تنبيه :: عزيزي اذا واجهتك مشكلة في تصفح الموقع , فاننا ننصحك بترقيه متصفحك الى احدث اصدار أو استخدام متصفح فايرفوكس المجاني .. بالضغط هنا .. ثم اضغط على مستطيل الاخضر (تحميل مجاني) .
 
 
النتائج 1 إلى 3 من 3
  1. #1
    عضو جديد
    الحالة : محمد-10 غير متواجد حالياً
    رقم العضوية : 60599
    تاريخ التسجيل : 08-09-10
    الدولة : الشارقه
    الوظيفة : طالب
    الجنـس : ذكـر
    المشاركات : 12
    التقييم : 10
    Array

    افتراضي خيانة الذكرى ....... من جديد ..


    السلام عليكم والرحمه ..




    بما أن القصه انحذفت للمره الثانيه

    فاليوم ان شالله بحط جزئين وبحط جزء يديد كل ثلاثا ان شالله ...

    !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!

    الجزء الأول ...



    بدى هاليوم عادي مثل كل يوم...يرن منبه مريم وهي تدور اي شي عسب تفر الساعه وتكمل رقادها..بس تذكرت عقب ان اليوم بالذات بيكلفها المدير وبيعطيها شغل زياده...
    نشت مريم وهي لايعه جبدها وفي خاطرها تدعي على المدير انه يمرض اليوم بس عسب مايكلفها بشغله يديده...
    وكالعاده طلعت من غرفتها مستعيله وطارت على حجرة اخوها سالم... ودقت الباب الين ماتعبت شوي جان تسمع سالم اخوها يزقرها من الطابق التحتي...
    سالم..::: مريوووووووووووووووووووووم كسرتي الباب انكسر راسج...انا تحت انزلي ورايه دوام متى تبيني اوصلج؟؟
    ماردت عليه مريم سارت حجرتها ولبست شيلتها وعباتها وشلت ملفات المرضى وركضت عسب تلحق على الدوام...
    يوم وصلت تحت سلمت على امها وابوها...
    مريم::صباح الخير على الكل ...سلوم فديت اخويه ياربي يالله وصلني..
    سالم::الحينه اوصلج ..غياض انا تعبان اليوم سيري بتكسي..شو دريول اشتغل عندج كل يوم تتأخرين وانا الي يخصمون عليه..
    مريم ::سلوووووووووم شو اسوي كنت راقده يالله الله يخليك والله بيهزبني المدير تأخرت على الدوام
    سالم::يااااااااااالله خاطري يهزبج عاد اليوم انا تعبان مابظهر ولا بوصل حد...
    مريم شوي وبتصيح:: اميي ابوييه قولوله شو هالحاله كله مذله يوم ماتبوني قولوا بس لايذلني ولدكم..
    ابو سالم((وهو يضحك)):: سلوم الله يخليك وصلها ادريبها بتبنجح الحين...
    سالم ::ان شالله يابوسالم عشانك بس كم بوسالم عندنا الا واحد ويشوف مريم ويقوللها يالله شلي قشج واسبقيني السياره...
    طارت مريم من الفرحه ركضت بتسبقه السياره ...
    ركبت مريم السياره وطول الوقت وهي ترمس وترمس وترمس مب طايعه تسكت...سالم وقف السياره في نص الطريج وقالها...::مريوم انزلي من السياره...
    سكتت مريم .
    سالم::: توه حل عليج الصمخ ..؟؟اقولج انزلي...
    مريم باستعباط::جيييييييي؟؟
    سالم::شو جيه عنبوه مب طايعه تسكرين حلجج وخيبه تخيبج هذا وانتي مب متريقه لو متريقه بترمسين سنه جنج...
    مريم :::اعووووووووووووووووووووووذ بالله قول ماشالله..
    سالم وهو يضحك:: ماشالله ...الله لا يبليني بحرمه مثلج..
    مريم::بنشوفك منو بتاخذ عنتر زمانك ..يالله وصلني المستشفى بسرعه
    وصلت مريم المستشفى ...شافت راجوه الي يشتغل وزقرته..
    مريم::راجووووووووووه تعال تعال
    سار راجو عندها
    راجوه:سنو هادا كلوا انتي سوي قرقرقرقر سنو انا مافي يسمع انا يجي الحين انته سنو يريد؟؟
    سالم::وين تبييييييييييين يوم ان راجوه يهزبج..
    مريم: احم انطب انته ...اسفين عمي راجوه بس ممكن تتكرم وتشل الملفات انا مااروم..
    راجوه:جين دكتور مريم
    شل راجوه الملفات ووصل لغرفة مريم المخصصه لعلاج المرضى.. وحط الملفات على الطاوله..
    راجوه:: انته يريد سي تاني.؟؟
    مريم:لا عمي مشكور ربي يخليك ذخر للمستشفى ..
    راجوه::انا مافي معلوم انتي سنو يقول انا روح مطبخ زين..
    مريم ::انزين عمي سكر الباب وراك...
    يلست مريم على الكرسي وتمت تفرز ملفات المرضى...وهي تقرى الملفات رن تيلفونها ...ردت على التيلفون طلع الي على الخط الثاني مدير المستشفى...
    المدير::دكتوره مريم..
    مريم:نعم حضرة المدير امر....
    المدير...::ممكن ازورج في مكتبج لدقايق ابغي اكلمج في موضوع
    مريم:حياك الله حضرة المدير
    المدير:5 دقايق وانا عندج
    تمت مريم تحاتي... ياترى شو الي يباه اليوم المدير؟؟ وليش اليوم بالذات هو بيي المكتب؟؟ دومه هو الي يزقرني مكتبه ويهزبني ولا يتشرط حضرته شمعنى اليوم ؟؟؟
    تمت مريم في حيرتها فتره وقطع تفكيرها صوت الباب...
    مريم:تفضل...
    المدير.::: السلام عليكم
    مريم وقفت تستقبله::عليكم السلام هلا حضرة المدير ...تفضل...
    دخل المدير وجلس على الكرسي المقابل لمكتب مريم
    المدير::دكتوره مريم ...اممممممممممم ادريبج مستغربه من اني انا ييتج مكتبج صح..
    مريم وهي مرتبكه:بصراحه دكتور مستغربه شوي..بس خير ان شالله في شي انا غلطت فيه او في حد اشتكى علي...
    المدير::لالالاتخافين...دكتوره مريم ..طبعاً انتي تعرفين ان في بعض الاحيان يعجز المدرس من انه يحل مسأله ويغلبه الطالب في هالشي صح..
    مريم::عفواً دكتور مافهمت عليك ..ممكن توضح زياده؟؟
    المدير::دكتوره مريم.... انتي من احسن الدكاتره الموجودين عندنا في المستشفى... وكل مريض نفسي مايوثق الا فيج... وانا بصراحه مع اني دكتور نفسي من فتره كبيره ...لكني وقفت اليوم عاجز من اني احل هالمشكله ...فاتمنى انج تمسكين ملف هالمريضه ..هي مريضه يديده عندنا في المستشفى..ولكن انا ماقدرت احل مشكلتها فأتمنى انج انتي تساعدينها...
    مريم:: دكتور مشكور على ثقتك فيني ..بس انا يديده في هالمستشفى ومااعتقد اني اقدر امسك هالمسؤوليه مادام انك انته ماقدرت تسوي لهالمريضه شي...
    المدير:::قلتلج من البدايه يمكن الطالب يقدر يتغلب على استاذه... باجر ابغيج تزورين هالمريضه لانها الحين مب موجوده في المستشفى... بس ابغيج تقرين ملفها عدل ...
    مريم::ان شالله دكتور بحاول كثر مااقدر اني امسك هالحاله وعالجها..
    المدير وهو يداري دموعه::دكتوره مريم...اتمنى انج تعاملينها مثل اختج هي محتاجه اخت...
    استغربت مريم وتمت مبهته في المدير ولكنها تداركت الوضع وقالت ::ان شالله دكتور...
    المدير:: يالله اتركج عشان تقرين الملف وتاخذين عنه فكره ..
    طلع المدير..ولكنه ترك مريم في حيرتها... تمت تسولف ويا عمرها...مب معقوله ...هذا هو مدير المستشفى الي عمري ماشفته منكسر الا اليوم؟؟ شو سبب هالدموع؟؟؟ وليش هالحاله بالذات الي يبغيني اهتم فيها..
    وهي تكلم نفسها دخل راجوه الغرفه وهي ماتدري..
    راجو::دكتور مريم...انا في قول من زمان انته لازم يصير مجنون ..دكتور مريم..
    مريم::.................................
    راجو:: دكتور مريم سنو انتي نوم..
    مريم انتبهت عليه ::راجو حسيبك الله ماتخلون الواحد يفكر ؟؟ شو تبى؟؟
    راجو::دكتور اليوم انته مايريد شاي؟؟
    مريم:امبلى راجو هاتلي جاي راسي بينفجر...
    طلع راجوه... وراح ييبلها جاي ..
    فتحت مريم ملف المريضه الي كلفها بها المدير...
    وتمت تقرى فيه ..لأول مره تحس مريم انها مب فاهمه شي... سكرت الملف وقررت انها تقراه في البيت...
    الساعه 2 ونص خلص دوامها... شلت الملف معاها وطلعت ...ركبت السياره وتمت سرحانه في هالبنت...
    سالم::: ماشالله شو هالهدوء الي حل عليج.. شو عقب مافتن عليج راجوه مااشوفج رمستي..
    مريم:.......................................
    سالم:: حوووووووووووووه نحن هنا وينج...
    مريم::انا هنه ... سلووم تعرف اليوم ياني المدير واول مره اشوفه شوي وبيصيح..
    سالم::جي بلاه؟؟
    مريم::مادري حاولت اعرف لكني ماقدرت...
    سالم:....................................
    مريم:,................................
    الكل تم ساكت الين ماوصلوا البيت...
    في البيت دخلت مريم وسلمت على امها وابوها..وعلى طول سارت حجرتها..الكل لاحظ ان مريم اليوم مب على طبيعتها...
    ابو سالم::سلوم بلاها اختك::
    سالم::والله ماادري من يبتها وهي على هالحال..
    ام سالم :عن يكون حد قايللها شي في الشغل..
    سالم::مادريبها امي سيروا شوفوها...
    سارت الام عند مريم ودقت عليها الباب..
    مريم::نعم؟؟
    دخلت ام سالم الغرفه..
    ام سالم::مريوم امي بلاج من ييتي ماسمعنا حسج؟؟
    مريم:ماشي امايا بس شوي تعبانه ...من الشغل..
    ام سالم::فديتج يامي انزين مابتنزلين تتغدين..؟؟
    مريم::لا امي ابرقد يوم بنش ان شالله باكل خلولي انتوا شويه..
    ام سالم::ان شالله امي
    طلعت ام سالم من الغرفه...
    وحاولت مريم انها تنام لكنها ماقدرت تمت تفكر في الي صار اليوم ...حاولت تنام وحاولت تقرى الملف مره ثانيه لكنها بعد مافهمت شي ...كل الي شافته..تقرير طبي..قرت التقرير..شافت مذكور فيه ضرب وكدمات ...خافت مريم وسكرت الملف وانتظرت اليوم الثاني بفارغ الصبر...
    اصبح الصبح..ولاول مره مريم تنش من نومها من وقت...
    بدلت ثيابها بسرعه ولبست عباتها والشيله وشلت الملف ونزلت...سلمت عليهم ..وبعدها ماتكلمت.. كلت ريوقها وطلبت من سالم انه يوصلها الشغل لانها مستعيله اليوم..
    في السياره تمت مريم سرحانه...
    سالم:: مريوم شبلاج اليوم فيج شي انتي؟؟
    مريم وهي سرحانه::ياترى كيف بشوفها...
    سالم::منو هذي؟؟
    مريم:: يوم برد بخبرك بس وصلني بسرعه
    لاول مره سالم مايرد على اخته وصلها وهو ساكت...
    دخلت مريم مكتبها ..واول شي سوته اتصلت بالمدير وطلبت انه تشوف هالحاله ...
    المدير::مشكوره يادكتوره مريم.. تقدرين تروحيلها الحين هي في غرفه رقم 17...
    تشكرته مريم وعلى طوول شلت الملف وراحت بسرعه للغرفه...
    واخيراً وصلت مريم للغرفه... في بالها الف فكره وفكره... توقعت ان الي بتشوفها كبيره في السن وتخوف.. ولكنها كسرت كل شكوكها ودقت الباب...ياها صوت بنت من الداخل مبحوح ::تفضل
    دخلت مريم وهي ماسكه عمرها ومتوقعه المفاجأت واول مادخلت فعلاً انصدمت...
    شافت بنت في منتهى الجمال شكلها انها مايتعدى العشرين سنه... والي زادها جمال ابتسامتها الحلوه...ولكن كان هناك آثار لكدمات على ويهها ....ياترى شو الموضوع...
    حاولت مريم انه تكون عاديه...
    مريم::السلام عليكم..ماشالله شو هالحلوين الي نشوفهم الصبح
    البنت::عليج السلام..عيونج الحلوه دكتوره..شحالج ؟؟
    مريم::بخير ربي يعافيج..ممكن اتكلم شوي وياج...
    البنت حياج الله تفضلي..
    مريم::اول شي انا بكون الدكتوره النفسيه الي اشرف على حالتج..بس لاتعتبريني دكتوره اعتبريني اختج::وانا اسمي مريم
    البنت:حياج الله دكتوره مريم
    مريم::ممكن اول شي اعرف شو اسمج
    البنت::انا اسمي روضه..وعمري 20 سنه
    مريم وهي مستغربه::20؟؟؟
    روضه::ادريبج مستغربه من عمري ومستغربه كيف انا هنه وكيف هالكدمات الي على ويهي صح؟؟
    مريم:: اذا مافيها احراج بس انج تقوليلي قصتج
    روضه::اكيد دكتوره مافيها احراج لان سالفتي صارت على كل لسان وفي كل بيت ولكن ياما زادوا فيها...
    مريم:: ممكن تقوليلي السالفه..شو سبب هالكدمات وشو سالفة التقرير الطبي وليش انتي هنه؟؟؟
    ابتسمت روضه وقالت...::ان شالله دكتوره بخبرج الموضوع كله مع اني ادري ان محد بيقدر يحل مشكلتي الا المحكمه
    مريم::شو دخل المحكمه في الموضوع..
    روضه ::بقولج السالفه من البدايه ...وبتعرفين شو يدخل المحكمه في الموضوع...
    يلست مريم على الكرسي المقابل لسرير روضه ...وقالت قولي القصه الحين..
    عدلت روضه من يلستها واستعدت انها تقول القصه
    روضه::قصتي بدت من حوالي ال 5 سنين كنت في ذاك الوقت عمري15 سنه وكنت وقتها في الصف الثالث اعدادي... كنت وااايد احب خوالي ومتعلقه فيهم ...كنت احب دايماً ازور اهلي..وكنت وايد احب بنات خوالي وهم كانوا بعد يحبوني يعني كنت محبوبه من الكل بس كان خالي جاسم يحبني اكثر من اي حد ثاني ..كان يشتريلي كل الي كنت احبه وهو كان ييبني من المدرسه وكنت اغلب الوقت انا يالسه عندهم في البيت ...
    ولكن طلع لخالي شغل في جامعه برع البلاد لانه كان دكتور جامعي... بعد ماسافر صرت وايد ازور خوالي الثانيين وصرت اربع وعشرين ساعه عندهم وصرت دوم اظهر ويا بناتهم ...الين يا هذاك اليوم كانوا خوالي يالسين عندنا في البيت وانا كنت احل الواجب وخوالي كانوا يكلمون امي...شوي ودخل اخويه العود سبف..
    سيف::السلام عليكم
    الكل::عليكم السلام والرحمه..
    سيف::شحالك خالي احمد عساك بخير؟؟
    احمد::بخير الحمدالله شحالك شو وينك ماتنشاف.. لو مب رواض جان ماعرفت شي عنكم
    سيف::شو اسوي ياخالي والله مشاغل..وانته خالي خالد عساك بخير؟؟
    خالد::الحمدالله على كل حال يابويي وانته شحال شغلك ؟؟
    سيف :::والخيبه ماقلت شحالك؟؟على طول نقزت شحال شغلك؟؟
    خالد::حالك واعرفه بس الشغل ماله حال واحد.
    سيف::صدقت والله ياخالي... على العموم انا ياينكم وابطلب منكم طلب...
    ام سيف::: خير حبيبي امر...
    سيف::اممممممممممممم.. امي اباج تسيرين تخطبيلي...
    ام سيف::اخطبلك...واي فديت ولدي كبر ويبى يعرس...
    خالد::ومني هالبنت؟؟نعرفها؟؟
    سيف::لا خالي ماتعرفونها ...هذي وحده ويايه في الدوام...
    ام سيف::انزين بنت منو شو اسمها...
    سيف::مادريبها بنت منو بس الي اعرفه ان اسمها خوله...
    احمد::شقايل بعد بتخطب بنت وماتعرف هي بنت منو جي السالفه هي بس تعال وعرس ...لالا ابوي لازم تعرف بنت منو هي ...
    سيف::خالي احمد الله يخليك انا ابى البنت ولو تكون بنت منو بعد اباها ..
    ام سيف::يابوي نحنا ماقلنا لأ نحنا بس نشدناك شو اسم اهلها..شو نسير نخطب البنت ونحنا مانعرف منو اهلها؟؟
    سيف::انزين امي ان شالله بييبلكم اسم ابوها..بس حتى لو ماعيبتكم تراني اباخذها...
    ام سيف::يوم انك تبى تاخذها بدون شور خلاص ابوي جي ياي تقولي بعد هكم خوالك يسمعونك..خذهم وخذ ابوك وياهم وسر اخطبها انا شو خانتي بعد؟؟؟
    سيف::امي ..انتي الخير والبركه..بس فديتج وافقي تسيرين تشوقين البنت والله امي قلبي تعلق بها فدييييتج...
    ام سيف::بعد شو بقول..مادام انك تباها بعد شو بقول بكلم ابوك ويصير خير عقب...
    سيف::امي فديتج اقنعيه
    ام سبف::ان شالله خير
    حب سيف راس امه وخواله وسار حجرته...
    بعد ماطلع...
    خالد::اختي بصراحه ولدج لازم تكلمينه انا ماقدرت اقوله شي اخاف مايقبل مني الرمسه شقايل بعد بيخطب وحده ونحنا مب عارفين عنها شي الا اسمها؟؟
    ام سيف::شو اقدر اقوله ياخالد؟انته خبرني ؟؟سيف من هو ياهل وهو معاند الدنيا كلها...لازم يمشي الي في راسه حتى لو كان الشي الي يباه غلط..انا شو اسوي تعبت وانا ارمس
    احمد::شو بعد شو تقدرين تقوليله؟؟انتي مب امه؟؟؟مب لازم تفهمينه شو هو الصح من الغلط؟؟
    ام سيف::انا مايخصني هو كيفه ...عن بعد باجر اييني ويقولي انتي الي ماخليتيني اخذ الي اباها ...خلوه براحته..انا الي عليه..بكلم ابوه وهو كيفه يتصرف وياه...
    خالد::بتخبرين ابوووووه؟؟ يعني ماتعرفين ابوه شو بيقول...؟؟ابوه مابيرفض ..اصلاً ريلج عمره ماقال لأ لعيالج
    ام سيف ::والله كيفه هو وابوه ينيازون..انا مااااايخصني فيهم..الي يبا يعرس يعرس والي يبى اييلس كيفه..
    احمد::انتي مايخصج وابوه مايخصه ؟؟شو انتوا يايبين عيالكم ومايخصكم فيهم...؟؟؟والله مب حاله هذي..
    ام سيف::وانا شلي فيهم..الولد من هو صغير وابوه مدلعنه وكل ماقول شي يقولي مايخصج ولدي ريال ويفتهم خلاص خلوه على راحته...
    خالد::والله كيفج ولدج وانتي حره فيه..
    روضه هدت كتبها وسارت يلست عدال امها.::ماما انتي زعلانه لان اخويه سيف بيعرس؟؟
    ام سيف::لا حبيبتي انا زعلانه لان اخوج بيعرس وانا ماشفت حرمته...
    روضه وبكل برائه ::انا مابتزوج الا اذا انتي وخالي جاسم شفتوه...
    احمد::جي امي ونحنا مب خوالج؟؟
    خالد::خلها هذي حبيبة قلب خالها جاسم..
    روضه::وانا بعد احبكم..خلاص انا مابتزوج االا اذ شفتوا ريلي...
    ام سيف::فديت بنتي دومج تحبين اهلج وتدورين رضاهم ..طالعه على امج
    خالد:: ماسمعت حبيبتي على منو طالعه؟؟
    احمد وهو يضحك::على امها..وحليلها امها مول ماكان ينسمع حسها في الفريج يوم صغيره ماخليتي حد من اهلج ماضاربتيه حتى القطاوه مضاربتنهم
    ام سيف:: وحليلكم مول ماكنتوا تسوون شي بس انا الي كنت اتضارب وانتوا مول ماكنتوا تسوون شي؟؟
    يدخل ابو سيف ويقطع كلامهم....:السلام عليكم.
    الكل:عليكم السلام هلا بو سيف .
    ابو سيف::ماشالله الربع متيمعين.
    خالد::شو نسوي قلنا ني نزوركم روضوه تمت تحن الين مايينا وياها
    بو سيف::فديتها بنتي دومها تعرف الاصول ...
    ام سيف:: بو سيف ...بغيناك في سالفه
    بو سيف::خير ان شالله شو مستوي؟؟
    ام سيف:: ولدك يبى يعرس...
    بو سيف::الحمدالله يوم نطق ومنو ان شالله ناوي ياخذ؟؟
    خالد::يقول وحده وياه في الدوام..مايعرف الا اسمها..
    بو سيف::شقايل بعد مايعرف الا اسمها؟؟؟
    ام سيف:: والله عاد انا رمست وهو ملزم الا يباها.
    بو سيف::والله كيفه مادام هو يباها خلاص ياخذها وهو يتحمل عقب العرس انا الي عليه بخطبها له وهو ريال ويعرف مصلحة نفسه....المهم نشي حطيلنا الغدا تراني يوعان.
    ....
    وبعدها بأسبوع راحت ام سيف علشان تشوف البنت..ووياها حريم اخوانها خالد واحمد..وروضه عشان يشوفونها
    دخلت وسلمت على امها وخواتها وبعدها بربع ساعه دخلت خطيبة ولدها..كانت حليوه بيضا وشعرها بني فاتح يلست عدال ام سيف...
    ام سيف::ماشالله عليج يامي قمر ..
    خوله:مشكوره خالتي ماتقصرين عيونج الحلوه ...والتفتت لروضه ..
    خوله:منو هالحلوه؟؟؟
    روضه:: انا روضه اخت سيف الصغيره ..
    خوله:: اي صف سايره انتي؟؟
    روضه::بسير ان شالله اول ثانوي..
    خوله::الله يوفقج حبيبتي...
    ام سيف توجه كلامها لام خوله:: ام خوله عاد نحنا اليوم ييناكم ونبى نطلب منج طلب..
    ام خوله ::امري الغاليه خير؟؟
    ام سيف:: فديتج بغيت اخطب خوله لولدي سيف...
    ام خوله::والله فديتج الشور شور البنت انا مااروم اغصبها على شي وان شالله عقب اسبوع بنرد عليكم خبر...
    اليازيه وعليا حريم خوال روضه ماحبوا خوله حسوها خبيثه ومتكبره بس سكتوا علشان خاطر سيف ..
    وحتى خوله ماحبتهم بس كانت مجبوره تجامل لانها توها بتنخطب وماتباهم ياخذون فكره عنها...
    بعد مايلست ام سيف وسولفت ويا الحريم ..استأذنت وطلعت من البيت ..
    اول ماطلعوا من البيت على طول سارت خوله حجرتها واتصلت في سيف...
    خوله:الو هلا سيف ..شحالك ؟؟
    سيف:: هلا حبيبتي ..بشري شو استوى وافقتي ؟؟ انزين متى الملجه..
    خوله: اي ملجه؟؟ من الحين؟؟........ اصبر الين ماارد عليهم خبر اني وافقت...
    سيف:: شوووووووو جي بعدج انتي ماقلتيلهم موافقه؟؟
    خوله:: سيف... تخيل اول مايقولولي بنخطبج اقولهم وافقت جي منه والدرب السالفه؟؟؟ شو بيقولون عني ... والله هذي ماشافت خير؟؟
    سيف:: ومتى ناويين تردون خبر؟؟
    خوله::ان شالله عقب اسبوع..
    سيف:: نعم؟؟نعم؟؟؟ ماسمعت متى حبيبتي؟؟
    خوله ::شو متى حبيبتي ؟؟ اقولك عقب اسبوع
    سيف:: عقب اسبووع؟؟ جي ان شالله بتطلعون شجرة العائله؟؟؟
    خوله::هههههههه وياراسك لالا بس شكليات .. بس تبى الصدق.. انا ماحبيت حريم خوالك يلوعن الجبد كل وحده تشوفني بطرف عينها جني انا الي بخطبك مب انته..
    سيف:: مايخصج فيهن هذيل دومهن جذه ..يولن عنج.
    خوله:: اقول سواف..بسألك ؟؟
    سيف:: امري عيون سواف..
    خوله::ان شالله يوم بنتزوج وين بنسكن؟؟
    سيف:: بسوي ملحق برع وبنسكن فيه .. فيه 3 غرف وصاله
    خوله::نعم نعم منو قالك اني ابسكن في ملحق؟؟؟
    سيف:: وين تبين تسكنين عيل؟؟
    خوله::انا مابقبل الا ببيت روحي.. واظن ان نحنا اتفقنا على هالشي قبل..
    سيف:: انزين من وين اييبلج الفلوس؟؟ انتي تعرفين اني على قد حالي صح؟؟
    خوله::كيفك سيف.. انته وعدتني ولازم تكون عند وعدك..والا اسمحلي مابوافق..
    سيف::............................................. ................
    ياترى بيوافق سيف ...هو مب بس يحب خوله ولكنه يموت عليها ...ومايبغى اي شي يفرقه عنها... فشو الي راح يسويه في هالحاله؟؟؟ وهو فقير على قد حاله

    <LI class="postbitlegacy postbitim postcontainer" id=post_182924>08-09-2005 02:55 PM #2
    عجيد الريم مشاهدة ملف الهوية
    مشاهدة مشاركات المنتدى


    عضوية شرف الجنس تاريخ الانضمام 13-08-2003 الاقامة دار زايد المشاركات 3,697 قوة السمعة 18

    وهذا هو الجزء الثاني ...


    وان شالله الجزء الثالث يوم الثلاثا الياي ...

    @@@@@@@@@@@@@@@@@@@@@@@@@@@@@@

    أول شي أشكر بنت خالتي الغاليه لأنها هي اللي سوتلي هالتصميم




    سكت سيف ...فكر انه يترك خوله..لانها تطلب فوق طاقته...ولكنه ماقدر كيف بيترك الي حبها وبجنون ؟؟كيف بيترك قلبه ؟؟؟
    خوله..::سيف وينك؟؟
    سيف::............................................
    خوله::سييييييييف..؟؟شو اكلم عمري انا؟؟ ويييييينك؟؟
    سيف:: موجود ياخوله بس كنت افكر شوي..
    خوله::في شو كنت تفكر؟؟
    سيف::افكر شو بسوي عسب ابنيلج البيت..
    خوله::لاتخاف علشان خاطرك بيلس في الملحق الين ماتدبر الفلوس عسب نبني البيت..
    فرح سيف وقال في خاطره اخيراً وافقت...
    خوله:: سيف حبيبي الوالده تزقرني بسير الحين ..تامر بشي؟؟
    سيف::سلامتج الغاليه بس ردي اتصلي يوم بتفظين..
    خوله::اوووووووكيك يالله فمان الله..
    سكرت خوله عن سيف... طبعاً هي ماوافقت على انها تسكن في الملحق الا لغرض في نفسها... لان خوله معروف عنها انها ماتتنازل عن الي تباه لو يموت الي جدامها....فشو الي كان في بالها ياترى؟؟

    ------------------------------------------------------------------------------------------
    ------------------------------------------------------------------------------------------
    في سيارة ام سيف...
    روضه::امي بصراحه خوله حلوه وماعليها كلام ووايد طيبه.
    ام سيف تكلم حريم اخوانها..::ماقلتولي شو رايكم؟؟
    اليازيه..::بصراحه ياام سيف انا ماحبيتها احس انها قويه و.......
    عليا تقطع كلام اليازيه::يزوي اسكتي لا تقولين جذه..
    ام سيف::تبون الصدق حسيت بهالشي.. من نظراتها حسيت انها قويه بس شو اسوي؟؟
    روضه:: بالعكس امي شكلها طيبه وبصراحه انا حبيتها وايد..
    ام سيف:: انتي تحبين كل حد حبيبتي دومج جذه..
    روضه ماكانت تحب خوله لكنها قالت هالكلام بس علشان تهدي بال امها.. لانها كانت تعرف كيف ان سيف يموت على خوله وكيف يحبها.. وماحبت انها تلعب براس امها..
    -------------------------------------------------------------------------------
    ------------------------------------------------------------------------------
    في غرفة سيف...
    كان سيف يفكر...معقوله خوله لهالدرجه ماتقدر اني في بداية حياتي...
    كيف بقدر اتصرف الحين؟؟؟شو اسوي عسب اييبلها البيت الي هي تباه...
    تم يفكر ويفكر الين مااهتدى لحل يناسبه...
    فكر سيف انه يدخل في البورصه ويشتري ويبيع بالاسهم..هو خبير بهالشي لانه تعلمه من ابوه وقرر انه بيدخل مع ابوه البورصه في اقرب فرصه وبجذه مابيكمل السنه الا وهو باني البيت
    -------------------------------------------------------------------------
    ----------------------------------------------------------------------
    في بيت خوله...
    خوله كانت يالسه مع اختها الصغيره عهود
    عهود::خولوه ؟؟جي قلتي حق ام سيف انه عقب اسبوع بتردين الخبر؟؟
    خوله..::شو تبيني اقول والله موافقه جي منه والدرب السالفه بطيح من عينهم وبيقولون هذي مطيره
    عهود:: انزين والحين ماقلتيلي شو ناويه تسوين؟؟
    خوله::ماشي الحين لازم اخطط عسب اسوي عرسي في اكبر فندق..
    عهود::شو اكبر فندق من وين بييب؟؟
    خوله::حبيبتي انا بشترط ان مهري يكون 150 الف ..
    عهود وهي منصدمه/::كم حبيبتي؟؟ 150؟؟ شو بياخذ سياره..
    خوله وهي تشوف اظافرها:/: لا وانتي الصادقه بياخذ خووووووووووله
    عهود::انزين بس هو الحين لازم يبني بيتج من وين بييب هذا كله؟؟
    خوله::والله عاد كيفه يتصرف ..هذيل من الفلوس الي عندهم مب عارفين وين يصرفونها وهو الولد الوحيد غصب عنه وعن امه وعن ابوه بيسوي الي اباه ...
    سكتت عهود وكل الي قالته ::الله يوفقج

    عهود كانت تابعه لاختها خوله مع انها متعارضه مع اغلب افكارها.. بس لان خوله من كثر ماهي لعينه مسكت على اختها ممسك انها اذا ماسوت ونفذت الي هي تباه بتخبر امها انها كانت ترمس واحد .. في هالحاله بتكون عهود مجبوره تمشي وراها
    في بيت خوله....
    ام خوله تزقر بنتها::خولووه خولووه تعالي شوي اباج في سالفه..

    خوله::نعم امي امري..
    ام خوله:: خولوه طبعاً انتي سمعتي كل الرمسه الي استوت اليوم في الميلس... واباج تفكرين عدل وتردين عليه خبر اذا انتي موافقه ولا لأ؟؟
    خوله وهي تمثل انها مستحيه..:: امممممم ان شالله امي برد عليج خبر ورى باجر بس خليني افكر عدل..
    ام خوله::يامي هذي بتكون حياتج انتي... والريال شارنج.. وانا الي اشوفه ان امه واخته وحريم خواله كلهم ناس طيبين ...وابوج قالي ان ابوه ريال والنعم فيه ..وماشالله عندهم خير وايد ..بيقدر يعيشج...
    خوله::ان شالله امي بشوف
    سارت خوله حجرتها... واول مادخلت الحجره على طول اتصلت في طرفه...
    طرفه هذي كانت تحب سيف..وتحدتها خوله انها هي الي بتاخذ سيف..لكن طرفه كان حبها في قلبها ماحبت تبوح فيه الا للي كانت صديقتها المخلصه خوله..
    وخوله بلعانتها قالت انها بتاخذ سيف لها روحها ..ويوم اكتشفت طرفه قطعت علاقتها بخوله ولكن خوله حبت تنتقم تمت على رايها...
    خوله::الو السلام عليكم
    طرفه::عليكم السلام منو ويايه؟؟
    خوله::مسرعج مانسيتي الي كانت ربيعتج الروح بالروح؟؟
    سكتت طرفه..
    خوله::انتي ايه وينج؟؟
    طرفه::شو تبين متصله عقب هالمده؟؟
    خوله::متصله اتشمت فيج ياحلوه..
    طرفه::تتشمتين في شو يامسودة الويه انا ماقلتلج هالرقم ابغيج تنسينه؟؟
    خوله::يالحلوه انا باخذ محطم قلوب العذارى الي كنتي تحبينه في يوم من الايام.. سييييييف
    طرفه وهي منصدمه:: انتي شو تقوليين ؟؟
    خوله::الي سمعتيه ...ياطرفووه انا باخذ سيف.. والاسبوع الي بيي ملجتي..
    طرفه وهي تصيح:: يالنذله يالحقيره ..حرام عليج ..تعرفين اني احبه ليش تاخذينه وانتي ماتحبينه خولوه الله يخليج هديه مستعده اعطيج الي تبينه...
    خوله::مسرعج مانذليتي ياطرفووه...كان خاطري اسمعج تترجيني من زمان ماذليتج...باخذه ياطرفه باخذه وبتشوفين...
    طرفه::: انا شو سويتبج انا في شو ضريتج؟؟؟ عمري ماغلطت في حقج ولا عمري بغيتلج الشر.. فديتج هديه الله يخليج..
    ضحكت خوله ضحكة الاستهزاء..وسكرت التيلفون في ويه طرفه...
    يلست طرفه تصييييح وتفكر هي عمرها ماضرت خوله ولا عمرها قالتلها كلمه ضايقتها ليش تسويبها جذه؟؟؟
    وفي الطرف الثاني كانت خوله في قمة سعادتها... اخيراً بتكسر راس طرفووه اللعينه...
    عهود اخت خوله كانت تسمع كل الي استوى لانها كانت يالسه وياخوله في الحجره..
    عهود::حرام عليج يا خولوه شو سوتبج البنت؟؟؟

    خوله::انطبي انتي الثانيه خليني اليوم اسعد يوم في حياتي... اخيراً كسرت خشمها هالمتكبره... من انا صغيره وانا ابكسر راسها.. وكنت ادور هالفرصه... من صغيره وطرفوه احسن عني بكل شي غنيه وكل حد يحبها.. ومستانسه بشوية الجمال الي عندها.. انا الحين براويه منو هي خووووله وبراويها شو بتسوي..
    عهود::الله يعينج على عمرج ياخوله والله يعين شو بتسوين باجر بيت ريلج...
    خوله::اصلاً ريلي من الحينه مثل الخاتم في ايدي اومابيقدر يسوي شي
    عهود وهي مستغربه ::حرام عليج ياخوله.. شو من القلب عليج ؟؟؟
    خوله::عهودووووه وسم قومي اظهري برع مالي بارض اشوف ويهج الزفت انفدي...
    عهود::الله بيراويج على افعالج بالناس وبتشوفين وطلعت وسكرت الباب بالقو وراها
    --------------------------------------------------------------------------------------------

    في بيت سيف بعد اسبوع...
    سيف::امي يالله عاااد اتصليبهم شو هاا مب طايعين يردون مب عرس هاا
    ام سيف:: انزيييييييييين بلاك تحن من اسبوع اتريا شو بيستوي عليك..
    روضه:: امي اتصل انا اكلم خوله؟؟
    سيف:: فديت اختي انا الي تحب اخوها اتصلي حياتي اتصلي واساليها..
    ام سيف:: اصبر اصبر استهدى بالله انته واختك انا بتصل الحينه اتريوا...
    سيف وروضه تيمعوا جدام امهم وهي تتصل بيت خوله...
    عهود:: الو..
    ام سيف:: الو السلام عليكم
    عهود::عليج السلام والرحمه هلا
    ام سيف:: منو انتي خوله؟؟
    عهود::لا خالتي انا عهود منو ويايه؟؟
    ام سيف:: انا ام سيف فديتج عهود شحالج الغاليه؟؟
    عهود::هلا خالتي انا بخير وسهاله انتي شحالج؟؟
    ام سيف:: انا بخير ربي يسلمج فديتج وين امج ؟؟
    عهود::امي هكي عدالي لحظه بعطيج اياها..
    ام خوله:: السلام عليكم هلا والله بالغاليه ام الغالي..
    ام سيف:: يعني افهم انج موافقه؟؟
    ام خوله:: اكييييييييد وانا عندي اغلى من سيف ومن امه ومن بنتهم الحلوه؟؟
    ام سيف :: اسمحيلي ام خوله بقولج شي..
    ام خوله:: امري الغاليه ..
    ام سيف ::مايامر عليج عدو بس كلللللللللللللولولولولولولولولولولولولوولولولولولو لولولولوش...
    سيف وروضه تموا يركضون من الوناسه في البيت ...
    سيف ركب سيارة البيت الي يقضون فيها اشغال البيت ويحملون فيها السمج والخضره سيارة البيكب.. سار الدبه .. وروضه دخلت ويلست مكان الدريول وشغلت المسجل وطولت عليه على الاخر.. وسيف يرزف وخاطره يكسر السياره ويسوقها ويدعم بيتهم من الوناسه .. وروضه مستانسه لوناسة اخوها .. تموا يرزفون والبشاكير يشوفونهم ويضحكون ..

    طلعت ام سيف وهي تزاعج:: سيفوووووووووووووووووووه .. روضووووووووووووووووووه.. فشلتونا شو بيقولون عنا الييران .... شو يهال انتوا.. حتى البشاكير يضحكون عليكم يالله ادخلوا...
    روضه :: ماما متى بيملجوون ؟؟
    ام سيف:: الاسبوع الياي..بس ادخلوا بتفاهم وياكم..
    سيف نزل من الدبه وتم يركض ويخمس من الوناسه...
    دخل البيت وتم يدووور على عمره .. وروضه تغنييي..
    ام سيف تضحك.. انطبوا وايلسوا ..سيفووه الحينه بقولهم انا مب موافقه بتيلس ولا اتصلبهم؟؟
    ركض سيف عند امه ويلس ..وربع ايده.. خلاص مابرمس بس قولي..
    ضحكت ام سيف اول مره تشوف ولدها جذه ...
    ام سيف:: اسمع..:: امها طلبت عليه مهر غالي .. وانا وافقت لانك ماشالله بتموت على البنت عسب جذه اقولك انته اسحب من البنك 50 الف وابوك 50 وانا بعطيكم 50 من عندي..
    سيف:: جي طالبين 150 ؟؟
    ام سيف:: طلبوا بس حتى لو ماقالوا نحنا لازم نعطيهم اكثر عن جذه هذا عرس ولدي الوحيد ولازم استانس فيه..
    روضه::انزين ماما وانا مايستوي ادفع؟؟
    ضحكوا سيف وام سيف على كلام روضه..
    سيف:: روضوه انتي يوم بتعرسين انتي ادفعي المهر انزين لاتنسين ..
    استحت روضه ودخلت حجرتها..

    وقرروا الحريم ان الملجه عقب اسبوع ... ..

    واكيد بتصير تطورات في الملجه..

    وهذا هو الجزء الثالث وأتمنى يعجبكم ...

    ################################################

    في بيت خوله يوم الملجه...الصبح...

    ام خوله:: خوله ...خوله نشي استوت الساعه 11 نشي ..


    خوله ::شووووووووووووووو امي تعبانه حرام عليج شو تبين ابى ارقد مالي بارض انش..

    ام خوله:: لا غناتي لازم تنشين منو بيسير اييب فستانج من الخياط؟؟ بعدين لازم تسيرين الصالون الساعه 3 فديتج .. وبعدين سيف مطرش الرياييل الي يشتغلون في المطعم يايبين بوفيه نشي اشرفي عليهم انا مااروم اسوي كل شي بروحي...

    خوله::انزين طرشي الدريول اييب الفستان وانا بسير الخيمه وبشرف على الطاولات ..

    ام خوله: انزين انتي نشي قبل عقب بطرش الدريول.. ...

    خوله::انزييييييييين الحين ناشه ...

    نشت خوله ولبست شيلة البيت وظهرت من حجرتها وسارت برع في الخيمه تشوف شو الترتيبات... تمت واقفه ترتب وتشرف عليهم حوالي ساعتين ونص دخلت البيت بعدها وهي منهد حيلها...اول مادخلت الحجره انصدمت

    شافت باقة ورد عوووووووووووووووووووده ووسطها صندوق صغير.. تقربت من الباقه عشان تشوف البطاقه لكنها مالقتها.. فتحت الصندوق ولقت طقم الماس يجنن.. تخبلت خوله ولقت بطاقه صغيره.. فتحتها خوله وقرت مكتوب فيها..((مع اطيب التمنيات لك بالتوفيق والحياه السعيده)) المحب المخلص:: حمد..

    انصدمت خوله ... رجعت تأكدت من الاسم ...حمد...

    رجعت تذكرت حمد... الانسان الي حبها من كل قلبه... ولكنها ذلته... لانه ماكان عنده شي..كان فقير على قد حاله.. وهي كانت احلامها كبيره... واشترطت انه يكون غني علشان تاخذه..وعدها انه يسافر وييب الها الي تباه ... بس على انها تترياه ثلاث سنين ووافقت...ماكملت سنه الا وهي بتاخذ واحد غيره...هاللحظه بس حست انها غبيه...حمد كان يموت عليها..ولكنها كابرت على نفسها وخذت الشخص الي كانت تتحدى طرفه فيه... ماحست الا بالدموع على خدها... ولكنها كابرت على نفسها وقالت ...حمد كان فقير وبيتم فقير في نظري.. وسيف يقدر يعيشني احسن عيشه .. وبتم انا الامره الناهيه في البيت ....

    قطع تفكيرها صوت الباب...

    خوله::منووووو؟؟

    عهود::انا عهود شو تسوين؟؟

    خوله ::شو تبين ؟؟

    خوله::يبت الفستان بطلي الباب مب رايمه اشله...

    ركضت خوله عند الباب ونست البطاقه على الطاوله...::فتحت الباب..

    شافت فستانها الوردي كان وايد حلو ..

    خوله::الله واايد مسونه روعه ..اول مره يسوي شي عدل بضمير...

    عهود::الله يغربلج يالسه تتأملين في الفستان وانا ايديه بتطيح فارجي عن ويهي بحط الفستان...

    دخلت عهود::وعلقت الفستان ...

    يلست خوله تتأمل في الفستان..شلته وسارت عسب تقايسه...

    يوم دخلت خوله تقايس الفستان انتبهت عهود على الباقه... يلست تتأمل فيها وانتبهت ان البطاقه موجوده ...ومكتوب عليها حمد..ماعطت البطاقه اهميه هي كانت تعرف حمد ردتها مكانها وقالت في خاطرها ..وحليلك ياحمد انغشيت ...

    طلعت من الحجره وخلت اختها داخل مستانسه بالفستان روحها ...




    في بيت سيف::

    روضه كانت تكلم ربيعتها في التيلفون...

    وقطع عليهم سيف كلامهم...

    روضوووووه..سكري التيلفون برمسج...

    روضه::سلامه عقب شوي بكلمج الحين اخويه يباني..مع السلامه...

    سكرت روضه التيلفون ..وصدت على سيف::هلا سيف امر

    سيف::تعالي الحجره براويج شي

    ركضت روضه وسبقته الحجره

    يوم وصلت ..دخلت الحجره ودخل وراها سيف...

    سيف::عنبوه انتي ماتصدقين محد يقولج شي

    روضه::يالله يالله قووول والله بتخبل شبلاك؟؟

    سيف::روضوه ..اليوم انا مسوي مفاجأه حق خوله..

    روضه ::شو هي؟؟

    سيف:: شوفي اليوم انا بدال ماييبلها طقم يايبلها اثنين ..واحد بلبسها اياه والثاني انا مغلفنه ..وابغيج اليوم يوم بنسير تودينه لها اوكي

    روضه::ان شاااااااااااااااالله عمي سيف تامر...




    في بيت خوله فليل...

    وصلت روضه بيت خوله وفي ايدها الطقم...

    وصلت عند باب حجرة خوله ودقت الباب..

    خوله::منو؟؟

    روضه ::انا روضه اخت سيف...

    خوله::افففففففففف شو يابها الحين هذي؟؟

    خوله::لحظه رواضي الحينه يايه

    فتحت خوله الباب وهي متملله بس مجبوره انها تتحمل روضه..::هلا رواضي شحالج..

    روضه::تمام ..خوله هذي هديه من اخويه ..هو يابلج هالهديه البسيطه ويسلم عليج..

    خوله ::مشكوره حبيبتي..شو رايج فيني حلوه؟؟

    روضه::الا قمر تخبلين ..اخويه عرف منو يختار...يالله الحينه انا بسير عسب امي ماتحشر البقعه تدورني...

    خوله::اوكي حبيبتي يالله باي اشوفج عقب..

    سكرت خوله الباب وهي منقهره خاطرها تصفع روضه لأنها ماتدانيها ..من كثر ماسيف يتمدحها وتشوف الكل يحبها وماتعرف على شو؟؟

    فتحت خوله هديتها وشافت طقم الماس حلو ...تخبلت وقالت في خاطرها..

    هالطقم الي ينلبس مب طقم هالمعفن حمد...

    -------------------------------------------------------------------------------------------------------

    الساعه 11 ونص...

    كانت زفة العروس...

    دخلت خوله وكانت في منتهى الجمال... انزفت على اغنية راشد الماجد...

    وتمت يالسه تبتسم للحضور...

    ماانتبهت منو موجود بس كانت فرحانه وايد لانها اخيراً حققت حلمها وتزوجت مليونير...

    يلست خوله على الكوشه ... وتمت تشوف منو الي ياي.. وبين الحضور انتبهت على وحده ماتوقعت انها بتتواجد..وانصدمت من الي شافته..

    شافت روضه واقفه عدال طرفه وتكلمها..

    انصعقت خوله ..شو الي خلى روضه تتكلم ويا طرفه وشعرفهم ببعض تمت تحاتي..لايكون اكتشفت انها هي ماخذه سيف تحدي بينها وبين طرفه وانها ماخذتنه بس عسب فلوسه مب حباً فيه...

    تمت مبهته في روضه وطرفه...

    يوم التفتت روضه على خوله ..خوله اشرتلها انها تي عندها..

    استأذنت روضه من طرفه وسارت عند خوله ويوم وصلت..

    خوله::رواض حبيبتي متى بيي اخوج.؟؟

    روضه::مادريبه هو قال 12 ونص

    خوله::اهااااا.. تعالي صح ويا منو انتي واقفه؟؟

    روضه::هذي ربيعة بنت خالتي تعرفت عليها من فتره ..

    خوله::اهاااااااا ..منو عازمنها ؟؟

    روضه::امي عزمتها ترى هي وايد ويايه..

    هوله::انزين حبيبتي ..قبل مايدخل اخوج عطيني خبر انزين..

    روضه::ان شالله حبيبتي

    انقهرت خوله من روضه اكثر من قبل..هي روحها ماتدانيها وبعد كرهتها زياده يوم عرفت انها تعرف طرفه....






    الساعه 12 ونص



    دخل المعرس ولبسها الطقم ..... وتموا البنات يرقصون ويغنون الين ماستوت الساعه 2 ونص...

    فليل في التيلفون



    سيف::فديتج ياخوله واخيراً انا وانتي تزوجنا..

    خوله::عساني افداك ياسيف...
    سيف::................................
    خوله::سواف حبيبي بغيت اقولك..

    سيف::امري عيون سيف...

    خوله::تسلملي عيونك... سيف ..انا وايد احب رواض اختك وماارضى ان حد يقول عنها شي ومن مصلحتي اني اقولك عن شي بس لا تتحسب اني ابغي اخرب بينكم...

    سيف::لالا اكيد بس خبريني شو مسويه روضه ؟؟

    روضه::لالا فديتها مب مسويه شي ..بس سيف خل اختك تبتعد عن طرفه...

    سيف ::لـــــــــــــــــيــــــــــــــــــــــش؟؟
    خوله::بقولك بس بدون ماتعصب اوكي...ترى اختك ماتدري بسالفتها وانا مابغيها تعرف بس انته ابعدها عنها ...حرام نفضح البنت..

    سيف::انزين انتي خبريني شو مستوي؟؟

    خوله::شوف سيف....طرفوه قبل كانت ربيعتي الروح بالروح وانا اعرف كل سوالفها... هي بنت مب زينه واخاف اختك تمشي وراها ..انته بس ابعدها عنها مثل ماانا ابتعدت عنها..

    سيف::انزين شبلاها البنت؟؟

    خوله:: هي كانت تكلم ولد خالتي ... وانا مااكنت اعرف عقب يوم دريت بالصدفه ابتعدت عنها انا ماابغي اختك تستوي مثلها...

    سيف وهو محرج:: خلاص خوله انا بسير الحين بكلمها ..

    خوله::سيف اصبر مب الحين كل شي بالتفاهم يمشي..

    سيف::اوكي خلاص بكلمها باجر..

    خوله::اوعدني انك بتتفاهم وياها بدون عصبيه...

    سيف::ان شالله

    خوله::اوكي حبيبي انا الحينه بسكر عنك بسير ارقد تعبانه شوي.. بواعيك الصبح حق الدوام اوكي...تصبح على خييير

    سيف::وانتي من اهله...

    تم سيف يفكر طول الليل..شو يسوي عسب يبعد اخته عن طرفه خصوصاً يوم عرف ان طرفه مب زينه الين ماهتدى لفكره يمكن تنفع....رقد سيف وقرر ان الصبح يكلم اخته...



    الصبح بيت سيف....



    ينش سيف من الصبح ويواعي روضه...

    رواض ..يالله نشي ...

    روضه::شو سواااااااف خلني راقده....

    سيف::نشي انا بوصلج المدرسه اليوم...

    روضه:::شو نازل عليك الوحي اليوم تبى توصلني؟؟

    سيف::كيييييفييييي...اختي وانا حر نشي يالله ابسولف وياج..

    روضه:: انزين ....

    سيف:: انزين بس لاتلبسين ثياب المدرسه ..

    روضه::جييي؟

    سيف::بس اليوم ابرمسج في سالفه وابغي اظهر وياج...

    روضه::انزين كلم امي ....اخافها ماتطيع...

    سيف:: لالا ماعليج امي بتوافق اذا قلتلها اني انا بظهر وياج ...

    روضه::انزين انا بسير اتلبس وانته سير قول حق امي....

    سار سيف عند امه واقنعها انه يظهر اليوم ويا روضه وماتسير المدرسه لانه يباها في سالفه...

    وافقت ام سيف انه يظهر ويااخته...

    طلعت روضه من البيت ويااخوها ...

    مر وخذلها عصير ...

    وطول الوقت وهو ساكت مب عارف كيف يبدا وياخته الموضوع...

    روضه::سيييييف,,, صدقني طفرت من نص ساعه ونحنا طالعين ومب طايع تقولي بلاك ؟؟ شبلاك مويم ؟؟

    سيف::.....................

    روضه::سوااااااااف ارمس

    سيف::هاااه..هلا شو

    روضه::ماشي بس انا من سنة يدي ارمس وياعمري بلاك ساكت ارمس ليش خليتني اغيب عن المدرسه اليوم ؟؟

    سيف::ماشي كنت اباج في سالفه ..

    روضه::انزين اتكلم تراني وياك واسمع اتكلم بلاك؟؟

    سيف:: رواض من متى انتي تعرفين طرفه؟

    روضه::اعرفها عن طريق شجون بنت خالتي ليش؟؟

    سيف::انزين انا بقولج شي بس اوعديني ان هالشي ماتزعلين منه؟؟

    روضه::سواف حبيبي انا عمري مازعلت منك عسب ازعل منك الحين ...

    سيف::رواض انا سمعت ان هالبنت مب زينه ...

    روضه بعصبيه::منو قالك؟؟خوله صح؟؟

    سيف وهو مستغرب::وانتي ليش متأكده ان خوله هي الي قالتلي...

    سكتت روضه وتمالكت اعصابها..مابغت تقول انها تعرف كل شي عن خوله ..لانها تعرف شكثر اخوها يحب خوله وهي تعرف سالفتها من البدايه للنهايه ومابغت سيف ينصدم فيها...

    سيف::خبريني شدراج ان خوله هي الي قالتلي؟؟وشو الي خلاج متأكده؟؟

    روضه::لا ماشي بس سألت..

    سيف::رواض حبيبتي لو خوله ماقالت كنت بسمع من حد ثاني

    روضه وهي تساير سيف وفي قلبها مليون غصه.::صدقك سيف لو خوله مب الي قايلتلك جان سمعت من حد ثاني..

    سيف::شوفي روضه انا كل الي اطلبه منج ولو كان لي خاطر عندج انج تهدين طرفه..ابتعدي عنها او حاولي ان مكالماتج تكون بسيطه اللهم سلام بينج وبينها لا تحاولين انج تدخلينها في حياتج والله مابتحصلين منها الا المصايب ..

    روضه::سواف انته اخويه ولازم اسمع كلامك لاني احبك ومابا اخسرك عسب هالرمسه ..فالك طيب ولا يهمك تامر سيف...

    استانس سيف ان اخته سمعت كلامه ……

    ولكن روضه تمت مغتبنه كيف ان خوله تبغي تفرق بينها وبين طرفووه….

    سكتوا طول الطريج …سيف مااستغرب من هالوضع لان روضووه متعوده انها تسكت….

    الساعه 2 الظهر ردوا سيف وروضه من الطلعه دخلوا الصاله وشافوا امهم يالسه ..

    وانتظروني ان شالله في الجزء الرابع الأسبوع الياي ان شااااااااالله












  2. #2
    عضو جديد
    الصورة الرمزية عيناوية طر
    الحالة : عيناوية طر غير متواجد حالياً
    رقم العضوية : 60444
    تاريخ التسجيل : 03-09-10
    الدولة : الامارات فديتهااااا
    الوظيفة : طالبهـــ ^^
    الجنـس : انثـى
    المشاركات : 12
    التقييم : 10
    Array
    MY SMS:

    عيناويهــ الين المووت ^^

    افتراضي رد: خيانة الذكرى ....... من جديد ..


    صرااااحة قصة ولا اروووع بليز بسرعة كملهاااا لو سمحت صرااحة طر القصة بتريااا التكملة لا تتأخر ^^ تسلم على القصة الجناان






  3. #3
    عضو مجتهد
    الصورة الرمزية الحسناء
    الحالة : الحسناء غير متواجد حالياً
    رقم العضوية : 59101
    تاريخ التسجيل : 29-05-10
    الدولة : الإمارات الحبيبة
    الوظيفة : طالبة علم
    الجنـس : انثـى
    المشاركات : 170
    التقييم : 11
    Array

    افتراضي رد: خيانة الذكرى ....... من جديد ..


    الصراحة القصة قمة في الروعة الرجاء التكملة في أسرع وقت






معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. انا بحط لغز وكل واحد يجاوب الي يجاوب صح كل موضوع يكتبة بحط رد
    بواسطة وصلاوي وكلي فخر في المنتدى منتدى الوناسة و إستراحـة الاعضاء + الترحيب و الاهدائات
    مشاركات: 11
    آخر مشاركة: 14-11-21, 11:51 AM
  2. رحلت ولكن هذه الذكرى؟!
    بواسطة الفل و الريحان في المنتدى معرض المواهب و الابداع Fair talent and creativity
    مشاركات: 13
    آخر مشاركة: 12-08-31, 09:45 PM
  3. سكة الذكرى
    بواسطة Bio.Med في المنتدى معرض المواهب و الابداع Fair talent and creativity
    مشاركات: 1
    آخر مشاركة: 11-05-01, 12:24 AM
  4. وذكر فإن الذكرى تنفع المؤمنين
    بواسطة أحلى بنوووته في المنتدى منتدى الوسائط Media Forum
    مشاركات: 3
    آخر مشاركة: 10-02-22, 05:21 PM
  5. تجرحني الذكرى~
    بواسطة Bio.Med في المنتدى معرض المواهب و الابداع Fair talent and creativity
    مشاركات: 11
    آخر مشاركة: 09-08-23, 08:19 AM

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •