الموضوع: متى تبدأ الدراسة بالاكاديمية ؟وكيف ال45 يوم ؟ الله يعين

السلام عليكم واسعد الله اوقاتكم بكل خير
انا طالب جديد بالاكاديمية من السعودية ارجو ان اكون ضيفا خفيف الظل عليكم اهل الامارات

لدي تساؤلات عديده , امل ممن تكون لديه الاجابه الا يبخل علي بها . فلم يعرف البخل ببلدكم منذ نشأتها

وتساؤلاتي هي متى تبدأ الدراسه وال 45 يوم ؟ ومتى اول زيارة يسمح بها خلال ال:45 يوم واي الاحياء افضل للسكن خلال الدراسة ؟

وسلامتكم شاكرا اطلاعكم ومقدرا اجابتكم والسلام عليكم

مرحباً بك أخي العزيز / يرجى التوضيح سؤالك غير مفهوم وهل تعني بإستفسارك طلبة المرشحين أم طلبة الدراسات المسائية ؟
__________________________________________________ _________________________________

معلومــــــــــة : بالنسبة لطلبة الدراسات المسائية ستبدأ الدراسة بإذن الله تعالى يوم الأحد الموافق : 02/09/2012م وستنتهي يوم الخميس الموافق : 13/12/2012م ولمزيد من المعلومات بإمكانك دخول هذا الرابط التابع لأكاديمية شرطة دبي http://www.dubaipolice.gov.ae/academy_prod/index.jsp# وأسئل الله لك التوفيق

السلام عليكم ورحمة الله وبركاته
.
.
هلا فيك اخوي عبدالعزيز
نورت بلادك الامارات
وما قصر اخوي سلطان بالرد عليك
ومثل ما قالت الاخت ظبيانية
ان شاء الله مشرف القسم ما يقصصر وياك
.
.
موفق

امس حد خبرني عن المرشحين
بعدهم اجراءات الفحص الطبي الحين
اللي فهمته انه بيبدون بعد. 2 سيتمبر
موفق يا خوي في بلدك الثاني
وعن السكن بتكون ساكن بالاكاديمية نفسها

وعليكم السلام ورحمة الله وبركاته
يا حي الله اهل السعوووودية
مثل ما قالوا الاخوان وان شاء الله ترتاح فالسكن عندهم بس شكله حلو هههه وكليتهم شكلها حلوة تفتح النفس للدراسة ههههه
موفق اخوووي

السلام عليكم ورحمة الله وبركاته
اسمحولي على التاخير في الرد لاني مشغول في الدوام
شكرا للاعضاء الي ردو قبلي ما قصرو الصراحة

الكلية بتبدا على ما سمعت اول اسبوع من شهر تسعة او ثاني اسبوع
وعن ال45 يوم اول ما تدخل من اول يوم تبتدي يحجزونك في الاكاديمية لمدة 45 يوم وتكون اول زيارة بعد مرور اسبوعين من ال45 يوم والغالب تكون يوم الجمعه ثاني اسبوع من بعد صلاة العصر لين المغرب
وبعد ال45 يوم تبدأ الدراسة على خفيف وطبعا في ال45 يوم بيشدون عليكم وبيتعبونكم شويه بس بعد ال45 يوم بيريحونكم وايد لانه اصلا المعنا من ال45 يوم هو تحويلكم من الحياة المدنيه للحياه العسكريه
وطبعا بعد انتهاء الفصل الاول والي هو الفصل التمهيدي يبتدي الدراسه بجد يعني تبدون بدراسة ليسنس القانون وبيكون جدولكم اليومي على النحو التالي:
الاستيقاض الساعة 5 الصبح وبيكون عندكم رياضة لين الساعة 6 تقريبا وبعدين بيكون عندكم تدريب عسكري لين الساعة 8 او 8 ونص بعدين وجبة الفطور وبعدها الاستعداد للقاعات الدراسية والدراسه لين تقريبا الساعو 1 او 1 ونص
بعدها عندكم وجبة الغداء وبعد الغداء عندكم استراحة لين العصر الساعة 4 وبعدين عندكم مرة ثانية رياضه لين المغرب وبعدين تروحون السكن في نفس الكليه ويكون عندكم وقت الاستذكار لين بعد صلاة العشاء بعدين عندكم وجبة العشاء وبعدها تروحون السكن ويكون عنكم تنظيف السكن وبعده يكون عندكم اطفاء الانوار ( النوم ) الساعة 10 م ويكون اجباري وهذ هو الجدول اليومي يمكن يختلف من سنه لسنه في التدريب والرياضه بس هذا الجدول الاساسي
الدراسة اربع سنوات وكل سنه تاخذون مجموعه من المواد القانونيه والشرطيه والدراسه سهله حق الاجاد والي يى الشهادة
وعن الاسبوع يكون بدايته من يوم الاحد لين يوم الخميس ويكون عندكم طول الاسبوع حجز في الاكاديميه بس يوم الخميس يطلعونكم من بعد الظهر يعني بعد الدراسه وترجعون لايوم السبت العصر وهاكذا طوال الثلاث سنوات اما السنه الرابعة والاخيرة يكون الدوام رسمي يعني ما في حجز في الاكاديميه تنام برع الاكاديميه ويكون الدوام من الفجر الساعة 5 الصبح لين الساعة 2 الظهر وتطلع ويكون الجدول نفس الي قلته رياضه وتدريب ودراسه وبس
عن السكن بتكون ساكن اجباري في الاكاديميه بس بيطلعونك يومين في الاسبوع اذا حاب تتاجر برع الاكاديمية عشان ترتاح ها اليومين عندك
اغلب المرشحين الوافدين كانوا يسكنون في منطقة قريب الاكاديميه عشان ما يتاخرون ويكونون قريبين لانه عادي في اي وقت يقولك ارجع الاكاديميه اسم المنطقة ( البرشاء ) منطقة معروفه ومتوفر فيها كل شي وقريب الاكاديمية وبتحصل اغلب المرشحين ساكنين فيها لقرب المسافه تبعد عن الاكاديميه 5 دقايق فقط بالسيارة
بس السنه الرابعه والاخيرة ما في سكن في الاكاديمية يعني تنجبر تسكن برع
ان شاء الله اكون افدتك بشي واذا عندك اي تساؤلات نحن في الخدمه
ملاحظه : اول اسبوعين في ال45 يوم اصعب اسبوعين اذا عديتهم انت ضامن تتخرج ان شاء الله ^ ما اخوفك ما يسوون شي بس طول اليوم بيكون رياضه يعني بيكون تعب عليك ووقت الراحة قصير واذا انت رياضي بتكون الامور طيبه عندك اهم شي العزيم والتمسك ولا تتردد في يوم من الايام
وشكرا لك وبالتوفيق في رحلتك الدراسية