللي داستنه....

    يوسف: وين مايد عيل؟

    ام مايد: مايد سار الميلس بيتمسح هناك لصلاة المغرب ...

    يوسف: خلاص عيل انا بسيرله وعقب الصلاة بيي اشل منى...

    ام مايد: ليش يايوسف تعشوا عندنا...!!

    يوسف: غير المره ان شاء الله عمووه...هالمره مستعيل انا شوي...يالله اسمحوولنا...

    وطلعت من البيت ورحت للميلس عند مايد....

    ----------------------------

    اليوم: الاربعاء ...

    المكان: صالة بيت خلفان...

    الوقت: الثامنه مساءا...

    ------------------------------

    ( مهرة)....

    كنت يالسه اسولف مع عفرا في الصالة يوم رن التيلفون فجاه....

    مهرة: آلووووه...

    سهيل: مهرووووه...

    مهرة: هلا سهيل..شوفيك..؟

    سهيل: اقوولج...فظّـي المكتب اللي فحجرتج...

    مهرة: ليش..؟؟

    سهيل: يايبلج كمبيوتر ومستلزماته....



    شهقت..بغيت اموووت من الوناسه....

    مهرة: واللــــــــــــــــــــــه..!!!...اللــــــــــه. ...متى اشتريته..؟؟

    سهيل: من شوي...انا دفعت وراشد اللي اختار لاني ما اعرف لهالسوالف....

    نص وناستي اختفت بسبب ذكر اسم راشد....

    مهرة: اهاااا...

    سهيل: المهم نحن بني الحين نركبه لج سوي اللي قلت لج عليه...باي..

    مهرة: باي..

    سكرت عن سهيل....

    عفرا: شوو بلاه سهيل..؟؟

    صديت صوبها وانا مبتسمه ورجعت لي وناستي مره ثانيه...

    سهيل: سهيل اشترالي كومبيوتر...يقول بيي الحين هو وراشد ولد خالووه عشان يركبونه لي...سمحيلي عفرا بسير ارتب المكتب واسوي مكان للكمبيوتر...

    عفرا: مبرووك الكمبيوتر...وبرايج سيري انا بسير اتسبح ...



    تفارقنا انا وعفرا ..وتوجهت انا لغرفتي...رتبتها عالسريع... ورتبت المكتب وانا كللي حماس...ورحت ادور بلك كهربا كبير وزين عشان يركبون الكمبيوتر عليه...وجهزت كل شي ورجعت انزل تحت...اتريا سهيل يوصل...

    وبعد دقايق..توقفت سيارة سهيل اليديده الرنج...ونزل منها هو وراشد..وراحوا للدبه ورا ورجعوا كل واحد شال له كرتووون...

    الله...مت من الوناااسه...ماتوقعت طلبي يتنفذ بهالسرعه...!!..

    فتحت لهم باب البيت....قالي سهيل..

    سهيل: سيري هاتي الماوس والكيبورد والسماعات من الدبه...

    عطاني هالامر ودخل قبل راشد...بينما راشد وقف شوي وهو يطالعني بنظرة مثل نظرة العتاب او الزعل..

    راشد: السلام عليكم...شحالج مهرة.؟

    مهرة: وعليكم السلام...بخير الحمد لله.... شحالك انته؟

    اجبرت نفسي اسلم عليه بشكل لائق عشان خاطر شيخه... ما ادري ليش احس بالنفووور ...وكل هالنفور اللي سببه لي ذاك الحقير..يطلع فويه راشد حليله...لكن غصبن عني....ادري هو ماسوابي شي لكن غصبن عني...!!

    راشد: شو حالي انا..؟؟ .....مستغرب..!!

    عقدت حياتي...

    مهرة: من شوو.؟

    راشد: من انج سالتيني عن حالي...

    بعد هالجمله خلاني وراح ورا سهيل وركبوا فوق لغرفتي ..... وانا طردت التساؤلات من بالي...راشد هذا خبل...

    ورحت للسياره ويبت بقية الاغراض ورحت وراهم فوق...

    حصلت سهيل يالس عالشبرية بينما راشد يركب وايرات الكمبيوتر وعلى ويهه تقطيبه... خذ مني سهيل الاغراض وحطهن عالمكتب..وانا يلست بعيد اراقب بحماس...

    وبعد ماخلصوا شغل راشد الكمبيوتر ويلس عالكرسي...

    راشد: تعرفين تستخدمينه؟

    ادركت ان الكلام موجه لي...

    مهرة: يعني شوي..تعلمت عليه شوي في المدرسه...بس بشكل سطحي يعني..

    راشد: تعالي..

    ترددت... بينما سهيل سكت وهو يراقب الوضع ...ويوم لاحظوا ترددي ...رفع راشد نظرة لي وهو يطالعني بفضول ..بينما سهيل قال بضيج..

    سهيل: سيري خليه يعلمج محد فبيتنا يعرف للكمبيوترات عدل...

    تحركت ببطء ووقفت ورا كرسي المكتب الي قاعد عليه راشد...ووقف عدالي سهيل وهو يتابع الشرح بفضول واهتمام...

    قعد راشد يشرح لي بسرعه وحصلت صعوبه في اني اتابع معاه لكني سكت ولا قلت شي..عشان مايقول عني غبية....وجمعت اكبر قدر من المعلومات منه باللي قدرت عليه... وبعد ماخلص ...

    راشد: المايكروسوفت اوفيس بيعلمونج اياه في الجامعه اظن... واي مشكله تقدرين تسئلين شيخه... هي بتعلمج كل شي لانها تعرف له عدل...

    مهرة: اووكي...مشكور..

    قام راشد من الكرسي وابتعد...وملامحه جامده ومتباعده....

    راشد: العفو... يالله سهيل روحنا...

    طلع هو وسهيل بسرعه من الغرفه كانهم كارهين يقعدون فيها... لكني صرفتهم من بالي ويلست عالكمبيوتر افتش والعب واستكشف..






  10. #60
    عضو فضي
    الصورة الرمزية بنوتة العراق
    الحالة : بنوتة العراق غير متواجد حالياً
    رقم العضوية : 43114
    تاريخ التسجيل : 11-10-09
    الدولة : عرااااقيـــ بالامارت ــه
    الوظيفة : طالبــــ مدرسهـ الكئابهـ ـــــه
    الجنـس : انثـى
    المشاركات : 446
    التقييم : 10
    Array
    MY SMS:

    كــلــي لـعـيـونـك أســيــر

    افتراضي رد: {مــوعد مـع الســعادهـ} قصه من الامارات روعه كامله


    اليوم: الاربعاء..

    المكان: بيت سلطان..

    الوقت: الثامنه والنصف...

    -------------------------

    (ناصر)....



    وقفت سيارة ابويه الستيشن في الغراج وانا مستانس يوم شفت سيارتي المورسيدس انهم صلحووها وردوها البيت ... نزلت من السياره وشليت شنطتي... ودخلت بيتنا....

    اول مادخلت الصالة شفت يوسف وابويه ومحمد اخويه وسلطان الصغير..قاعدين يتعشووون... بينما منى وامي وميثا حرمه محمد وفي ثبانها شمسه الصغيره.. يالسات بعيد شوي يسولفن....

    عقيت شنطتي عالارض وحطيت ايدي فخواصري...

    ناصر: ليش اتعشووون عني؟؟.... انا يوعاااااااااان....!!!

    كلهم صدوا صوووبي متفاجئين والابتسامه على ويوههم...

    ام محمد: هلا والله بولدي الغالي....

    ابتسمت...وسلمت عليهم كلهم....كنت فرحان بشوفة الفرحة على ويوههم يوم وصلت.....

    يلست بين ابوويه ومحمد اخوي وانا اطالع ويهه...

    ناصر: خازت الحمجه عنك..؟؟؟

    محمد: لا تذكرني خلني ناسي...والله اني مفتشل..

    ناصر: ههههههههههه ليش عاد..؟

    محمد: منقهر من اني شكبري وبعد يتني الحمجه...!!

    يوسف: يالله عليك يامحمد...عاادي مافيها شي...

    ابو محمد: اشوفك استويت دلووع...!!!..

    نقعت انا من الظحك على كلمة ابويه.... لانه عمره مايبزي الاولاد...البزا كله للبنات...شما اختي العوده..ومنى اختي الصغيره...

    ناصر: شفت سيارتي في الغراج...منو عابلها..؟؟

    يوسف: محمد خلصها لك ويابها امس...

    ناصر: مشكوور يامحمد ماتقصر...

    محمد: ماسوينا شي... بس عاد لازم تسلفنا اياها نكشخ بها فيوم..

    ناصر: ههههههههه فالك طيب...

    محمد: فالك مايخيب...

    ابو محمد: بتسير ويانا باجر المزرعه..؟؟

    عقدت حياتي...

    ناصر: منو بيسير...؟

    يوسف: ابويه وانا وامي...ومنى تلصقت فينا بعد...

    ناصر: شو تسووون كلكم هناك..؟

    ابو محمد: نتفرّي...ونتابع حلالنا...وامك تبا تشيّك عالنخل...

    يوسف: وانا مخلي الدراجه هناك بعد...

    وغمز لي يوسف بخبث...

    وابتسمت انا...

    ناصر: ان شاء الله بنشوووف...محمد ليش مابيسير..!!!...

    محمد: انا بودي ميثا دبي تتشرا لملجه اخووها...

    ناصر: ليش متى بيملج مايد..!!!..

    يوسف: الاسبوع الياي...

    ناصر: مستعيل ماشاء الله عليه....يالله بالبركه...

    يوسف: وانته متى بتعزم..؟؟

    رفعت نظري ليوسف...

    ناصر: اعزم على شووو..؟

    يوسف: عالعرس...ترا امي حشرتنا عليك...

    ابتسمت ...

    ناصر: جانك مستعيل عالعرس عرس لا تترياني انا...

    بومحمد: وليش ان شاء الله...؟؟ شو عندك انته ماتبا تعرس هااااااه..؟؟!!...

    ناصر: يابويه الله يهديك ليش تفاتن..؟؟.. لا تفتحولي هالسالفه احين...

    بومحمد: ليش عاد ليش ماتبا تعرس...

    ناصر: اتريا حد غيري يعرس وعقب انا بعرس..

    بومحمد: ومنوو هذا اللي تترياه يعرس...؟!!..

    ناصر: يوم بيعرس وبفتك منه بقوولكم احين خطبوولي...بس تريووا علي شوي...

    اطالعني ابويه بنظرة معصبه وهو مب فاهم شي من كلامي.... ويوسف ومحمد كانوا يطالعوني باستغراب بعد....

    بومحمد: والله انك مب صاحي...



    وكملنا عشانا بصمت... دايما دايما يستلمووني اول ما ايي من بوظبي...مايتريوووني لين ما ارتاح شوي وعقب يبدون تحقيق... تراني صدق ببدا اعاف الرجعه للبيت بسبب اطباعهم هذي....

    تنهدت بظيج... المشكله اني ما اقدر اشرح لهم...

    ان الشخص اللي اترياه يعرس هو بنت عمي نوره...!!...

    لاني باختصار..ادري ان امي وكل العايله تتوقع اني اخذها هي في النهاية...

    لكني ماريدها..مالي خاطر عليها..صحيح هي حلوه وايد...لكن نفسها خبيثه ...واحسها راعية مشاكل...وانا يوم ابا اعرس ابا ارتاح مب اييب لي المشاكل اكثر..!!!...

    بس كيف اقولهم هالكلام...!! بيعطوني محاضره وسين وجيم... وبيكلموني عن بنت العم اليتيمه اللي انا احق بها من الغريب وكيف يخلونها تروح بيوت ناس غرب وانا موجود وغيره من هالخرابيط....

    عشان جي بسكت...لين ما اييها نصيبها وتعرس...ساعتها بقول لامي تخطب لي...

    اما نوره لا....من سابع المستحيلات اني اخذها...


    اليوم: الاربعاء..

    المكان: صالة بيت سلطان..

    الوقت: التاسعه مساءا..

    -----------------------------

    (منى)....



    سحبت التيلفون بعيد عن الصالة ورحت اتكلم في الممر... اخواني كلهم متيمعين في الصالة يسولفون ...وماريد حد يسمع كلامي خصوصا يوسف...

    توقيت كنه بالاتصال كان غير مناسب ...بس انا مقدره موقفها...وحاسه بالخووف اللي هي حاسه فيه....

    المشكله اني ماكنت ادري بانها تحتفظ بكل هالامور في الكمبيوتر عندها..اون ماخبرتني عشان ماتبين لي شكثر هي تحب اخووي...تخيلوا البقرة كييف تفكر..!!..

    احين الله اعلم اذا يوسف شاف هالامور والا لا....



    كنه: ماقالج شي..؟؟ مالمح لج باي شي...

    منى: قتلج لا كنووه موول مارمس عن شي....ماظني انه فتش ملفاتج الشخصية....

    كنه: شو دراااج يمكن فتش وساااكت...!!..ياوييلي ياويلي يامنى لو كان يدري بموت...!!

    منى: بسم الله عليج لا تموتين ولا عندج خبر.... بس انا سالته في السياره...قالي انه فتش ملفات الويندوز وجي ومادخل للدوكيومنت ابدا...

    كنه: انا حاسه انه يجذب عليج....

    منى: يجوز...بس يوسف مايجذب...مب من عادته يعني...

    كنه: والله اتمنى...أي شي ولا انه يدري عن شعوري بهالطريقه....يالله قمة في الاحراج..!!

    منى: انتي لاحظتي شي تغير عليه اليوم يوم شافج.؟؟

    كنه:........ لا... انا بروحي كنت متوتره يمكن ماانتبهت...

    منى: انا مالاحظت أي تغييير....اطمني...

    كنه: ياريت...انزين وشو اسوي بايميله اللي عطاني اياه...؟؟ شو رايج اظيفه عالمسن والعب عليه...!!

    منى: ياوييلج تكونين غبية ان ظفتيييه....

    كنه: ليش؟

    منى: شو دراج يمكن هذا اختبار منه اذا كنتي تظيفين شباب او لا...

    كنه:..والله..!!..شو شباب بس هذا ولد عمي غير...!!

    منى: نفس الشي تراه ريال...وعلاقتج فيه مب اخوية وانتي تعرفين هالشي..!!

    كنه: شو اسوي عيل؟

    منى: طنشيييه...مادري بصراحه ليش عطاج الايميل...غريبه يعني...بس يمكن قصده شريف...وفعلا يمكن يقصد انج اذا احتجتي مساعده في مشكله بس تراسلينه مب للسوالف يعني....!!

    كنه: اتمنى يكون عطاني الايميل عشان اظيفه واكلمه لانه هو يبا يكلمني....يااااااي...

    منى: ههههههههههه ياسلام عليج عيشي في الاحلام...

    كنه: اكرهج...مفسدة الملذات انتي....يعني ما اظيفه...؟؟

    منى: لا لا تتخبلين...

    يوسف: منو هذي اللي بتتخبل..!!!..



    نقزت يوم سمعت صوت يوسف عدالي...وبطلت عيوني على وسعهن...متى يا هذا...ما انتبهت له...!!!...

    وسمعت صرخه كنه بعد في اذني...وهالشي خلاني ابعد السماعه شوي عن اذني..وعيوني معلقه بويه يوسف الساخر...

    منى: هااا....آآآه..محد...ارمس كنوووه...

    وقف يوسف جدامي وقال بتسلية...

    يوسف: زين كومبيوترها الحين..!!!

    منى: يقولج زين كومبيوترج الحين...!!!

    كنه: هههه قوليله هي زين ومشكووور وااايد...

    منى: تقولك زيين ومشكور وايد....

    يوسف: شكرتني تراها في البيت....!!..

    منى: انزين عافان الله تشكرك مره ثانيه...

    يوسف: بيسيرون باجر ويانا المزرعه..!!!

    استغربت من سؤاله... هو يدري بان نحن ماعزمنا حد...ولا فكرنا نخبر قوم يدووه بالسيره هذي..ليش يسالني.؟... يمكن يباني اقترح على كنووه بانهم يسيرون ويانا بشكل غير مباشر..؟؟... يمكن هو يباهم يسيرون ويانا...!!!..يا وناسه كنوووه لو كان هذا اللي يقصده...!!..



    منى: كنووه بتسيرون ويانا باجر المزرعه..؟؟

    كنه: فديييت صوته ياربي...يخبل..

    منى: ههههههههه ويا هالويه اسالج انا...

    كنه: هههههههههه قوليله اذا حد عزمنا بنيي..اذا محد عزمنا مابنرز بالويه...

    منى: تقولك اذا حد عزمها بتي واذا محد عزمها مابترز بالويه...!!

    ابتسم يوسف...وبعدها ظحك وعطاني ظهره وركب فوووق...وخلاني انا وكنه في حيره من امرنا....

    كنه: شوو قال..؟

    منى: هههههههههه ماقال شي..ظحك ظحكه حللللوه وروح عني فوق...

    كنه: افااا...يطنز علي..؟؟

    منى: شو تبينه يقولج... تعالي؟ يستحي اخوويه فديت شكله....

    كنه: هههههههه الله يعينا على مستحاه هذا...تعالي صدق بتسيرون المزرعه باجر؟

    منى: هيي بنسيير...شو رايج ترمسين امج ويدوووه عشان نسويها رحلة جماعية...

    كنه: يارييييييت.....قولي لعمي يرمس يدوووه وهي بتعزمنا كلنا....

    منى: ان شاء الله بقووووله... يالله الحين جلبي ويهج...بسير اقوله قبل مايتاخر الوقت...

    كنه: اقولج..يوسف وين راح ..؟ طلع من البيت؟

    منى: لا سار فوق حجرته...

    كنه: اكيد بيدش النت....

    ظحكت وانا عارفة حركات كنه عدل...



    منى: هههههههههههه طلعي هالفكره من بالج نهائيا...

    كنه: حراام خليني اجرب واظيفه....

    منى: قتلج لا....خلج عاقل...ورزين...

    كنه: على منووو بنقص...؟؟ هو يدري اني لا عاقل ولا رزين...

    منى: ههههههههههههههه يمكن يترياج تعقلين عشان يخطبج...

    كنه: والله..؟؟؟

    منى: ههههههه من شوي اسمعه يسال ناصر ليش مايعرس....قاله ناصر جانك مستعيل عرس ولا تترياني...

    كنه: ياريت.. شرط ياخذني انا....يااااي بموت من الوناسه قبل عرسي...

    منى: والله انج خبله ...ياكثر ماتفاولين على عمرج بالموت...يالله بخليج احين....ولا تظيفينه فهمتي..

    كنه: اوووكي منّـــووه...سلمي..

    منى: وانتي بعد ردي السلام على هلج...فمان الله...

    كنه: فمان الكريم عيوني...



    سكرت عن كنه وانا اظحك على خبالها.... ورجعت للصالة وكلمت ابووويه وامي عشان يعزم قوم يدوووه..وبالمره نتغدى بالمزرعه...وبيكون ونااسه.... وماعارضني.. وفعلا اتصل بها وعزمها... ويدووه قالت له بيردون عليهم الصبح اذا بيون او لا... وبعد ماسكر ابويه عن يدووه ...اقترحت امي نخبر اختي العوده شما ...بانها تتلاقى معانا في المزرعة هي بعد.... وان شاء الله تي..بصراحه لاني متولهه عليها من زمان ماشفتها..






معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 5 (0 من الأعضاء و 5 زائر)

المواضيع المتشابهه

  1. حل صفحة 12 كامله
    بواسطة جهاد يحيى في المنتدى اللغة العربية
    مشاركات: 2
    آخر مشاركة: 13-02-09, 04:29 PM
  2. طويلة : رواية أنت لي ..كامله
    بواسطة بنت العين 2 في المنتدى قصص الطويلة , الروايات
    مشاركات: 27
    آخر مشاركة: 12-01-30, 10:48 PM
  3. حلول الفزيا كامله
    بواسطة lool23 في المنتدى الفيزياء علمي
    مشاركات: 0
    آخر مشاركة: 09-11-23, 06:44 PM
  4. صور رمزيه اسلاميه روعه × روعه
    بواسطة brodk في المنتدى منتدى الوسائط Media Forum
    مشاركات: 15
    آخر مشاركة: 09-07-30, 08:35 AM
  5. أنت لي (كامله)
    بواسطة أحمد البقشي في المنتدى قصص الطويلة , الروايات
    مشاركات: 25
    آخر مشاركة: 08-07-03, 12:30 PM

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •